Пӱӱн порнография уғаа кӧп a. Ол прай чирде учурапча: рекламада, модада, фильмнерде, сарыннарда, журналларда, телепередачаларда, видеоойыннарда, смартфоннарда паза пасха даа мобильнай устройстволарда, Интернетте, ам, тізең, фотохостингтерде. Порнография амғы тустағы культураның чардығы пол парғанға тӧӧй. Порнография хаҷан даа, амғы тустағы чіли, кӧп полбаан: кӧптең кӧп кізі кӧптең кӧп орыннарда кӧптең кӧп порнография кӧрче. (« Порнографиядаңар факттар» тіп рамканы кӧріңер.)

Ағаа хоза, порнографическай маттериаллар алысчалар. Профессор Гейл Дайнс пасча: «Амғы туста сомнар иртіре уйадыстығлар: мының алнында уғаа чабалға саналған порнография амғы туста олаңай ла порнографияа саналча».

Сірер пу алызығларға хайди кӧрчезер? Порнография ол пырозы чох ла ӱтертініс алай кізіні ардатчатхан ниме? Иисус Христос теен: «Полған на чахсы ағас чахсы чистек пирче, хомай ағас хомай чистек пирче» (Матфей 7:17). Порнография нимее ағылча? Анзын піліп алар ӱчӱн, пу теманаң палғалыстығ нинҷе-де ӧӧн сурығны ӱзӱрібізеелер.

ЭКСПЕРТТЕР НИМЕ ТІПЧЕЛЕР. Кізі порнографияа табырах кӧнік парча. Пірее істезігҷілер паза имҷілер аны кӱстіг наркотикнең тиңнестірчелер.

Интернеттеге порнографияны кӧрерге кӧнік парған Брайан b чоохтапча: «Порнография кӧріп, тоспаҷаң полғам. Сағызым алыс парҷаң, сірлесчең полғам, пазым чарылча тіп пілдірҷең. Паза кӧрбеске сағынғам, че чыллар иртчең, мин, тізең, ол кӧнігістең пір дее позып полбаам».

Кізілер порнографияны кӧрчеткеннерін чазырчалар. Олар туюх кізілер. Хайхастығ нимес, оларның кӧбізі пір дее кізее кирек чох кізізім тіп сағынча, уйадып, хылыхтанып, депрессияа пастырып паза чабалланып ирееленче. Піреелері ӧлінібізерге дее сағынчалар. Сергей кӱннің сай телефонына порнография скачивать полҷаң. Ол чоохтапча: «Мин туюх пол парғам паза холымны саңай тӱзірібіскем. Мин позымны нимее чарабаан кізее санаҷам, тың пыросынҷам паза пір дее кізее кирек чоғылзым тіп сағынҷам. Хайди поларға пілбеем. Че уйадып паза хорығып, мин кізілердең полызығ сурынмаам».

Порнографияны кинетін кӧр салғаны даа хомай нимее ағылча. Порнография кізінің чуртазына хайди теелчеткенін істесчеткен специалист, Джудит Рейсман, США-ның конгрезінің комитедінің алнында чоох чоохтаанда, піди теен: «Порнографическай сомнар мииске сиип парчалар паза аны алыстырчалар. Ол сомнар кізінің сағызында ӱр тусха биохимическай іс артыс салчалар. Анзын чох идерге уғаа сидік, пірееде аны чох ит полбинчалар даа». 19 частығ Сьюзан нинҷе-де хати порнографическай сайттарға кинетін урунған. Ол тіпче: «Ол сомнар минің сағызыма сиип парғаннар. Олар сағызымда кинетін сых килчелер. Мин олардаң пір дее позып полбассым тіп сағынчам».

ХАЙДАҒ САҒЫСХА КИЛДІБІС. Порнография кӧрчеткен кізі аның хулы пол парча паза аның чуртазы сайбал парча (2 Петрның 2:19).

ЭКСПЕРТТЕР НИМЕ ТІПЧЕЛЕР. «Ловушка порнографии» тіп киндеде Уэнди паза Ларри Мальц чоохтапчалар: «Порнография сӧбіредегі чуртасты сайбабысча» (The Porn Trap).

Порнография хоныхты паза сӧбірелерні сайбапча:

• ирепчінің аразында палғалыс паза хыныс сайбал парча, олар удур-тӧдір киртінмин сыхчалар (Притчи 2:12—17);

• ирепчі аразындағы хыныс сооп парча, кізі позынаңар ла сағын сыхча, хоных хонғанына сексуальнай саринаң чӧпсінмин сыхча (Ефестегілерге 5:28, 29);

• чиркістіг сексуальнай сағыстар паза хыҷыхтаныстар кірчелер (2 Петрның 2:14);

• хоных хонғанын чиркістіг секске кӱстеп сыхча (Ефестегілерге 5:3, 4);

• хоных хонғанына киртістіг полбасха кӧӧктірче (Матфей 5:28).

