Библия чуртасты алыстырча

ШОТЛАНДИЯДА тӧреен ирен маңнаныстығ бизнестең артых ӧріністі нимедең алған? Бразилиядағы иренге сайбах чуртасты артыс саларға паза крэк тартпиныбызарға ниме кӱс пирген? Словениядағы чиит оолға арағаны тастабызарға ниме полыс пирген? Кӧріңер олар постарынаңар ниме чоохтапчалар.

«Чуртазым маңнаныстығ тіп санаам» (ДЖОН РИКЕТТС).

ТӦРЕЕН ЧЫЛЫ: 1958

ТӦРЕЕН ХАЗНА: ШОТЛАНДИЯ

ХАҶАН-ДА: МАҢНАНЫСТЫҒ БИЗНЕСМЕН

МЫНЫҢ АЛНЫНДА. Мин пай сӧбіреде ӧскем. Пабам Британскай армияның офицері полған, аннаңар піс удаа кӧс чӧргебіс. Шотландиядаң пасха піс Англияда, Германияда, Кенияда, Малайзияда, Ирландияда паза Кипрде чуртаабыс. Сигіс час толғанда, мин Шотландияда школа-интернатта ӱгрен сыххам. Соонаң Кембриджскай университетте ӱгреніп алғам.

20 частығда мин нефтяной бизнесте тоғын сыххам. Анда мин 8 чыл тоғынғам. Пастап мин Южнай Америкада, соонаң Африкада, анаң Западнай Австралияда тоғынғам. Австралиязар кӧс парыбысхамда, мин инвестиционнай фирма тӧстеп алғам, соонаң аны садыбысхам.

Аны садыбысхамда, мағаа 40 час полған. Анаң мин путешествовать пол сыххам. Прай чир ибіре пар килгем. Паза мотоциклнең прай Австралияҷа ікі хати пар килгем. Минің чуртазым маңнаныстығ тіп санаам.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН. Бизнезімні садыбызар алнындох, чуртазым прай чахсы киліс парған ӱчӱн, Худайға алғызымны читір пирерге хынғам, че пілбеем хайди. Англиканскай тигірибзер чӧр сыххам (кічіг полғамда, піс андар чӧргебіс). Соонаң мормоннарзар чӧргем. Че оларның Библияны улуғлабинчатханнарын кӧр салып, андар чӧрбинібіскем.

Пірсінде минзер Иегованың киречілері килгеннер. Оларның ӱгредіглері Библияда тӧстелчеткені, олар пастағызын килгендӧк, кӧрін парған. Пірсінде олар мағаа 1 Тимофейге 2:3, 4 хығыр пиргеннер. Анда піди пазылча: «Ол прай кізілерні арачыланзыннар паза сынны [хап-орта, НТ] пілеріне читсіннер тіп сағынча». Иегованың киречілері олаңай ла пілістер нимес, че Библияда тӧстелген хап-орта пілістер аарлығ тіп чоохтааннар. Анзы минің кӧңніме уғаа тың кірген.

Иегованың киречілерінең Библия ӱгреніп, мин андағ хап-орта пілістер алып алғам. Кӧзідімге, Худай паза Иисус Христос Троицаның хайдағ-да чардығы нимес, че ікі пасха личность полчатханын піліп алғам (Иоанн 14:28; 1 Коринфтегілерге 11:3). Пу олаңай сынны піліп алғаныма уғаа тың ӧрінгем. Ідӧк піл полбас нимені піліп аларға ӱр тус кӱстенгеніме хайди ачырғанғам!

Ӱр ниместең мин Иегованың киречілерінің чыылығларына чӧр сыххам. Олар паарсах кізілер полғаннар паза пӧзік нравственнай нормаларҷа чуртааннар. Анзына мин хайхаам. Олар мағаа ах-арығ кізілер тіп пілдіргеннер. Оларның сын хыныстарын кӧріп, мин сын религияны таап алғанымда ікінҷілебеем (Иоанн 13:35).

