Библия чуртасты алыстырча

ХАЙДИ сӧбіреде ирееленіп ӧскен хыс чуртастың смыслын таап алған? Политиканаң айғасхан чабал сайбағҷыны чахсы хабарның амыр искірігҷізі пол парарға ниме кӧӧктірген? Пу кізілердеңер кӧп арах піліп алаалар.

«Мағаа хыныс паза паарсас уғаа кирек полған» (ИННА ЛЕЖНИНА).

ТӦРЕЕН ЧЫЛЫ: 1981

ТӦРЕЕН ХАЗНА: РОССИЯ

ХАҶАН-ДА: СӦБІРЕДЕ ИРЕЕЛЕНІП ӦСКЕН ХЫС

МЫНЫҢ АЛНЫНДА. Мин кічиҷек городта, Троицкте, тӧреем. Мин, іҷе-пабамох чіли, туных полғам. Пастағы алты чыл чуртазым часкалығ паза амыр полған. Анаң іҷемнең пабам чарылыс парғаннар. Мин кічіг полған ползам даа, чарылысханы нимедір ол пілгем паза анзы чӱреемні тың ағыртхан. Пабам паза минің улуғ харындазым Троицкте халғаннар, піс іҷемнең, тізең, Челябинсксер парыбысхабыс. Соонаң іҷем хатап ирге парыбысхан. Ӧӧй пабам кӧп араға ісчең паза іҷемні дее, мині дее удаа сохчаң.

1993 чылда минің аарлығ улуғ харындазым, суға саайланып, ӱреп парған. Пістің сӧбіребіс аның ӱчӱн уғаа тың чобалған. Іҷем араға іс сыххан паза, ӧӧй пабам чіли, мині сох сыххан. Минің пасха, чахсы арах чуртас ползын тіп хынғам. Мағаа хыныс паза паарсас уғаа тың кирек полған. Мин аймах-пасха тигіриблерде часхарыс тілеем, че пір дее таап полбаам.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН. Мағаа 13 час полғанда, миннең хада ӱгренчеткен Иегованың киречізі полчатхан хызыҷах Библиядаңар чоохтаҷаң. Минің кӧңніме Библиядағы кізілердеңер, кӧзідімге, Нойдаңар паза Иовтаңар, чоохтар кірҷең. Оларға сидік полған полза даа, олар Худайға нымысчыланғаннар. Ӱр ниместең мин Иегованың киречілерінең хада Библияны ӱгрен сыххам паза оларның чыылығларына чӧр сыххам.

Библияны ӱгреніп, мин кӧп сіліг сыннарны піліп алғам. Кӧзідімге, Худайның ады пар тіп піліп алғам. Худайның ады пары чӱрееме тың теңен (Псалом 83:18). Библияның «тӱгенҷі кӱннерде» хайдағ чуртас поларынаңар хап-орта ухаанҷылааны мині тың хайхатхан (2 Тимофейге 3:1—5). Тірілістеңер піліп алып, уғаа тың ӧрінгем. Мин улуғ харындазыма тоғазып алар кӱнні чидікпин сахтапчам (Иоанн 5:28, 29).

Че минің Библия ӱгренгенім прайзының на кӧңніне кірбеен. Іҷемнең ӧӧй пабам Иегованың киречілеріне хынмаҷаңнар, аннаңар Библия ӱгренгенімні тохтадыбызарға кӱстееннер. Мин Худай Сӧзінең пілістер аларға тың хынғам, аннаңар аны ӱгренерге прай кӱс салғам.

Туғаннарымның тоғырланыстарының ӱчӱн мағаа оой полбаан. Ағаа хоза, чуртазымда пір чобағ пол парған: миннең хада ӧме чыылығларына чӧрген туңмам, улуғ харындазымох чіли, суға саайланып, ӱреп парған. Иегованың Киречілері ол сидік туста миннең хада полғаннар. Олар хыныснаң паза паарсаснаң мағаа хайғаннар. Анзы мағаа чуртас тооза читпеен. Мин піліп алғам: пу сын религия. 1996 чылда, кіреске тӱзіп алып, Иегованың киречізі полып алғам.

ЧУРТАЗЫМА ХАЙДАҒ ТУЗА АҒЫЛҒАН. Алты чыл мының алнында мин чахсы кізее, Дмитрийге, ирге парыбысхам. Ам піс ирімнең хада Иегованың киречілерінің Санкт-Петербургтағы филиалында нымысчыланчабыс. Іҷе-пабамның минің киртінізіме кӧрістері алыс парған, олар паза іди тоғырланминчалар.

Иегованы пілчеткеніме уғаа тың ӧрінчем. Ағаа нымысчыланып, чуртазым смысллығ пол парған.

«Мині кӧп сурығлар сағыссыратхан» (РАУДЕЛЬ РОДРИГЕС РОДРИГЕС).

