Прай христианнар сынында христианнар ба?

ЧИР ӱстӱнде нинҷе кізі позын христианин тіп адапча? «Христианскай религияларның атлазы» хоостыра 2010 чылда 2,3 миллиардча кізі постарын христианин тіп сананғаннар (Atlas of Global Christianity). Олох атласта олар прайлары 41 000 азыра конфессияларның постарының ӱгредіглері паза нормалары пар тіп чоохталча. Анҷа кӧп христианскай религияларны кӧріп, кӧп кізі оларның хайзына киртінерге пілбинче. Аннаңар мындағ сурығ турғысчалар: «Постарын христианнар тіп аданчатхан кізілер сынап прайлары христианнар ба?»

Кӧзідім кӧр кӧреелер. Границаны кисчеткен кізі позының гражданствозын чоохтап пирерге кирек. Че аны чоохтааны ла асхынах. Ағаа хоза, ағаа ол кем полчатханын киречілепчеткен пічік кӧзіт пирерге кирек. Кӧзідімге, паспорт. Ідӧк христианинзім тіп адалғаны ла асхынах. Ағаа христианин полчатханын кӧзіт пирерге кирек. Хайди кӧзіт пирерге?

«Христианин» тіп сӧснең п. э. 44-че чылда тузалан сыхханнар. Библияны пазарында араласхан тархынҷы Лука пасча: «Антиохта Иисустың ӱгренҷілерін пастағызын на христианнар тіп адап сыхханнар» (Илҷілернің 11:26). Кӧріңер, Иисустың ӱгренҷілерін христианнар тіп адап сыхханнар. Кем Иисустың ӱгренҷізі полча? Пу сурығны пір сӧспек піди чарытча: «Иисустың ӱгренҷізі полып алар ӱчӱн, кізее чуртазын пӱкӱлее тайыға саларға кирек. Пір хати паза саңайға» (The New International Dictionary of New Testament Theology). Хайди кӧрдібіс, христианин полчатхан кізее Иисус Христостың, христианствоны тӧстеен кізінің, ӱгредіглерінҷе паза чахығларынҷа пӱкӱлее паза пір дее таласпин тудынарға кирек.

Христианнарбыс тіп аданчатхан анҷа кӧп кізілернің аразында сын христианнар пар ба? Иисустың сӧстерінің хоостыра, аның соонҷа сынап парчатханнарны ниме кӧзідерге кирек? Пу сурығларға Библия хайди нандырчатханын кӧр кӧреелер. Мының соондағы статьяларда Иисустың ӱгренҷілерін піліп аларға полысчатхан пис сағысты кӧр кӧрербіс. Ідӧк пастағы вектегі христианнар хайди тудынғаннарын кӧр кӧрербіс паза амғы туста кем Иисустың соонҷа парчатханын піліп аларбыс.