ЧИРДЕ полғанда, Иисус Пабазының качестволарын паза сағыстарын хап-орта кӧзіткен. Ол теен: «Мин Позым алынҷа пір дее ниме итпинчем, Пабам ӱгреткен хоостыра чоохтапчам... Мин сыбыра прай нимені Аның кӧңнінҷе итчем» (Иоанн 8:28, 29; Колосстағыларға 1:15). Иисус ипчілерге хайди хайғанын кӧріп алзабыс, Худай оларға хайди хайчатханын паза ниме олардаң сағыпчатханын піліп аларбыс.

Учёнайлар чахсы хабарны істескенде, Иисустың ипчілерге хайғаны ол тусха саңай пасха полған тіпчелер. Ноға іди тирге чарир паза Иисустың ӱгредіглері амғы туста ипчілерге чуртастарын ниик арах итчелер бе?

Иисус ипчілерні сексуальнай кирексіністер толдырарға ла киректер тіп санабаан. Иудейскай религиознай устағҷылар ир кізінің ипчі кізінең чоохтасханы хыҷаланысха ла ағылча тіп санааннар. Аннаңар ипчі кізее тасхар ир кізінең чоохтазарға алай, пазын чаппин, ибдең сығарға чарадылбаҷаң. Иисус ипчілерге ир кізілернең чоохтазарға чарабас тібеен. Аның орнына ир кізілерге хыҷаланыстарын холда тударға паза ипчі кізілерні улуғлирға кирек теен (Матфей 5:28).

Иисус теен: «Ир кізі, ипчізінең чарылызып, пасха ипчіні ал салза, ол анынаң оралысханға килісче» (Марк 10:11, 12). Ол туста раввиннер ир кізее ипчізінең хайдағ ла полза сылтағнаң чарылыс парарға чарадылча тіп ӱгретчеңнер. Пу сӧстернең Иисус ол ӱгредіг саба полчатханын кӧзіт пирген (Матфей 19:3, 9). Раввиннернің ӱгредіглері хоостыра, ир кізі пасха кізінең чӧрзе, оралысханға саналбаҷаң. Ипчі кізі ле оралысхан тіп саналҷаң. Библияға пір комментарийде чоохталча: «Иисус, ир кізілер паза ипчі кізілер пір нравственнай нормаларҷа тудынарға киректер тіп ӱгредіп, ипчілерні кізілернің хараанда кӧдірібіскен паза оларны улуғлирға кирек полчатханын кӧзіт пирген».

Иисус Христостың ӱгредии пӱӱнгі кізілерге хайди теелче. Иегованың киречілерінің чыылығларында ипчілер оларға хыҷаланып кӧрерлер паза оларны нимее салбин тудынарлар тіп хорыхпинчалар. Ноға? Ӧмедегі харындастар «инейлерні, іҷелерні чіли, ипчілерні, пиҷелерні чіли, арығ сағыста тудып» улуғлапчалар (1 Тимофейге 5:2).

Иисус ипчілерні ӱгреткен. Раввиннер ипчілерні ӱгредерге чарабас тіп ӱгретчеңнер. Иисус, тізең, оларны ӱгретчең паза постарының сағыстарын чоохтирға кӧӧктірҷең. Иисус, Мария ӱгренерге хынчатханын махтаанда, ипчі кізі чиис ле тимнирге чарас кізі тіп сағынминчатханын кӧзіт пирген (Лука 10:38—42). Лазарь ӱреп парғанда, Марфа Иисусха хайди нандырғаны аның Иисустаң ӱгренгенін кӧзітче (Иоанн 11:21—27).

Иисус ипчілернің кирексіністерін аарлыға санаан. Ол туста ипчілер часканы оол таап аларынаң палғалыстырҷаңнар. Ол пала ухаанҷы пол парза, уламох часкалығ пол парарбыс тіп сағынҷаңнар. Аннаңар пір ипчі: «Хайдағ часкалығ Сині позында ал чӧрген паза имҷектеен ипчі!» — тіп хысхырыбысханда, Иисус часка сынында нименең палғалыстығ полчатханын кӧзіт пирген (Лука 11:27, 28). Иисус часканы пала тӧрідерінең не нимес, че духовнай кирексіністерні толдырғанынаң палғалыстырған (Иоанн 8:32).

Иисус Христостың ӱгредии пӱӱнгі кізілерге хайди теелче. Иегованың киречілерінің чыылығларында ипчі кізілерге нандырарға чарадылча. Духовнай саринаң пызығ пиҷелер сӧстерінең паза киректерінең чахсаа ӱгретчелер, аннаңар ӧмеде ӱгретчеткен харындастар оларны аарлыға санапчалар (Титке 2:3). Ідӧк ипчілер Худайның Хан-ӱлгӱзінеңер чахсы хабарны искірчелер (Псалом 68:11; 9-ҷы страницада « Павел илҷі ипчілерге чоохтанарға чаратпаан ма?» тіп рамканы кӧріңер).

Иисус ипчілерні аарлыға санаан. Ол туста оолахты хыс паладаң аарлыға санаҷаңнар. Анзы Талмудтаң кӧрінче. Анда піди пазылча: «Ир пала тӧріткен кізі часкалығ, хыс пала тӧріткен кізее чобағ». Пірее іҷе-пабалар хыс паланы аар чӱк тіп санаҷаңнар. Ағаа ир тілирге паза, ирге парчатса, хоза пірее ниме пирерге кирек полған. Олох туста, олар киріп парзалар, хыстары оларны кӧрбес тіп санаҷаңнар.