Библияда ирепчі удур-тӧдір алаахтырыспин паза киртістіг тудынарға киректер тіп чоохталча (Малахия 2:16). Хоных хонғанына киртістіг халбаан ӱчӱн сӧбіренің часказы сайбал парча паза ирепчілер чарылыс парчалар. Ирепчілер чарылысчатсалар, палалары даа ирееленчелер.

Порнография палаларны даа ардатча. Пу статьяда чоохталған Брайан тіпче: «Он частығда чазынып ойнаамда, мин пабамның порнографическай журналларын таап алғам. Ноға ол журналдағы сомнар кӧңніме кірчеткенін пілбин дее, мин оларны чазынып кӧрҷеңмін. Іди мин порнографияа пӱкӱлее кір парғам. Аннаң улуғ полғанҷа, сых полбаам». Хайди істезіглер кӧзітчелер, порнография кӧрген палалар секснең ирте айғазарға пастапчалар, кемнең не полза узупчалар, сексте хазыр тудынчалар паза эмоциональнай, психическай саринаң уйан пол парчалар.

ХАЙДАҒ САҒЫСХА КИЛДІБІС. Порнография сӧбіредегі хынысты сайбапча паза кізее иреелер ле ағылча (Притчи 6:27).

БИБЛИЯ НИМЕ ЧООХТАПЧА. «Аның ӱчӱн постарыңның пу чирдегі ит-ханыңарны ӧлдірібізіңер: чӧреес хылыхтарны, арығ нимес киректерні, хыҷыхты, чабал хынығыстарны, чабдыланысты. Чабдыланыс ол чой худайларға пазырынғаны полча» (Колосстағыларға 3:5).

Хысхаҷахти чоохтаза, Иегова c порнографияа хырт кӧрче. Че ол сексті хомай нимее санабинча. Сынында ол ирепчее секске ӧрінерге, эмоциональнай саринаң чағын поларға паза наа чуртас тӧстирінде аралазарға оңдай пирген (Иаковтың 1:17).

Иегова порнографияны хырт кӧрчеткенінде ноға ікінҷілебинчебіс? Мына нинҷе-де сылтағ.

• Порнография кізінің чуртазын ардатчатханын Иегова пілче (Ефестегілерге 4:17—19).

• Ол піске хынча, аннаңар пісті арачылапча (Исайя 48:17, 18).

• Ол сӧбірелер пик ползыннар тіп хынча (Матфей 19:4—6).

• Иегова пісті нравственнай саринаң арығ ползыннар паза пасха кізілернің праволарын улуғлазыннар тіп хынча (1 Фессалониктегілерге 4:3—6).

• Ол пісті интимнай чуртасты улуғлазыннар тіп хынча (Еврейлерге 13:4).

• Ол пілче: порнографияда секске Сайтанның осхас саба кӧріс кӧрінче (Бытие 6:2; Иуданың 6, 7).

ХАЙДАҒ САҒЫСХА КИЛДІБІС. Порнография кізінің паза Худайның аразындағы палғалысты сайбапча (Римдегілерге 1:24).

Порнографиядаң позып аларға хынчатханнарға Иегова уғаа тың айапча. Библияда чоохталча: «Иегова паарсах паза айаачы, тыстаныстығ паза киртістіг хыныстығ. Ол пісті нимедең пӱткенібісті чахсы пілче, піс чир тобырағы ла полчатханыбысты ундутпинча» (Псалом 103:8, 14). Ол пазымнығ кізілерні хығырча: «Хызылчатхан тузыбыста піске полыс пирер ӱчӱн, Худай піске ӧлҷей паза паарсас пирер» (Еврейлерге 4:16; « Хайди порнографиядаң позып аларға» тіп рамканы кӧріңер).

Худай пирген полызығны кӧп кізі алған. Анзы оларға хайди полыс пирген? Кізіні ардатчатхан кӧнігістерні тобырып алған кізілердеңер Библия ниме чоохтапчатханын кӧр кӧріңер: «Че арығланып алғаннар, ах-арығ пол парғаннар, Хан-пигібіс Иисус Христос паза Худайыбыс Худының пастыра ахтанып алғаннар» (1 Коринфтегілерге 6:11). Андағ кізілер Павел чіли піди чоохтап поларлар: «Иисус Христос мині пик итчеткенде, прай нимее кӱзім чидер» (Филипптегілерге 4:13).

Порнографиядаң позып алған Сьюзан чоохтапча: «Сағаа порнографиядаң позып аларға Иегова ла полыс полар. Син аннаң полызығ паза чӧп сурынзаң, сағаа аның хараанда арығ поларға оңдай пар. Ағаа пӱкӱлее ізенерге чарир».