• ТӦРЕЕН ЧЫЛЫ: 1963

• ТӦРЕЕН ХАЗНА: ВЕЛИКОБРИТАНИЯ

• ХАҶАН-ДА: ЧАХСЫ КАРЬЕРА ИДІП АЛҒАН

МЫНЫҢ АЛНЫНДА

Мин Лондонның хыриндағы Кройдон тіп саарда тӧреем. Іҷе-пабамның тоғыс пала полған. Мин алтынҷы палазызым. Іҷемнең пабам Карибскай талайдағы Сент-Винсент тіп олтырыхта тӧрееннер. Іҷем Методистскай тигірибзер чӧрген. Мин Худайзар паза религиязар тартылбаам, че пілістер аларға мағаа уғаа хынығ полған. Каникулларны мин кӧл хазында, библиотекадаң алып алған книгаларны хығырып, иртірҷең полғам.

Школа тоосхан соонда, нинҷе-де чыл пазынаң мин кізілерге полызарға хынчатханымны піліп алғам. Аннаңар мин чуртаҷаң орын чох, кинек паза аар ӱгренчеткен кізілерге полысчатхан тоғысха кіріп алғам. Анаң университетсер медико-санитарнай факультетсер ӱгренерге кіріп алғам. Аны тоосхан соонда, чахсы тӧлелҷең тоғыста тоғынғам. Минің прай нимее ахча читчең. Мин внештатнай социальнай аналитик паза менеджменттің консультанты полғам. Мағаа ноутбук паза Интернет ле кирек полған. Пір-ікі неделяа пасха хазназар парып, отельде чуртаҷаңмын, чир-чайаанға ӧкірсінҷеңмін, спа-салонзар паза фитнес-клубсар чӧрҷеңмін. Минің чуртазым уғаа чахсы тіп сағынғам! Че полызығда кирексінчеткен кізілердеңер хаҷан даа ундутпаҷам.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН

Позымнаң сурҷаң полғам: «Нимее піс чуртапчабыс?» паза «Чуртастың смыслы хайдағ?» Че ол сурығларға нандырығларны Библияда тілебеем. 1999 чылда минің туңмам Маргарет ӧӧрезінең хада минзер килген. Олар Иегованың киречілері полғаннар. Аның ӧӧрезі миннең кӧп чоохтасхан. Аннаңар мин аннаң Библия ӱгрен сыххам. Минің тоғызымның паза чуртазымның оңдайының ӱчӱн уғаа маң чох полған. Аннаңар духовнай саринаң ӧспеем.

Чайғызын 2002 чылда Англияның юго-западынзар чуртирға кӧс парыбысхам. Анда доктор социальных наук тіп степень алып алар ӱчӱн, аспирантуразар ӱгренерге кіріп алғам. Иегованың киречілерінің залынзар чӧр сыххам паза андар оолғымны ал чӧрҷем. Мин пӧзік ӱгредігліг кізі полғам, че Библияны ӱгреніп ле, кізілернің сидіктері нименің ӱчӱн полчатханын паза хайди ол сидіктер чох пол парарын піліп алғам. Мин Матфей 6:24-гі сӧстер сын полчатханын піліп алғам. Анда чоохталча: «Пір дее кізі ікі пастыхха чалҷы пол полбас». Син Худайға алай ис-пайға нымысчыланчазың. Нимені чуртазымда пастағы орынға турғызарға пӧгін аларға кирек поларын піліп алғам.

Аның алнында Библия істесчеткен группазар чӧргем. Анда Иегованың киречілері «Существует ли заботливый Творец?» a тіп киндені ӱзӱргеннер. Мин піліп алғам: пістің Чайаачыбыс, Иегова ла, пістің прай сидіктерібісті пӧк полар. Че университетте пісті чуртастың смыслы Чайаачынаң палғалыстығ нимес тіп ӱгретчеңнер. Анзы минің кӧңніме кірбеен. Ікі ай пазынаң мин университетті тастабысхам. Паза духовнай киректерге кӧп арах тус пирерге пӧгін алғам.