Иисус Наин саардаң ӧкіс ипчінің оолғын паза Иаирнің хызын тірілдірібіскен. Іди ол хызыҷахтың чуртазы оолахтың чуртазыох осхас аарлығ полчатханын кӧзіт пирген (Марк 5:35, 41, 42; Лука 7:11—15). Иисус, «он сигіс чыл чабал хутха кинек иттір салған ипчіні» чазылдырыбысханда, аны Авраамның хызы тіп адаан. Еврей авторлар Авраамның хызы тіп пір дее дее паспаҷаңнар (Лука 13:10—16). Пу чылығ сӧстернең Иисус ол ипчі ир кізілерӧк осхас аарлығ кізі полчатханын паза аның киртінізі пик полчатханын кӧзіт пирген (Лука 19:9; Галат чиріндегілерге 3:7).

Иисус Христостың ӱгредии пӱӱнгі кізілерге хайди теелче. Азияда пір сӧспек пар: «Хысты ӧскіргені пасха кізінің огородын суғлаанына тӧӧй». Христианин полчатхан хыныстығ пабалар оолғыҷахтарына даа, хызыҷахтарына даа пір тиң хынчалар. Олардаңар сағысырапчалар, тонандырчалар паза чахсы ӱгредіг пирчелер.

Иисус ипчілерге ізенҷең. Иудейлернің чарғыларында ипчі кізілернің киречілістері хулларның киречілестеріне тиң саналҷаңнар. Иосиф Флавий пастағы векте піди пасхан: «Ипчілернің киречілестерін санға аларға чарабас. Олар учуххан паза ниик сағыстығлар нооза».

Иисустың ипчілерге саңай пасха кӧріс полған! Ол тіріл парғаннаңар искірерге ипчілерге чоохтаан (Матфей 28:1, 8—10). Ипчілер аның ӧлгенін паза чығанын кӧрген ползалар даа, илҷілер оларның сӧстеріне киртінмееннер (Матфей 27:55, 56, 61; Лука 24:10, 11). Иисус иң пурун ипчілерге кӧрінгенде, олар аннаңар чахсы хабарны искірерге турыстығ полчатханнарын кӧзіт пирген (Илҷілернің 1:8, 14).

Иисус Христостың ӱгредии пӱӱнгі кізілерге хайди теелче. Иегованың киречілерінің ӧмелерінде нандырығлығ иреннер ипчілерні улуғлапчалар паза олар чоохтаан сағыстарны санға алчалар. Христианин полчатхан ирлер ипчілерін, ситкеп истіп, аарлапчалар (Бытие 21:12; 1 Петрның 3:7).

Худай ипчілерні пос чуртастығ паза улуғласха турыстығ чайап салған (Бытие 1:27, 28). Иисустаң кӧзідім алчатхан иреннер ипчілерге сах іди хайчалар. Христианин полчатхан иреннер постарын ипчілерінең пӧзік сананминчалар. Олар, Библияның принциптерінең устанып, ипчілерін часкалығ идерге кӱстенчелер (Ефестегілерге 5:28, 29).

Елена Библияны ӱгреніп пастаанда, чабал ирнең чуртапчатхан. Аның ирі чуртаан орында хыстарны ирге оғырлап парыбысчаңнар, ирлер ипчілерін сохчаңнар. Елена тіпче: «Библия ӱгренгені мағаа кӱс кирген. Мин піліп алғам: мағаа кем-де хынча паза мині аарлыға санапча. Мин сағынҷам: „Минің ирім Библия ӱгренген полза, ол миннең саңай пасха тудынарҷых“». Аның сағызы тол парған. Нинҷе-де тус пазынаң аның ирі Библия ӱгрен сыххан. Ол, кіреске тӱзіп, Иегованың киречізі полып алған. Елена аннаң андар чоохтапча: «Ол тыстаныстығ кізі пол парған паза піс удур-тӧдір пыро тастазарға ӱгреніп алғабыс». Аның чуртазы хайди алыс парған? Ол чоохтапча: «Библияның принциптерінің сылтаанда, мин позымны кирек кізізім тіп санап сыххам паза минің хонығым амыр пол парған» (Колосстағыларға 3:13, 18, 19).

Кӧп ипчінің чуртазы, Еленаның чуртазы чіли, алыс парған. Миллионар христианкалар сӧбіреде часкалығлар. Ноға? Олар паза оларның ирлері Библияның принциптерінең тудынчалар. Оларға пір киртіністіглернің аразында чахсы паза истіг: оларның пӧгіннерін санға алчалар паза кӧрістерін улуғлапчалар (Иоанн 13:34, 35).

Христианнар пілчелер: олар прайлары — ир кізілер паза ипчілер — чазыхтығ паза толдыра нимес кізілер, Худайның тик чуртасха пиріл парған чайаахтары. Олар хыныстығ Пабазына чағдапчатхан ӱчӱн, «чызирдаң позып алып, Худайның палаларының пос чуртазын паза сабланызын аларларына ізеніс пар» (Римдегілерге 8:20, 21). Иегова ир кізілерге паза ипчі кізілерге уғаа чахсы ізеніс пирче.