Оң сариндағы хооста кӧп кізінің чарғы кӱнінеңер ниме сағынчатханы кӧзіділче. Миллиардтар Худай сіреезі алнында мының алнында иткен киректері ӱчӱн чарғылатчалар. Чарғы соонда, піреелері тигірзер райзар парарлар, пасхалары, тізең, чир алтындағы адта ирееленерлер. Библия хоостыра, Чарғы кӱні прай кізілерні саба киректең позыдыбызар (Псалом 96:13). Худай Иисус Христосты чарғыҷаа турғыс салған. Ол прай кізілерні орта чарғылир. (Исайя 11:1—5; Илҷілернің 17:31 хығырыбызыңар.)

Пастағы кізі Адам, Худайдаң тоғыр парып, позының тӧлін чазыхтың холына пирібіскен, аннаңар прай кізілер ирееленчелер паза ӱрепчелер (Римдегілерге 5:12). Ол саба киректі тӱзедер ӱчӱн, Иисус миллиардтарны тірілдірер. Иисус пір муң чыл устаза, ниме полары Азых чоох тіп киндеде кӧзіділче. (Азых чоох 20:4, 11, 12 хығырыбызыңар.)

Азых чоох тіп киндеде 20 пастағда «пічіктердеңер» чоохталча. Тірілген кізілер мының алнындағы иткен киректерінің ӱчӱн нимес, че ол «пічіктернең» танызып алған соонда иткен киректерінің ӱчӱн чарғыладарлар (Римдегілерге 6:7). Павел илҷі тірілер кізілернің аразында арығ даа, арығ нимес тее чӱректіг кізілер поларлар теен. Оларның Худайнаң танызып аларға оңдай полар. (Илҷілернің 24:15 хығырыбызыңар.)

Иегованаң танызып аларға паза аның нымысчызы поларға маңнанмин, ӱреп парған кізілерге, алызып, чахсы чуртас апарарға оңдай пирілер. Олар Худайның саринзар турыбыссалар, «чуртирға тірілерлер». Че пірее кізілер Иегованың чолынзар турарға хынмастар. Олар, тізең, «чарғыладарға тур килерлер». (Иоанн 5:28, 29; Исайя 26:10; 65:20 хығырыбызыңар.)

Чарғы кӱні пір муң чыл турар. Ол чыллар тоозылчатса, Иегова аның чооғын исчеткен кізілерні чазых чох толдыра кізілер ит салар. Іди Худайның пастағы сағын салған сағызы тол парар (1 Коринфтегілерге 15:24—28). Сағын на кӧріңер, арығ чӱректіг кізілернің хайдағ чуртас полар! Пір муң чыл ирт парза, Худай Сайтан Дьяволны чир тӱбінең позыдыбызар. Ол халғанҷы сынағ полар. Сайтан пазох кізілерні Иеговадаң хыйа тартып аларға кӱстенер. Тур халғаннар, тізең, мӧгі тус чирде чуртирлар. (Исайя 25:8; Азых чоох 20:7—9 хығырыбызыңар.)

Библияда ідӧк пасха «чарғы кӱнінеңер» чоохталча. Ол кӱнде пу система чох иділ парар. Ол кӱн, Нойның тузындағы чабал кізілерні чох идібіскен чайых чіли, кинетін килер. Хара сағыстығ кізілер чох пол парзалар, чир ӱстӱндегі «прай кізілер Худайның оңдайынҷа чуртирлар». (2 Петрның 3:6, 7, 13 хығырыбызыңар.)