Притчи 3:5, 6-ғы сӧстер кӧӧктіргеннер: «Иеговаа прай чӱрееңнең ізен, позыңның сағызыңа ізенме. Ноо даа ниме итсең, аннаңар ундутпа, ол, тізең, сині орта чолҷа апарар». Хыныстығ Худайдаңар пілістер мағаа ис-пайдаң паза пӧзік ӱгредіг пирчеткен орыннардаң хай-хай аарлығ полғаннар. Иегова Худайның чирдеңер сағызынаңар паза анзында пістің ӱчӱн ӱреен Иисус ниме иткеннеңер нинҷе кӧп піліп одырғам, анҷох кӧп Чайаачыбысха нымысчыланарым килген. Апрельде 2003 чылда мин кіреске тӱскем паза пола-пола олаңай чуртас апар сыххам.

ЧУРТАЗЫМА ХАЙДАҒ ТУЗА АҒЫЛҒАН

Иегова Худайнаң палғалысты уғаа аарлыға санапчам. Ідӧк аны пілгені чӱрееме амыр ағылча паза анзына уғаа тың ӧрінчем. Харындас-пиҷелернең чоохтасханы мағаа улуғ ӧрініс ағылча.

Библияны ӱгренгені паза христианскай чыылығларға чӧргені минің пілістерге тартылчатханымны саңай толдырчалар. Киртінізімнеңер пасхаларына чоохтирға уғаа тың хынчам. Іди мин кізілернің чуртастарын чахсы саринзар айландырарға паза наа тилекейдегі чахсы чуртасха ізеніс табарға полысчам. Аннаңар ол тоғыс минің чуртазымда пастағы орында турча. 2008 чылда июнь айдаң сығара мин пионер полып нымысчыланчам. Іди чахсы хабарны искіреріне кӧп тус хоратчам. Хаҷан даа андағ часкалығ полбаам! Мин чуртастың смыслын таап алғам, аннаңар Иеговаа уғаа алғыстығбын.

• ТӦРЕЕН ЧЫЛЫ: 1973

• ТӦРЕЕН ХАЗНА: АВСТРИЯ

• ХАҶАН-ДА: АЗАРТНАЙ ОЙЫННАР ОЙНААН

МЫНЫҢ АЛНЫНДА

Мин Австрияда ӧңненчеткен Браунау тіп саарда ӧскем. Ол саарда сайбағлар полбаҷаңнар даа. Пістің сӧбіреде прайзы католиктер полғаннар. Мині кічігдең ала ол религияа ӱгреткеннер.

Кічігде полған пір кирек минің чӱреемні тың ағыртхан. Анзы 1984 чылда пол парған. Мағаа андада 11 час полған. Иртен піс чағын нанҷыбыснаң хада футбол ойнаабыс. Обедте, тізең, ол ӱреп парған... Ол машина алтына кір парған. Чағын нанҷым ӱреен соонда, мин уғаа тың чобалғам. Ол кирек соонда, мині кӧп чыллар мындағ сурығ сағыссыратхан: «Ӱреен соонда, кізінең ниме полча?»

Школа тоозып, мин электрик полып тоғын сыххам. Мин азартнай ойынҷы полған ползам даа паза улуғ ставкалар итчең полған ползам даа, ахчанаң хаҷан даа хызылбаам. Мин спортнаң кӧп айғасхам, хеви-метал паза панк-рок искем. Дискотекадаң дискотекаа, вечеринкадаң вечеринкаа читіре чуртаҷаң полғам. Минің чуртазымда сайбах ӱтертініс уғаа кӧп полған, олох туста чуртазымда ниме-де читпинче тіп пілдірген.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН

1995 чылда минзер улуғланыбысхан Иегованың киречізі килген. Ол мағаа кинде пирген. Ол киндеде ӱреен кізілернең ниме полчатханнаңар чоохталған. Кічіг тузымда ӱреен нанҷымнаңар ам даа сағынғам. Аннаңар ӧлімнеңер пастағны, анаң прай даа киндені хығырыбысхам!

Мині кӧп чыллар сағыссыратхан сурыға нандырығ таап алғаныма уғаа тың ӧрінгем! Че мин пасха даа нимелер піліп алғам. Мин католическай сӧбіреде ӧскем, аннаңар Иисусха ла киртінгем. Че Библияны істезіп, Иисустың Пабазына, Иеговаа чағын пол парғам. Иегованың кізілердең чазынминчатханын, че аны тілепчеткеннерге позын асчатханын піліп алғаным ӧріністіг полған (Матфей 7:7—11). Мин піліп алғам: Иегованың чувстволар пар паза ол пирген сӧзін хаҷан даа тутча. Аннаңар Библиядағы ухаанҷыластарны кӧрерге паза оларның хайди толчатханнарын істезерге мағаа хынығ полған. Андағ істезіг Худайға киртінізімні тыытхан.

