Библия чуртасты алыстырча

НОҒА пір ирен хаҷан-да артыс салған религиязар нандыра айланған? Хайди чиит оол позына уғаа чахсы паба таап алған? Пу кізілер постарынаңар ниме чоохтапчатханын хығырып алыңар.

«Мин Иеговазар айланарға сағынып алғам» (ЭЛИ КАЛИЛ).

ТӦРЕЕН ЧЫЛЫ: 1976

ТӦРЕЕН ХАЗНА: КИПР

ХАҶАН-ДА: ІҶЕ-ПАБАЗЫНЫҢ РЕЛИГИЯЗЫН АРТЫС САЛҒАН

МЫНЫҢ АЛНЫНДА. Мин Кипрде тӧреем, че Австралияда ӧскем. Минің іҷе-пабам Иегованың киречілері полғаннар паза мині Иеговаа паза аның Сӧзіне, Библияа, хынзын тіп прай кӱстерін салғаннар. Че саарбах тузында мин оларға тоғырланыбысхам. Хараа, ибдең тизіп, пасха саарбахтарнаң тоғасчаң полғам. Піс машиналар сӱр парыбысчаң полғабыс паза нинҷе-нинҷе хати хомай киректерге кір парҷаң полғабыс.

Пастап, іҷе-пабамны ачырғандырбас ӱчӱн, ол киректерні чазынып итчең полғам. Че пола-пола оларны ачырғандырарға хорыхпин сыххам. Мин миннең улуғ паза Иеговаа хынминчатхан кізілердең нанҷылас сыххам. Олар мині хомай саринзар тартханнар. Анаң мин іҷе-пабама сірернің киртіністеріңнең палғалыстығ поларға хынминчам теем. Олар мағаа тыстаныснаң полысханнар, че мин оларның полызиин хыйа иткем. Аннаңар оларның чӱректері тың ағырған.

Мин ибдең парыбызып, наркотиктернең айғас сыххам. Марихуананы, кӧп ӧскіріп алып, сатчаң полғам. Сайбах чуртас апар сыххам паза хараа тоғынчатхан клубтарда уғаа кӧп тус иртіргем. Ағаа хоза, уғаа ӧкпеленҷік пол парғам. Пірее кізі пірее ниме тізӧк, мин чабаллан сыхчаң полғам. Кізілерге удаа аахтаҷам паза тудысха сегірҷең полғам. Кӧні чоохтаза, іҷе-пабам ӱгреткен нимелердең саңай тоғыр тудынғам.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН. Мин пабазын кічігдӧк чідір салған наркоманнаң нанҷылас сыххам. Піс удаа орай харааға читіре чоохтасчаң полғабыс. Пірсінде ол пабама уғаа тың сағынчам тіп чоохтап пирген. Тіріліске ізеніс парын мин кічігдең сығара пілгем, аннаңар Иисус ӱреен кізілерні тірілдіргеннеңер паза полар туста тірілдірерінеңер мин ағаа чоохтаам (Иоанн 5:28, 29). Мин ағаа тіҷең полғам: «Сағын на кӧр: син пабаңнаң тоғазарзың. Піс прайзыбыс чирдегі райда мӧгі чуртап поларбыс». Пу сағыстар минің нанҷымның чӱреен тибіреткеннер.

Пірееде нанҷым халғанҷы кӱннердеңер паза Троицадаңар чоох апар сыхчаң. Андада мин, аның Библиязын алып алып, Иегова Худайдаңар, Иисустаңар паза халғанҷы кӱннердеңер сынны кӧзітчеткен стихтарны кӧзітчең полғам (Иоанн 14:28; 2 Тимофейге 3:1—5). Нинҷе кӧп ағаа Иеговадаңар чоохтаам, анҷох кӧп позым Аннаңар сағынғам.

Хаҷан-да іҷемнең пабам сал салған Библияның сыны минің чӱреемде кӧместең ӧс сыххан. Кӧзідімге, пірееде иирде нанҷыларымнаң хада кӱлеттеп, наркотиктернең айғасчатсам, мин Иеговадаңар сағын парыбысчаң полғам. Нанҷыларымның кӧбізі Худайға хынчабыс тіҷеңнер, че киректері саңай пасха ниме кӧзітчеңнер. Оларға тӧӧй поларға хынмин, мин Иеговазар нандыра айланарға пӧгін алғам. Ниме идерге кирек полчатханын пілгені паза іди тудынғаны ікі пасха ниме. Пірее алызығларны идерге мағаа тың сидік полбаан. Кӧзідімге, мин наркотиктерні оой тастабысхам. Ідӧк иргі нанҷыларымны артыс салғам паза пір ах сағалнаң Библия ӱгрен сыххам.

