«Сірер, сӧзімні толдырчазар»

«Сірер, сӧзімні толдырзаңар, Минің сын ӱгренҷілерім поларзар. Сынны піліп алзаңар, сын киртініс сірерні пос чуртастығ кізілер ит салар» (ИОАНН 8:31, 32).

Анзы нимені таныхтапча? Иисустың «сӧзіне» прай аның ӱгредіглері кірче. Нимее ӱгредерін ағаа аның пабазы чоохтап пирген. Иисус теен: «Мині ысхан Пабам ниме тирін паза ниме чоохтанарын чахаан» (Иоанн 12:49). Позының тигірдегі Пабазына, Иегова Худайға пазырчатханда, ол теен: «Синің сӧзің Сын». Позының ӱгредіглерінде Иисус удаа Худай Сӧзіне тӧстенҷең (Иоанн 17:17; Матфей 4:4, 7, 10). Иисустың сӧзін толдырчатхан сын христианнар Худайның Сӧзін, Библияны, сынға санапчалар паза анда пазыл парған нравственнай нормалар оларға иң пӧзік устағ полчалар.

Пастағы христианнар хайди тудынғаннар? Павел илҷі, Библияда иң кӧп кинде пас салған кізі, Библияны, Иисусох чіли, улуғлаан. Ол пасхан: «Прай Ызых Пічиине Худай тын кирче» (2 Тимофейге 3:16). Ӧмеде кізілер ӱгредерге турғызылған иреннер Худайның Сӧзін пик тудынарға кирек полғаннар (Титке 1:7, 9). Пастағы христианнарға чӧп пирілген: «Піреезі сірерні хыйға чоохтарынаң, алаахтырыстың тик сӧстерінең, кізілер кибірінең, тилекейні пӱдірчеткен кӱстерінең аптап албазын. Анзы Христостаң нимес» (Колосстағыларға 2:8).

Пӱӱн кем іди тудынча? «Католическай тигірибнің Катехизизінде» 1965 чылда Ватикан алған «Худайның Азых чооғының догматическай конституциязындағы» сӧстер пазылчалар: «Азых чоохты тарадарға паза чарыда чоохтирға пирілген [Католическай] Тигіриб „азылған нимелер орта полчатханын Ызых Пічіктең не нимес, пасха даа кип-чоохтардаң пілче. Аннаңар Ызых Пічікті паза кип-чоохтарны пір тиң аарлирға паза улуғлирға кирек“». «Маклинз» тіп журналда Торонтода (Канада) чуртапчатхан пір священнослужитель-ипчінің сӧстері пазыл парғаннар: «Ноға піске ікі муң чыл мының алнында чоохталған „революционнай“ сағыстарны истерге кирек? Пістің позыбыстың даа уғаа чахсы сағыстар пар. Че олар Иисуссар паза Ызых Пічіксер сыбыра хайбағынчатханыбыс ӱчӱн тузазы чох пол парчалар».

Иегованың киречілерінеңер «Наа католическай энциклопедияда» чоохталча: «Олар постарының киртіністерін паза тудыныстарын Библияда ла тӧстепчелер». Канадада ӱр ниместе пір ирен аннаң чоох пастаан Иегованың киречізі ипчіні тохтадыбысхан. Аның Библиязынзар кӧзідіп, ол теен: «Сірер кемзер сірернің визитнай карточкаңар хоостыра піліп алдым».