«Тигір хан-чирінеңер Чахсы Хабарны... чоохтирлар»
«Тигір хан-чирінеңер Чахсы Хабарны... чоохтирлар»
«Тигір хан-чирінеңер Чахсы Хабарны прай чир ӱстӱндегі чоннар иссіннер тіп, чоохтирлар. Анаң на тӱгенҷізі килер» (МАТФЕЙ 24:14).
Анзы нимені таныхтапча? Евангелист Лука пасхан: «Иисус, саарларҷа паза аалларҷа Худай хан-ӱлгӱзінеңер Чахсы Хабарны искір чӧрген» (Лука 8:1). Иисус, тізең, теен: «Мин Худай хан-ӱлгӱзінеңер Чахсы Хабарны пасха даа саарларда искірерге кирекпін. Аның ӱчӱн Худай Мині ысхан нооза» (Лука 4:43). Ідӧк, ол позының ӱгренҷілерін саарларда паза аалларда чахсы хабарны искірерге ысхан. Соонаң ол оларға чоохтаан: «Чирнің хыринда даа Минің киречілерім поларзар» (Илҷілернің 1:8; Лука 10:1).
Пастағы христианнар хайди тудынғаннар? Иисустың ӱгренҷілері ол пирген чахығны, соона салдырбин, толдыр сыхханнар. «Полған на кӱн олар, храмда даа, тураларда даа кізілерні ӱгредерін тохтатпин, Мессий Иисус полчатханнаңар Чахсы Хабарны искір турғаннар» (Илҷілернің 5:42). Чахсы хабарны ӧнетін турғызылған кізілер ле нимес, че прай христианнар искіргеннер. Август Неандер тархынҷы пасхан: «Цельс, христианстводаң тоғыр пасхан пастағы кізі, чахсы хабарны прай кӱс салып, тӱк сохчаң, маймах тікчең, тууп истеҷең — саңай оңдай-пазы чох — кізілер искірчеткеніне кӱлген». Жан Бернарди «Тигірибнің пастағы вектері» тіп киндеде пасхан: «Христианнар прай чирлерзер парарға паза прайзынаң чоохтазарға кирек полғаннар: улуғ чолларда, саарларда, площадьтарда паза тураларда. Оларға хынзалар даа, хынмазалар даа. [...] ...Чир хырина читіре» (Les Premiers Siècles de L’Église).
Пӱӱн кем іди тудынча? Дейвид Уотсон, англиканскай абыс, пасча: «Тигіриб чахсы хабарны искіреріне паза ӱгредеріне чахсы хайығ салбинча. Аннаңар даа чон духовнай киректерге тартылбинча». «Ноға католиктер тигірибдең сыхчалар?» тіп киндезінде Хосе Луис Перес Гвадалупе евангелисттернің, адвентисттернің паза пасха даа религияларның киректерінеңер чоохтапчатханда, таныхтапча: «Олар ибдең ибге чӧрбинчелер». Иегованың киречілерінеңер, тізең, ол пасча: «Олар Худай сӧзін сыбыра ибдең ибге искір чӧрчелер» (¿Por qué se van los Católicos?).
США-ның Ӧркі чарғызының иң аарлығ пӧгіннерін чарытчатхан журналда Джонатан Терлинің хынығ паза орта кӧрізі пазылча: «Иегованың киречілерінеңер чоохтазох, кӧбізінің сағызына пістің ибібіссер килістіре нимес туста килчеткен кізілер кірче. Иегованың киречілері, кізілерні постарының киртіністеріне тартып аларға ла тіп, ибдең ибге Худай сӧзін искір чӧрбинчелер. Худай сӧзін искіргені оларның киртіністерінің ӧӧні» (Cato Supreme Court Review, 2001-2002).
[9 страницада рамка]
Танығлар кемге кӧзітчелер?
Пу статьяларда Библияның сын христианнарға кӧзітчеткен танығларын ӱзӱрібіскен соонда, кемге олар кӧзітчеткенін чоохтап поларзар ба? Христианнарбыс тіп аданчатхан онар муң конфессиялар пар ползалар даа, Иисус позының ӱгренҷілеріне ниме чоохтаанын ундутпаңар. Ол теен: «Мині „Хан-пигім! Хан-пигім!“ тіпчеткен полған на кізі нимес, че Тигірдегі Пабамның кӧңнін не толдырчатхан кізі Тигір хан-чирінзер кіріп алар» (Матфей 7:21). Аның Пабазының кӧңнін толдырчатханнарны алай сын христианнарның танығларына килісчеткеннерні таап алып, оларға хозылып алзар, Худайның Хан-ӱлгӱзінің устаанында пирілер мӧгі алғастарны аларзар. Худайның Хан-ӱлгӱзінеңер паза ол пирер алғастардаңар кӧп арах піліп алар ӱчӱн, пу публикацияны сірерге пирген Иегованың киречілерінзер айланыңар (Лука 4:43).