Че пірее алызығларны идерге мағаа уғаа аар полған. Ӧкпеленҷік хылығымны тастабызарға мағаа уғаа сидік полған. Пірееде нинҷе-де тус ӧкпеленмин тудынҷам, че соонаң тудын полбаҷаң полғам. Анаң мағаа уғаа хомай полҷаң. Алыс полбаспын тіп пілдірҷең. Кӧңнім тӱс парып, миннең Библия ӱгренген ах сағалзар килҷең полғам. Ол хаҷан даа тыстаныстығ паза паарсах полҷаң паза минің кӧңнімні кӧдірерге сӧстер тапчаң. Пірсінде, ол ноға хол тӱзірбеске кирек полчатханнаңар «Сторожевой башнядағы» статьяны хығырарға пирген a. Анаң піс, ӧкпелен сыхсам, мағаа позымны хайди холда тударға ӱзӱріп алғабыс. Ол статьядағы чӧптер хоостыра тудынып паза Иеговаа пазырып, мин кӧместең позымны холда тударға ӱгреніп алғам. 2000 чылда, апрель айда, мин кіреске тӱзіп алып, Иегованың киречізі полып алғам. Іҷе-пабам хайди тың ӧрінген!

ЧУРТАЗЫМА ХАЙДАҒ ТУЗА АҒЫЛҒАН. Амды мин ит-сӧӧгімні наркотиктернең паза сайбах тудыныснаң кірлебинчем, аннаңар минің чӱреем амыр паза совезім арығ. Ноо даа ниме итсем, тоғынзам даа, христианскай чыылығларға чӧрзем дее алай тынанзам даа, уғаа тың ӧрінчем. Мин алнынзархы чуртасха ӧрініснең кӧрчем.

Мин Иеговаа іҷе-пабамның ӱчӱн уғаа алғыстығбын. Олар миннеңер хаҷан даа ундутпааннар. Паза мин Иисустың Иоанн 6:44-те пазыл парған сӧстерінеңер тирең сағынчам: «Мині ысхан Пабам кізіні минзер тартпаза, пірдеезі минзер кил полбас». Иегова мині позынзар тартханнаң сылтаанда, мин андар айланып алғам. Анзына уғаа тың ӧрінчем.

«Мин пабама тың сағынғам» (МАРКО АНТОНИО АЛЬВАРЕС СОТО).

ТӦРЕЕН ЧЫЛЫ: 1977

ТӦРЕЕН ХАЗНА: ЧИЛИ

ХАҶАН-ДА: ДЭТ-МЕТАЛ ОЙНААН

МЫНЫҢ АЛНЫНДА. Мин уғаа сіліг Пунта-Аренас тіп саарда ӧскем. Пу саар Южнай Американың алтынзархы хырында, Магелланов проливтің хазында турча. Мағаа пис час полғанда, минің іҷе-пабам чарылыс парғаннар, аннаңар мині іҷем чалғысхан ӧскірген. Пабам мині тастабысхан тіп пілдірген, ол, тізең, мағаа уғаа тың кирек полған. Мин ағаа тың сағынҷам.

Минің іҷем Иегованың киречілерінең хада Библия ӱгренген. Іҷем мині Иегованың киречілерінің залынзар чыылығларға ал чӧрҷең. Че мин ол чыылығларға пір дее хынмаҷам паза андар парчатса, удаа сайланҷаң полғам. 13 частығда мин андар чӧрбин сыххам.

Ол туста мин музыканаң айғас сыххам. Минің музыкаа способностьтарым іле кӧрінген. 15 частығдох мині ӱлӱкӱннерде, барларда паза чабых вечеринкаларда хэви-метал паза дэт-метал ойнирға хығырҷаңнар. Мин талантливай музыканттарнаң тус иртірҷең полғам. Іди мин классическай музыкаа тартыл сыххам паза консерваториязар ӱгренерге кіріп алғам. 20 частығда, мин Сантьягозар, Чилинің столицазынзар аннаң андар ӱгренерге парыбысхам. Анда мин ідӧк хэви-метал паза дэт-метал ойнаам.

Минің чуртазымда смысл чоғыл тіп пілдірҷең. Андағ сағыстарға пастыр салбас ӱчӱн, минің группамдағы кізілернең хада изіргенҷе араға ізіп алҷаң полғам паза наркотиктернең айғасчам. Оларны мин позымның сӧбіреме санаам. Мин хара ла кип-азах кисчеңмін, узун сағал ӧскір салғам паза минің састарым пиліме читіре полған. Прай кӧрімім минің прай нимее тоғырланчатханымны кӧзіткен.

Чабал хылығымның ӱчӱн хатап-хатап тудысчаң полғам паза полицияның холына кір парҷам. Пірсінде, мин изіргенҷе араға ізініп алып, мағаа паза минің нанҷыларыма харығ полған наркотиктер сатчатхан кізілерге тудысха кірібіскем. Олар мині тың сох салғаннар паза наағымны сыы сабысханнар.

Че минің чӱреемні чағын кізілерім иң тың ағыртханнар. Минің хызым нинҷе-де чыл минің иң чағын нанҷымнаң хада оралыс чӧртір. Пасха нанҷыларым, тізең, аны миннең чазырҷаң полтырлар. Аны ис салғамда, чуртирым килбин сыххан.

