«Удур-тӧдір хынызыңар»

«Сірерге наа чахығ пирчем: удур-тӧдір хынызыңар. Мин сірерге хынған чіли, сірер дее ідӧк удур-тӧдір хынызыңар. Удур-тӧдір хыныссаңар, Минің ӱгренҷілерім полчатханнарыңны прайзы пілер» (ИОАНН 13:34, 35).

Анзы нимені таныхтапча? Христос позының ӱгренҷілеріне, ол оларға хайди хынған, ідӧк удур-тӧдір хынызарға чахаан. Иисус ӱгренҷілеріне хайди хынған? Ол туста ипчілерге паза пасха чоннарның кізілеріне хомай хайҷаңнар. Андағ даа полза, Иисус ипчілерге паза пасха чоннарның кізілеріне хынҷаң (Иоанн 4:7—10). Пасхаларына хынған ӱчӱн, Иисус тузына, кӱзіне айабаан паза тынанмин даа, пасхаларына полысчаң (Марк 6:30 — 34). Ідӧк Иисус позының хынызын илбек оңдайнаң кӧзіт пирген: «Мин чахсы хадарҷыбын. Чахсы хадарҷы хойларының ӱчӱн позының чуртазын пир салча» (Иоанн 10:11).

Пастағы христианнар хайди тудынғаннар? Пастағы вектегі христианнар удур-тӧдір харындас-пиҷелер тіп адасчаңнар (Филимонға 1, 2). Олар «иудей бе, иудей нимес пе, пасхазы чоғыл. Хан Худай прайзының пір» тіп санаҷаңнар, аннаңар прай чоннарға пір тиң хайҷаңнар (Римдегілерге 10:11, 12). Пятидесятница соонда п. э. 33 чылда Иерусалимдегі ӱгренҷілер «чуртаан чирлерін паза ниме-нооларын садып, прайзына хызыхчатхан сині хоостыра ӱлееннер». Ноға? Наа ла кіреске тӱскеннер, Иерусалимде халып, «тӧреміл илҷілернің ӱгредіглерінде полар ӱчӱн» (Илҷілернің 2:41—45). Христостың ӱгренҷілерін іди тудынарға ниме кӧӧктірген? Илҷілер ӱреен соонда 200-че чыл пазынаң Тертуллиан кізілер христианнардаңар ниме чоохтапчатханнарын пас салған: «Хайди олар удур-тӧдір хынысчалар... чуртастарын даа удур-тӧдір пирібізерге тимделер».

Пӱӱн кем іди тудынча? 1837 чылда сығарылған «Римнің империязы сайбалғаннаңар паза иңзерілгеннеңер тархын» тіп киндеде постарын христианнар аданчатхан кізілер «Худайға киртінминчеткен кізілернің хыринда, удур-тӧдір хай-хай кӧп ӱрег ағылғаннар» тіп чоохталча. Ӱр ниместе США-да иртірілген істезіг религиознай кізілер, оларның кӧбізі постарын христианнар тіп аданчатхан кізілер, пасха расадағыларға хырт кӧрчеткеннерін кӧзіт пирген. Кӧбізін пір хазнадағы тигірибдегілернің пасха хазнаның тигірибдегі кізілернің аразында палғалыс чоғыл. Аннаңар пір киртіністіглер полызығда кирексінчетселер, олар удур-тӧдір полыс полбинчалар алай полызарға даа хынминчалар.

2004 чылда Флоридада 2 айға 4 ураган полғанда, саайларға кір парғаннарға полысчатхан комитеттің пастығы комитет пирген полызығнаң организациялар хайди тузаланчатханнарын сыныхтаан. Пір дее организация, Иегованың киречілері чіли, пір чӧптіг тудынминча тіп таныхтаан. Иегованың киречілеріне прай кирек нимелер пирерлер тіп чоохтаан. Аның алнында 1997 чылда, Иегованың киречілері Демократическай Республика Конгозар харындас-пиҷелеріне паза ӱреге кір парған пасха даа кізілерге имнер, чиис, кип-азах ағыл килгеннер. Андада Европадағы Иегованың киречілері пір миллионҷа долларға чағын прай кирек нимелер ыс пиргеннер.