«Худайның ады поларға кирек пе, кирек полза, аның ады хайди? Пу сурығларда піс пір сағысха кил полбинчабыс» (профессор Дейвид Каннингем, «Theological Studies» тіп журнал).

Худай теен: «Мин Иеговазым. Пу минің адым» (Исаия 42:8). Иегова тіп ат пурунғы еврейлер тілінең «Ол поларға пирче» тіп тілбестелче». («Ызых Пічік — Наа тилекей тілбестее», 1-ғы приложение, 1-ғы абзац.)

Иегова пісті аның адын адазыннар тіп хынча. Библияда чоохталча: «Аның адын хығырыңар, чоннарға аның киректерінеңер чоохтаңар! Аның ады уғаа илбек, аннаңар чоохтаңар» (Исаия 12:4).

Иисус Худайзар, аның адын адап, айланған. Пазырыста Иисус Иеговаа теен: «Оларға [позының ӱгренҷілеріне] синің адыңны астым, мыннаң мындар даа ас турарбын». Ноға Иисус ӱгренҷілеріне Худайның адын асхан? Ол чарыда чоохтапча: «Хайди син мағаа хынчазың, олар андағох хыныстығ ползыннар тіп паза мағаа оларнаң пір чӧптіг полар ӱчӱн» (Иоанн 17:26, НТ).

Богослов Уолтер Лоури пасхан: «Худайның адын пілбинчеткен кізі сынында ол хайдағ Худай полчатханын пілбинче... паза [андағ кізі], аны олаңай ла кӱс тіп пілчетсе, ағаа хын полбас».

Виктор неделя сай тигірибзер чӧрген, че ол Худайны сынап пілчем тіп сағынмаан. Ол сағысха кирче: «Анаң мин Худайның ады Иегова полчатханын піліп алғам. Мағаа мині аннаң таныстыр салғаннар тіп пілдірген. Мин аннаңар хаҷанох искем, че ам на танызып алдым тіп пілдірген. Худай мағаа тіріг личность пол парған, аннаң нанҷылазарға чарир».

Иегова аның адынаң адапчатханнарны аарлыға санапча паза оларға чағын полча. «Аның адынаңар сағынчатханнардаңар» ол молҷапча: «Хайди пабазы чоох истеечі оолғына айапча, мин оларға ідӧк айим» (Малахия 3:16, 17). Худай аның адын хығырчатханнарны сыйыхтапча. Библияда пазылча: «Хан Худайның [Иегованың, НТ] адын хығыртхан ноо даа кізі арачыланып алар» (Римдегілерге 10:13).