Библияда прай кізілер чазыхтығлар тіп пазылча. Піс пастағы кізінің, Адамның, ӱчӱн чазыхха тартылар пол парғабыс. Аннаңар піс пірееде хомай киректер ит салчабыс, соонаң оларның ӱчӱн ачырғанчабыс. Худайның Оолғы, Иисус Христос, позының чуртазын пістің чазыхтарыбыстың ӱчӱн пирібіскен. Аның толығ полчатхан тайииның ӱчӱн пістің чазыхтарыбыс тасталар. Анзы Худайның сыйии. (Римдегілерге 3:23, 24 хығырыбызыңар.)

Мының алнында аар чазых ит салған кізілернің піреелерін мындағ сурығ сағыссыратча: хаҷан-полза Худай оларның чазыхтарын тастап полар ба? Худайның Сӧзі мындағ ізеніс пирче: «Худай Оолғының Иисус Христостың ӧлімі, тізең, полған на чазыхтаң пісті арығлапча» (1 Иоанның 1:7). Кізі орта кӧңніліг полза паза пыросынчатса, Иегова иң аар даа чазыхтарны ӧрініснең тастапча. (Исайя 1:18 хығырыбызыңар.)

Иегова Худай пістің пыробысты тастазын тіп, аннаңар пілістер аларға кирек: аның чолларын, чӧптерін паза ниме киректепчеткенін піліп аларға кӱстенерге (Иоанн 17:3). Иегова алҷаастарында пыросынчатханнарның паза андағ кирек итпеске кӱстенчеткен кізілернің пыроларын прай чӱрекнең тастапча. (Илҷілернің 3:19 хығырыбызыңар.)

Худайдаң пыро тастирға сурынып аларға сидік нимес. Иегова пістің уйан сариларыбысты пілче. Ол паарсах паза нымзах чӱректіг. Худайның хынызы хайди аны позыбыстың киректерібіснең ӧріндірерге піліп аларға кӧӧктірбинче бе? (Псалом 103:13, 14 хығырыбызыңар.)