ЧУРТАЗЫМА ХАЙДАҒ ТУЗА АҒЫЛҒАН. Кіреске тӱскен соонда, мин уғаа чахсы христианканаң, Диананаң, танызып алғам. Ол кічігдең ала Иегованың киречізі полған паза аның уғаа чахсы качестволар полғаннар. Соонаң піс хоных хон салғабыс. Диана мағаа сын нанҷы пол парған паза мағаа сыбыра хабасча. Иегова мині аннаң пастыра алғастаан.

Піс Диананаң искірігҷілер читпинчеткен чирзер парыбызарға сағын сыххабыс. Аннаңар 2010 чылда Центральнай Америказар, Белизсер, кӧс парыбысхабыс. Мында Худайға паза библейскай сыннарға хынчатхан кізілерге полысчабыс.

Худайдаңар паза аның Сӧзінеңер, Библиядаңар, сынны піліп алғамда, мағаа уғаа истіг пол парған. Мин Худай сӧзін искірерінде кӧп тус иртірчем, аннаңар кӧп кізее Худай Сӧзінең танызып аларға полыс пиргем. Библия минің чуртазымны алыстырыбысхан, ам Библия пасха кізілернің чуртастарын алыстырчатханын кӧрчем. Анзы уғаа кӧп ӧрініс ағылча. Хаҷан-да часкалығ чуртазымның ӱчӱн Худайға алғызымны хайди читірерге пілбеем, ам анзын идерге иң чахсы оңдай таап алғам.

«Олар миннең паарсаснаң тудынғаннар» (МАУРИСИУ АРАУЖУ).

ТӦРЕЕН ЧЫЛЫ: 1967

ТӦРЕЕН ХАЗНА: БРАЗИЛИЯ

ХАҶАН-ДА: САЙБАХ ЧУРТАС АПАРҒАН

МЫНЫҢ АЛНЫНДА. Мин Сан-Паулу штаттағы Аваре тіп кічиҷек саарда ӧскем. Анда кӧбізін олаңай тоғысчылар чуртапчалар.

Іҷем миннең чоон чӧргенде, пабам ӱреп парған. Кічігде, іҷем ибде чох туста, мин аның кип-азахтарын кис салҷаң полғам. Анаң мин, ипчі чіли, тудын сыххам. Аннаңар кізілер мині гомосексуалист тіп санап сыхханнар. Пола-пола мин оолағастарнаң паза иреннернең оралыс сыххам.

20 час тузына мин оралысчаң кізілерні ле тілеп чӧрҷең полғам. Мағаа пасхазы чох полған — ир дее, ипчі дее кізі ползын. Мин оларны барларда, хараа тоғынчатхан клубтарда, тигіриблерде дее кӧр чӧрҷең полғам. Карнаваллар тузында мин, ипчі чіли, тонан салып, самбо танцевать полҷаң полғам. Мин уғаа саблығ пол парғам.

Минің нанҷыларымның аразында гомосексуалисттер, проституткалар паза наркоманнар полғаннар. Оларның піреелері мағаа крэк тартарға пирҷеңнер. Ӱр ниместең мин ағаа саңай тартыл парғам. Пірееде піс аны хараа тооза тартчаң полғабыс. Алай мин чалғысхан кӱн тооза крэк тартчаң полғам. Мин уғаа тың тӱреп парғам, аннаңар аның СПИД тіп чоохтас сыхханнар.

 ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН. Олох тустарда мин Иегованың киречілеріне тоғас парғам. Олар миннең паарсаснаң тудынғаннар. Пірсінде олар мағаа Римдегілерге 10:13-ті хығыр пиргеннер. Анда чоохталча: «Хан Худайның [Иегованың, НТ] адын хығыртхан ноо даа кізі арачыланып алар». Пу библейскай стих сылтаанда, Худайзар, аның адын адап, айланарға кирек полчатханын піліп алғам. Кӧп хати, хараа тооза крэк тартхан соонда, кӧзенегім азып алып, тигірзер кӧріп, ылғап ала, алданып, Иеговадаң полызығ сурынғам.