ТӦРЕЕН ЧЫЛЫ: 1959

ТӦРЕЕН ХАЗНА: КУБА

ХАҶАН-ДА: ПОЛИТИЧЕСКАЙ САЙБАҒҶЫ

МЫНЫҢ АЛНЫНДА. Мин Кубада, Гаванада, тӧреем, чох-чоостар чуртапчатхан кварталда ӧскем, анда тасхар удаа урусчаңнар. Аннаңар мин дзюдонаң паза пасха даа боевой искусстволарнаң айғас сыххам.

Мин чахсы ӱгренгем, аннаңар іҷе-пабам мині университетсер кірзін тіп хынғаннар. Университетте ӱгренчеткемде, хазнаның политическай системазын алыстырыбызарға кирек тіп сағынғам. Пірсінде, хада ӱгренчеткен арғызымнаң хада, полицейскайның пистоледін пылазып аларға тіп, ағаа тыыныбысхабыс. Піс аны тың сох салғабыс. Анаң пісті харибге одырт салғаннар паза атысха чарғылабысханнар. Мағаа 20 ле час полған, че мағаа ӧлерге кирек полған!

Камерада чалғысхан одырчатхамда, хайди казнь тузында тудынарға сағынғам. Хорыхчатханымны кӧзідерге хынмаам. Че олох туста мині кӧп сурығлар сағыссыратханнар. Кӧзідімге, позымнаң сурҷаң полғам: «Ноға чир ӱстӱнде анҷа кӧп сыны чох тудыныс? Ӧлім соонда чуртас пар ба?»

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН. Піске ӧлім орнына 30 чыл харибде одырарға чарғы сығарғаннар. Ол туста мин Иегованың киречілеріне тоғасхам. Олар харибде киртіністерінің ӱчӱн одырғаннар. Оларның махачы, олох туста амыр тудыныстары мині хайхатхан. Оларны сыны чох чарғылаан ползалар даа, олар пір дее кізее тарынмааннар паза хазыр тудынмааннар.

Иегованың киречілері мағаа Худай кізілердеңер ниме сағынчатханнаңар чоохтап пиргеннер. Олар Библия хоостыра чирде рай поларын, сайбағлар паза сыны чох тудыныс чох поларын кӧзіт пиргеннер. Чирде чахсы ла кізілер ирееленмин, уғаа чахсы паза мӧгі чуртас чуртирлар тіп чарыда чоохтап пиргеннер (Псалом 37:29).

Иегованың киречілері минің кӧңніме уғаа тың кіргеннер, че мин саңай пасха кізі полғам. Мин, политикада араласпин, чуртап полбаспын тіп сағынғам. Пір наағымны сабыссалар, ікінҷі наағымны хаҷан даа тут пирбеспін тіп сағынғам. Аннаңар мин Библияны позым хығырып аларға пӧгін алғам. Библияны тооза хығырыбысхамда, Иегованың киречілері ле, пастағы христианнар чіли, тудынчалар тіп сағысха килгем.

Библияны ӱгреніп, мин піліп алғам: чуртазымда кӧп ниме алыстырарға кирек. Кӧзідімге тамкы тартарын паза хырызынарын тастирға кирек полған. Ідӧк, политическай сурығларда пірдеезінің саринда турбасха кирек полған. Анзы оой полбаан, че Иегованың полызиинаң алызып алғам.

Позымны холда тударға мағаа иң сидік полған. Мин ам даа Худайдаң тыстаныс сурынчам. Мағаа библейскай стихтар уғаа тың полысчалар. Кӧзідімге, Притчи 16:32-де чоохталча: «Тыстанып оңнапчатхан кізі кӱстіг кізідең артых, позын тудынып оңнапчатхан кізі саарны чиңіп алған кізідең артых».

1991 чылда мин, харибде кіреске тӱзіп алып, Иегованың киречізі полып алғам. Мині суғлығ бочкада кіреске тӱзіргеннер. Соңа чылда мині паза нинҷе-де кізіні харибдең позыдыбызып, Испаниязар ызыбысханнар. Анда пістің туғаннарыбыс чуртапчатхан. Мин, андар киліп, Иегованың киречілерінің чыылығларына чӧр сыххам. Олар мині, кӧп чыллар танаан чіли, чылығ удурлааннар паза наа чуртас пастирға полыс пиргеннер.

ЧУРТАЗЫМА ХАЙДАҒ ТУЗА АҒЫЛҒАН. Амды мин ипчімнең паза хыстарымнаң хада Худайға ӧрініснең нымысчыланчам. Кізілерге Библия ӱгренерге полызып, кӧп тус иртірчем. Пірееде мин сала ӧл парбаан тузымны сағысха кирчем, че ол тустаң сығара чуртазым алыс парғанына уғаа тың ӧрінчем. Мин тіріг халғам, ағаа хоза, ізеніс таап алғам. Худай молҷаан Райны чидікпин сағыпчам. Анда сыны чох тудыныс чох полар, «ӧлім дее» чох пол парар (Азых чоох 21:3, 4).

[Вставка]

«Худайның ады пары минің чӱрееме тың теңен»

[Хоос]

Ирімнең хада туных кізілерге жест тілінең сығарылған публикацияларнаң Худай сӧзін искірчебіс