Мин піліп алғам: Иегованың киречілері ле кізілерге Библияны піліп аларға полысчалар. Оларның публикацияларында кӧп библейскай ссылкалар кӧр салғам. Мин оларны позымның католическай Библиям хоостыра сыныхтаам. Нинҷе кӧп істескем, анҷох кӧп піліп одырғам: мин сынны таап алғам.

Иегова мині аның нормаларынҷа чуртазын тіп хынчатханын піліп алғам. Ефестегілерге 4:22—24-тең піліп алғам: мағаа «иргі чуртас кибірлерін хыйа тастап... сыннаң орта паза ах-арығ чуртаста Худайның омазы хоостыра чайалған наа кізее айлан парарға» кирек. Аннаңар мин сайбах чуртазымны артыс салғам. Ідӧк азартнай ойыннарны олар кізіні харам поларға паза ис-пайға тартыларға кӧӧктірчеткен ӱчӱн артыс саларға кирек полчатханын піліп алғам (1 Коринфтегілерге 6:9, 10). Аннаңар мағаа иргі нанҷыларымны артыс саларға паза мин чуртапчатхан принциптерҷе чуртапчатхан наа нанҷылар таап аларға кирек полған.

Анзы, тізең, оой полбаан. Че мин Иегованың киречілерінің чыылығларына чӧргем. Анда кӧп наа нанҷылар таап алғам. Ідӧк мин Библияны ситкеп істескем. Пола-пола хайдағ сарыннар истеріне кӧрізімні, чуртазымның кӧстеглерін паза позымның тастындағы кӧрімімні алыстырыбысхам. 1995 чылда, кіреске тӱзіп алып, Иегованың киречізі пол парғам.

ЧУРТАЗЫМА ХАЙДАҒ ТУЗА АҒЫЛҒАН

Ам мин пайып аларға кӱстенминчем. Ідӧк минің хылиим алыс парған: мының алнында ӧктем кізі полғам, ам, тізең, амырзым. Паза мин алнынзар ізеніснең кӧрчем.

Иегованың нымысчыларының прай чир ӱстӱндегі сӧбірезінің чардығы полчатханыма тың ӧрінчем. Оларның аразында улуғ сидіктерге урунчатхан кізілер пар, андағ даа полза, олар Худайға киртістіг халчалар. Чуртазымда ӱтертініс ам пастағы орында нимес. Мин прай кӱзімнең Иеговаа нымысчыланчам паза кізілерге полысчам. Анзы мағаа улуғ ӧрініс ағылча!

• ТӦРЕЕН ЧЫЛЫ: 1963

• ТӦРЕЕН ХАЗНА: ВЕЛИКОБРИТАНИЯ

• ХАҶАН-ДА: ЧУРТАЗЫНА АЧЫРҒАН ПАРҒАН

МЫНЫҢ АЛНЫНДА

Мин Англияда тӧреем. Мағаа читі час полғанда, піс Австралиязар Голд-Кост (штат Квинсленд) тіп курортнай саарзар чуртирға парыбысхабыс. Пай чуртабаабыс, че пістің прай кирек ниме полҷаң.

Минің кічіг тузым хомай полбаан. Че ол туста мин позымны часкалығ кізее санабаам. Мин кічігдӧк чуртазыма ачырған парғам. Пабам уғаа тың араға іскен паза іҷемнең хазыр тудынған. Аннаңар мин ағаа хынмаам. Соонаң на, пабам, Малайяда служить полғанда, ниме кӧргенін піліп алғамда, ноға ол андағ пол парғаны пілдістіг пол парған.

Улуғ класстарда ӱгренгемде, мин нанҷыларымнаң удаа араға ісчеңмін. 16 час полғанда, школа тастабызып, флотсар служить поларға парыбысхам. Мин наркотиктернең айғас сыххам, тамкы тарт сыххам. Мының алнында тынанҷаң на кӱнде араға ісчең полғам, ам, тізең, араға чох пір кӱн дее чуртап полбин сыххам.

Мағаа 20 час таа полбаан, че мин Худай парында ікінҷілеп сыххам. Мин сағынғам: «Худай пар полза, ноға анҷа ирее паза ӧлім?» Мин аннаңар кибеліс пас салғам. Анда мин кізілернің прай иреелерінің ӱчӱн Худайны пыролаам.