Мин іҷемнің ӱчӱн сағыссыраам. Ол, наркотиктер минің чуртазымны хайди ардатчатханын кӧріп, тың пичелленген. Аннаңар мин наркотиктерні тастабызарға пӧгін алғам. Ӱр ниместең мин Иегованың киречілерінең Библия ӱгрен сыххам. Олар Библия ӱгренгені мағаа наркотиктерні тастабызарға полыс пирер тіп чоохтааннар. Сах іди пол парған!

Библия ӱгреніп, мин піліп алғам: мағаа чуртазымны алыстырарға кирек. Нинҷе позымны пілінчем, прай ол тустарда мин гомосексуалист полғам. Аннаңар ол киректерні артыс саларға иң аар полған. Мин иргі нанҷыларымны артыс салғам, барларзар паза хараа тоғынчатхан клубтарзар чӧрбин сыххам. Анзы мағаа чуртазымны алыстырыбызарға полыс пирген.

Кирек алызығларны идерге аар полған полза даа, мин пілгем: Иегова миннеңер сағыссырапча паза мағаа нименең харбазарға килісчеткенін пілче (1 Иоанның 3:19, 20). Пу сағыс мині часхарған. 2002 чылда гомосексуальнай чуртазымны саңай артыс салғам, анаң кіреске тӱзіп алып, Иегованың киречізі полып алғам.

ЧУРТАЗЫМА ХАЙДАҒ ТУЗА АҒЫЛҒАН. Минің іди алыс парғанымны кӧр салып, іҷем позы даа Библияны ӱгрен сыххан. Ачырғастығ, соонаң аның инсульт пол парған. Андағ даа полза, Иеговаа паза Библиядағы сынға хынысты ол аннаң андар ӧскірген.

Халғанҷы сигіс чыл мин кӧп тус, кізілерні Библиянаң таныстырып, иртірчем. Чоохтирға кирек, пірееде минің пазыма хомай сағыстар кір сыхчалар, че мин ол сағыстарға маң пирбинчем. Оларға пирінминчеткенім Иегованың кӧңніне кірче. Анзын пілгені мағаа кӱс пирче.

Иеговаа чағдап паза аның кӧңніне кірчеткен чуртас апарып, мин позымны улуғлап сыххам. Ам мин часкалығ кізібін.

«Нанҷым мині тӱбі чох сабан тіп адаан» (ЛУКА ШУЦ).

ТӦРЕЕН ЧЫЛЫ: 1975

ТӦРЕЕН ХАЗНА: СЛОВЕНИЯ

ХАҶАН-ДА: ІЗЕЕЧІ КІЗІ ПОЛҒАН

МЫНЫҢ АЛНЫНДА. Мин Словенияның столицазында, Люблянада, тӧреем. Мағаа тӧрт час полғанда, пабам позына хол салыныбысхан. Ол тустаң сығара пістің чуртазыбыс саңай алыс парған. Іҷеме, мині паза минің улуғ харындазымны азырир ӱчӱн, уғаа аар тоғынарға киліскен.

Мағаа 15 час тол парғанда, мин ууҷамзар чуртирға парыбысхам. Анда чуртирға мағаа истіг полған. Анда минің нанҷылар кӧп полған. Паза мин ибдегізінең хыринда пос арах полғам. 16 частығда мин тынанҷаң кӱннерде араға ізініп аларға кӧнік парған кізілернең нанҷылас сыххам. Састарымны узун ӧскіріп алғам, кізілернің кӧңніне кірбес иде тонан сыххам, соонаң тамкы тарт сыххам.

