Мин Санто-Домингода тӧреем. Іҷе-пабамның тӧрт пала полған, мин иң кічии полғам. Іҷе-пабам интеллигентнай, пӧзік ӱгредігліг кізілер полғаннар. Оларның палалары чахсы кізілер аразында ӧссіннер тіп хынғаннар. Мин тӧрирінең тӧрт чыл алнында іҷе-пабам мормоннарның миссионерлерінең танызып алғаннар. Оларның иптіг тонанғаннары паза чалахай тудыныстары іҷе-пабамның кӧңнілеріне уғаа тың кірген. Аннаңар Иисус Христостың халғанҷы кӱннердегі ах-арығларының алай Мормоннарның тигірибінзер кірерге пӧгін алғаннар. Олтырыхта пістің сӧбіре ол религияа кірген пастағы кізілернің санында полған.

Мин тигірибнің киректерінде аралазарға хынҷаңмын. Сӧбірее паза нравственнай ценностьтарға кӧп хайығ салғаны кӧңніме уғаа тың кірген. Мин религияма тың поғдархаам паза миссионер поларға пӧгін алғам.

Мағаа 18 час полғанда, пістің сӧбіре Піріккен Штаттарзар, Флоридазар кӧс парыбысхан. Анда мағаа университетке кіріп аларға оңдай полған. Пірҷе чыл пазынаң іҷемнің пиҷезі ирінең хада піссер ааллап килгеннер. Олар Иегованың киречілері полғаннар. Мині постарынаң хада библейскай конгресске парарға хығырғаннар. Анда программа тузында кізілер Библия асчаңнар паза чоохтарның ӧӧн сағыстарын пасчаңнар. Мағаа анзы хайхастығ полған. Мин дее ручканаң чаҷын сурып алып, конспектировать пол сыххам.

Конгресс соонда іҷемнің пиҷезі ирінең хада мағаа тееннер: «Миссионер поларға хынчатсаң, сағаа Библияны чахсы пілерге кирек. Хынзаң, піс сағаа Библияны піліп аларға полыс пирербіс». Мин анзына ӧрін парғам. Мормонның киндезінеңер пілгем, Библиядаңар, тізең, пір дее ниме пілбеем.

Піс іҷемнің пиҷезінең паза аның ирінең телефоннаң чоохтасчаң полғабыс. Олар киртінізімні Библиядаң алған пілістернең тиңнестірерге кӧӧктіргеннер. Олар мині сынны позы піліп алзын тіп хынғаннар.

Позымның религиямның ӱгредіглеріне мині іди ӱгреткен не ӱчӱн киртінҷеңмін. Ол ӱгредіглер Библияа килісчелер бе, киліспинчелер бе мин пілбеем. Іҷемнің пиҷезі 8 ноябрьда, 1995 чылда сыххан «Усхуныңар!» тіп журнал ыс пирген. Анда мормоннардаңар статьялар полғаннар. Аны хығырып алып, позымның религиямнаңар пір дее ниме пілбинчеткенімні піліп алғам. Анда орта пазылған ма алай чох па піліп алар ӱчӱн, мин мормоннарның официальнай сайтынзар кір кӧргем. Ідӧк оларның Юта штаттағы (США) музейлерзер пар килгем. Іди «Усхуныңар!» тіп журналда прай ниме орта пазылғанын піліп алғам.

Мин Мормонның киндезі паза Библия килісчелер тіп сағынғам. Соонаң олар удур-тӧдір тоғырланчатханын піліп алғам. Кӧзідімге, Иезекииль 18:4-те кізі тыны ӧл парча тіп пазылча, Мормонның киндезінде, тізең, тын хаҷан даа ӧлбинче тіп пазылча (Алма 42:9).

Оларның ӱгредіглері Библияа киліспинчеткеніне хоза, мині оларның националистическай идеялары сағыссыратханнар. Кӧзідімге, мормоннар Эдем сад Джексон округта (штат Миссури, США) полған тіп киртінчелер. Оларның ухаанҷылары Худайның Хан-ӱлгӱзі устап пастабысса, пос паза равноправнай чуртастың ағазында Американың піріккен штаттарының арығ флагы поғдархастығ чалбырап турар тіп ӱгретчелер.

Андада мин тӧреен хазна паза пасха даа хазналар хайди поларлар тіп сағынғам. Пірсінде, иирде миссионерге ӱгренчеткен чиит мормон мағаа сығдыратхан. Мин ағаа сағыссырастарымны чоохтап пиргем. «Синің хазнаң пасха хазнадаң тоғыр чааласса, син ол хазнада чуртапчатхан мормон харындастардаң тоғыр чаалазарға парарзың ма?» — сурғам мин. Ол парам тіп нандырғанына тың хайхап парғам. Позымның религиямны чахсы арах піліп алар ӱчӱн, устағҷыларымнаң кӧп чоохтасхам. Прай минің сурығларыма олар нандырҷаңнар: «Анзы ам чазыт, соонаң, Худай асса ла, анзын піліп аларбыс».

Позымның религияма саңай тӱӱл парғам паза ноға миссионер поларға хынчам тіп сағын сыххам. Сынында мин кізілерге полызарға хынғам. Ідӧк, миссионерлерні улуғлаҷаңнар, анзы минің кӧңніме кірген. Сынында миссионер Худайдаңар ӱгредерге кирек. Мин, тізең, Худайдаңар пір дее ниме пілбеем. Мының алнында мин Библияны кӧп хати хығыр турғам, че сынында анда хайдағ аарлығ сыннар пазылғанын пілбеем. Худай чирдеңер паза кізілердеңер ниме сағын салғанын пір дее испеем.

Иегованың киречілерінең Библияны ӱгреніп, мин Худайның адын, кізі ӱреп парза, аннаң ниме полчатханын паза Худайның сағызында Иисус хайдағ роль ойнапчатханын піліп алғам. Ол хайхастығ киндені мин позыма ам на азып алғам. Мин Худайға сыбыра киртінгем, ам, тізең ол минің пазырыстарымны исчеткен чағын нанҷым пол парды. 2004 чылда, 12 июльда кіреске тӱзіп алып, мин Иегованың киречізі полып алғам. Чарым чыл пазынаң, тізең, прай тузымны пиріп, Худай сӧзін искір сыххам.

Мин Бруклинде (Нью-Йорк), Иегованың киречілерінің Ӧӧн устаанда пис чыл нымысчыланғам. Анда Библияны паза миллионнарның чуртастарын алыстырчатхан библейскай литератураны сығарарға полысхам. Анзына уғаа тың ӧрінчем. Мин ам даа кізілерге Худайдаңар піліп аларға ӧрініснең полысчам.