Мин кічігдең сығара чир-чайаанға тың хынчам. Піс сӧбіребіснең хада Центральнай Финляндиядағы Ювяскюля город тастынзар чӧрерге хынҷаңмыс. Анда уғаа сіліг кӧллер паза арығлар кӧрерге хынҷаң полғабыс. Мин хоосхаларға, адайахтарға уғаа тың ачынҷаңмын, аннаңар полғанын на хуҷахтирым килҷең. Кізілернің аң-хустарнаң чабал тудынызы мині тың ачырғандырҷаң. Аннаңар мин аң-хустарны арачылаҷаң обществаа хозыл парғам.

Піс аң-хустарның праволарын арачылаҷаңмыс: протест марштарын паза демонстрациялар итчеңміс, аңнарның теерлерін садарына паза лабораторнай опыттарда оларнаң тузаланарына тоғырланҷаңмыс. Піс позыбыстың аң-хустар арачылаҷаң организациязын тӧстеп алғабыс. Пірееде піс хазыр тудыныбысчаңмыс, аның ӱчӱн пісті полиция апарыбысчаң паза мині нинҷе-де хати чарғылааннар.

Мин аң-хустардаңар ла нимес, че прай чир ӱстӱндегі сидіктердеңер сағыссыраам. «Международнай амнистия» паза «Гринпис» тіп организацияларзар кіргем. Оларға хабазарға прай кӱзім салғам. Чох-чоос паза ӧкіс кізілерге полызып, оларның праволарының ӱчӱн харбасчаңмын.

Нинҷе-де тус пазынаң мин пілін сыххам: пу чир-чалбахта мин пір дее ниме алыстыр полбаспын. Кічіг сидіктерні пӧкчетсе, улуғ сидіктер уламох кӧптең кӧп полып одырғаннар. Мағаа прай чир-чалбах чабалның холында, анзына пір дее кізінің кирегі халбинча паза мин пір дее ниме ит полбинчам тіп пілдірген.

Мин позымның кӱс-сағ чоғын пілін сыххамда, Худайдаңар паза Библиядаңар сағын сыххам. Хаҷан-да мин Иегованың киречілерінең Библия ӱгренгем. Олар миннең паарсаснаң тудынған ползалар даа, мағаа алызарға уғаа сидік полған. Ам, тізең, мин чуртазымны алыстырарға тимде полғам.

Мин позымның Библиямны таап алғам. Аны тирең істес сыххам. Притчи 12:10-да «Ах-арығ кізі малынаңар сағыссырапча» тіп чоохталча. Библиядаң Худай сидіктерде пыролығ нимес тіп піліп алғам. Прай сидіктер кізілер Худайның чахығларынҷа чуртабинчатхан ӱчӱн полчалар, Иегованың хынызы, тыстанызы паза паарсазы минің чӱрееме тың тееп парған (Псалом 103:8—14).

Олох туста «Чему на самом деле учит Библия?» тіп киндее купон таап алғам. Ол купонны толдырып, ызыбысхам. Нинҷе-де тус пазынаң Иегованың киречілері килгеннер. Мин оларнаң хада Библияны ӱгрен сыххам паза ӧме чыылығларына чӧр сыххам. Іди Библияның сыннары минің чӱрееме теңеннер.

Библия чуртазымны алыстырарға полыс пирген. Мин тамкы тартарын паза араға ізерін тастабысхам. Тастындағы кӧрімімні алыстырыбысхам, хырызынмин сыххам, ӱлгӱдегілерге кӧрізімні алыстырыбысхам (Римдегілерге 13:1). Мының алнында мин уғаа сайбах тудынҷаңмын, че ам прай ол киректерні артыс салғам.

Общественнай организацияларға кӧрізімні алыстырарға иң сидік полған, анзына кӧп тус киректелген. Ол организацияларға полыспаан ӱчӱн, позымны предательге санаам. Че Худайның Хан-ӱлгӱзі ле прай сидіктерні пӧк поларын піліп алғам. Аннаңар ол ӱлгее хабазар ӱчӱн, Худайның Хан-ӱлгӱзінеңер кізілерге искір сыххам (Матфей 6:33).

Мин кізілерні чахсы алай хомай кізілерге санаҷыңмын. Хомай кізілернең кӱрезерге хаҷан даа тимде полғам. Кізілерні паза хырт кӧрбинчем, че оларға хынызымны кӧзідерге кӱстенчем (Матфей 5:44). Худайның Хан-ӱлгӱзінеңер чоохтааны хынысты кӧзідерге иң чахсы оңдай. Андағ тоғыс кізілерге амыр чуртас, ӧрініс паза сын ізеніс ағылча.

Иеговаа ізен сыххамда, чӱреемде амыр пол парған. Иегова кізілерні, аң-хустарны сыбыра иреелирге паза чирні чох идерге пирбес. Худайның Хан-ӱлгӱзі чирге ағылған ӱрегні прай чох идібізер (Исаия 11:1—9). Мағаа ол сыннарны пілерге паза пасхаларына ол сыннарға киртіністі ӧскірерге полызарға уғаа ӧріністіг. Ам мағаа чир-чалбахты алыстырарға кирек тіп санабинчам.