Мин аймах-пасха наркотиктернең таныс кӧргем, че оларның пірдеезі арағаа турбинча тіп санаҷаң полғам. Пастап мин хызыл арағаны нинҷе-де стакан ісчең полғам, соонаң бутылкадаң даа кӧп іс сыххам. Нинҷе кӧп ізібіскенімні кізілерге кӧзітпеске ӱгреніп алғам. Удаа минің араға іскенімні араға ла чыстанчатханы кӧзітчең. Че андада даа пірдеезі минің нинҷе-де литр хызыл арағаны алай пивоны, ах арағанаң аралап, ізібіскенімні сизінмеҷең.

Хараазын, дискотекаларда, удаа мин нанҷыларымнаң ікі хати кӧп араға ізібісчең полғам. Че андағ даа полза, дискотека соонда оларға ибзер чидіп аларға полыс пирҷең полғам. Пірсінде нанҷым мині тӱбі чох сабан тіп адапчатханын ис салғам. Словенскай тілде пасха кізілердең кӧп ізібісчеткен кізілерні іди сӧклепчелер. Анзына мин уғаа хомзын парғам.

Чуртазым хайдар парча тіп сағын сыххам. Пір дее нимее чарабаан кізізім тіп пілдір сыххан. Тик ле чуртапчам тіп пілдірген.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН. Ол тустарда миннең хада ӱгренген оолның алыс парғанын сизін салғам: аның хылығы нымзах арах пол парған. Ноға іди алыс парғанын піліп алар ӱчӱн, мин аны кафезер хығырып алғам. Чоох аразында ол Иегованың киречілерінең хада Библия ӱгренчем теен. Анда алған пілістерінең миннең ӱлескен. Олған тузымда миннең религиядаңар пір дее кізі чоохтаспаан, аннаңар ол чоохтаан нимелерні испеен полғам. Анаң мин Иегованың киречілерінің чыылығларына чӧр сыххам паза оларнаң хада Библия ӱгрен сыххам.

Библия ӱгреніп, мин кӧп хайхастығ сыннарны піліп алғам. Кӧзідімге, Ызых Пічік хоостыра, піс «тӱгенҷі кӱннерде» чуртапчабыс (2 Тимофейге 3:1—5). Ағаа хоза, ӱр ниместең Худай чабал кізілерні хырыбызарын, чахсы кізілерге, тізең, райда мӧгі чуртас пирерін піліп алғам (Псалом 37:29). Минің дее андағ чахсы ізеніс ползын тіп, чуртазымны алыстырыбызарға сағыныбысхам.

Мин нанҷыларымнаң Библиядаң алған пілістернең ӱлес сыххам, че оларның кӧбізі мағаа кӱл сыхханнар. Анзы мағаа олар сын нанҷылар полбааннарын кӧзіт пирген. Мин піліп алғам: ол кізілернең чағын нанҷыласхан ӱчӱн мин арағаа тартыл парғам. Олар пазох ізініп аларға тіп, тынанҷаң кӱннерні неделя тооза чидікпин сағыҷаңнар.

Мин, оларны артыс салып, Иегованың киречілерінең нанҷылас сыххам. Пу кізілер Худайға сынап хынғаннар паза аның пӧзік нравственнай нормаларынҷа чуртааннар. Олар мағаа сынап полыс пиргеннер. Пола-пола мин араға тастабысхам.

ЧУРТАЗЫМА ХАЙДАҒ ТУЗА АҒЫЛҒАН. Ам мағаа, ӧрінер ӱчӱн, араға ізерге кирек чоғыл. Аннаңар мин Иеговаа уғаа тың алғыстығбын. Мының алнындағох оңдайнаң чуртаан ползам, ам хайда поларҷыхсым пілбиндеечем. Ікінҷілес чоғыл, ам мин хай-хай чахсы чуртапчам.

Мин Словениядағы Иегованың киречілерінің филиалында читі чыл нымысчылан парим. Худайнаң палғалыс паза ағаа нымысчыланғаны чуртазыма смысл пирген.