Мин Пунта-Аренассар айланғам, анда музыка ӱгретчізі полғам паза виолончелист полып тоғынғам. Мин хэви-метал паза дэт-метал группаларынаң хада ойнаам паза оларнаң хада пазынғам. Сіліг хыснаң, Суссаннаң, танызып алғам, піс аннаң хада чуртап сыххабыс. Нинҷе-де тус пазынаң Суссан минің Троицаа киртінминчеткенімні піліп алған. Аның іҷезі, тізең, Троицаа киртінген. Ол миннең сурған: «Оларның хайзы сын ӱгредіг?» Мин ағаа Троица чой ӱгредіг полчатханын пілчем, че Библия хоостыра кӧзіт полбаспын тіп нандырғам. Иегованың киречілері сағаа Библия хоостыра анзын кӧзіт пирерлер теем. Анаң мин кӧп чыл итпеен ниме идібіскем: Худайға пазырып, полызығ сурынғам.

Нинҷе-де кӱн пазынаң пір ир кізі мағаа таныс пілдір парған. Мин аннаң ол Иегованың киречізі бе тіп сурғам. Ол минің кӧрімімнең хорых парған полза даа, мағаа паарсаснаң хайда паза хаҷан ӧме чыылығлары иртчеткенін чоохтап пирген. Мин ікінҷілебеем, пу кізее учурааным пазырызыма нандырығ полған. Иегованың киречілерінің залынзар киліп, позыма хайығ тартпас ӱчӱн, халғанҷы рядта одырыбысхам. Че мині кічігдӧк пілген кізілер мині танып салғаннар. Олар мині чылығ удурлааннар паза хуҷахтааннар, аннаңар мағаа уғаа истіг пол парған. Мағаа ибзер айландым тіп пілдірген. Миннең мының алнында Библия ӱгренген харындасты кӧр салып, хатап миннең ӱгренерге сурынып алғам.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН. Мин пірсінде Притчи 27:11 хығырып алғам. Анда чоохталча: «Оолғым, хыйға пол паза чӱреемні ӧріндір». Хайди олаңай ла кізі Тилекейнің илбек Чайаачызын ӧріндір полар? Анзына тың хайхаам! Мағаа чуртас тооза пабам читпеен. Анаң кинетін піліп алғам: Иегова минің Пабам!

Мин тигірдегі Пабамны паза ачырғандырбасха, аның кӧңнін толдырарға хынғам. Че мин кӧп чыллар наркотиктернің паза арағаның хулы полғам. Матфей 6:24-те, пазылған Иисустың сӧстері ниме таныхтапчатханын піліп алғам: «Пір дее кізі ікі пигнің хулы пол полбас». 1 Коринфтегілерге 15:33-гі принцип мағаа хомай хылыхтарымнаң харбазарға полыс пирген. Мин піліп алғам: иргі нанҷыларымны артыс салбазам, хомай киректерімні тобыр полбаспын. Библиядағы чӧп мағаа пілдістіг полған: мині харылдырчатхан нимелердең позып алар ӱчӱн, мағаа тідімніг поларға кирек (Матфей 5:30).

Мин музыкаа уғаа тың хынғам, аннаңар мағаа хэви-металны артыс саларға иң сидік полған. Че ӧмемдегі нанҷыларымның полызиинаң сылтаанда, мин пола-пола аны тастабысхам. Мин изіргенҷе араға іспин сыххам, наркотиктерні тастабысхам, састарымны хырығыбысхам, сағалымны хырыбысхам, хара кип-азахтардаң пасха кип-азахтар кис сыххам. Суссанға сазымны хырығыбызарға хынчам тіп чоохтаамда, ағаа хынығ пілдір парған. Ол теен: «Синнең хада парып, ол Залда ниме итчеткеннеріңні кӧр кӧримдек!» Анда кӧрген нимелер аның кӧңніне кірген, аннаңар ол ӱр ниместең Библия ӱгрен сыххан. Соонаң піс Суссаннаң хоных хон салғабыс. 2008 чылда кіреске тӱзіп алып, Иегованың киречілері пол парғабыс. Піс іҷемнең хада Иеговаа нымысчыланчабыс. Анзына уғаа тың ӧрінчебіс!

ЧУРТАЗЫМА ХАЙДАҒ ТУЗА АҒЫЛҒАН. Мин ам чой часка паза киртістіг нимес нанҷылар пирчеткен чир-чалбахтың нанҷызы нимеспін. Ам даа музыкаа хынчам, че полар-полбас музыка паза ойнабинчам. Сӧбіредегілерге паза пасха даа кізілерге, уламох чииттерге, полыс пирерге кӱстеніп, опыдымнаң ӱлесчем. Олар піліп алзыннар тіп хынчам: пу чир-чалбах пирчеткен нимелернің кӧбізі тастынаң на сіліг кӧрінче, сынында ол похсах ла (Филипптегілерге 3:8).

Христианскай ӧмеде амыр чуртас паза хыныс устапча. Анда мин ізестіг нанҷылар таап алғам. Иегованаң чағын танызып алғамда, ол минің Пабам пол парған. Анзы иң аарлығ!

[Сноска]

[Вставка, 13-ҷі страница]

«Иегова мині позынзар тартханнаң сылтаанда, мин андар айланып алғам. Анзына уғаа тың ӧрінчем»