23 час полғанда, мин флоттаң парыбысхам. Аймах-пасха тоғыстарда тоғын чӧргем, пасха хазнада даа тоғынғам, че андағ даа полза, минің чӱреемде ниме-де читпинче тіп пілдірген. Чуртазымда кӧстеглер чох полған. Мағаа пір дее ниме хынығ полбаан. Тура алғаны, чахсы тоғыс, карьера — прай ол нимелер мағаа тик ле нимелер тіп пілдірген. Мин «часхарыс» арағада паза музыкада ла тапчаң полғам.

Сағысха кирчем, пір туста ноо нимее чуртапчатханыбысты піліп аларым тың килген. Мин Польшада Освенцим тіп концентрационнай лагерьде полғам. Мының алнында хайдағ хорығыстығ киректер мында полғаннаңар хығырғам, че лагерьде чӧріп, андағ улуғ территорияны кӧр салғамда, минің чӱреем хайнап сыххан. Ноға кізілер андағ чабаллар?! Лагерьҷе чӧрчеткемде, харах чазым ахчатхан паза хатап-хатап сурығ сыхчаң: «Ноға?»

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН

1993 чылда, пасха хазнадаң ибзер айланғамда, сурығларыма нандырығлар таап аларға ізеніп, Библия хығыр сыххам. Ӱр ниместең минің ізігімні ікі Иегованың киречізі тохлатхан. Олар мині стадионда полар конгресске хығырғаннар. Мин андар пар килгем.

Нинҷе-де ай аның алнында мин ол стадионда матчта полғам. Че конгрессте саңай пасха полған! Иегованың киречілері паарсах паза иптіг тонаных полғаннар. Палалары чахсы тудынғаннар. Че обедте полған ниме мині аннаң даа тың хайхатхан: нинҷе-де чӱс Иегованың киречізі футбол ойнаҷаң орында азыранған соонда арығ полған, пір дее чаҷын халбаан! Ол кізілернің чуртастарына чӧпсінгеннері кӧрінген. Хайди анзы мағаа читпеҷең! Программада ниме полғанын сағысха кир полбинчам, че Иегованың киречілерінің тудынғаннары мині тың хайхатхан.

Конгресс соонда, иирде, мин туғанымны сағысха кир килгем. Ол Библияны хығырған паза пасха-пасха религияларны істескен. Нинҷе-де чыл мының алнында, ол мағаа сын религияны киректерінең піліп аларға чарир тіп Иисустың сӧстерін хығыр пирген (Матфей 7:15 — 20). Мин ноға Иегованың киречілері пасха религияларға тӧӧй ниместерін піліп аларға хынғам. Пастағызын на чуртазымда мағаа ниме-де хынығ полған паза чӱреемде ізеніс чарып сыххан!

Соңа неделяда минзер мині конгресске хығырған Иегованың киречілері килгеннер. Олар миннең Библия ӱгренерге хынғаннар, мин тоғыр полбаам. Ідӧк мин христианскай чыылығларға чӧр сыххам.

Библияны ӱгренгемде, Худайдаңар кӧрізім саңай алыс парған. Мин піліп алғам: чир-чалбахтағы кізілернің чабал киректерінде, иреелерде Худайның пырозы чоғыл. Кізілер хазыр тудынчатсалар, аның чӱрее ағырча (Бытие 6:6; Псалом 78:40, 41). Мин пӧгін алғам: Иегованың чӱреен ағыртпас ӱчӱн, прай кӱс салам. Мин аны ӧріндірерге хынғам (Притчи 27:11). Аннаңар араға іспин сыххам, тамкы тастабысхам паза сайбах тудынмин сыххам. 1994 чылда март айда, кіреске тӱзіп, Иегованың киречізі пол парғам.

ЧУРТАЗЫМА ХАЙДАҒ ТУЗА АҒЫЛҒАН

Ам мин чуртазыма ӧрінчем! Сидіктерімні, араға ізіп, ундут саларға кӱстенминчем. Ам сидіктерімні Иегованың полызиинаң пӧкчем (Псалом 55:22).

Мин 10 чыл уғаа чахсы христианканаң, Кареннең, чуртапчам паза аның уғаа чахсы хызын, Нелланы, позымның хызымны чіли, ӧскірчем. Піс прайзыбыс кізілерге Худайдаңар сынны піліп аларға ӧрініснең полысчабыс. Ам, тізең, минің чуртазымда смысл пар!