«Ӧлімге апарчатхан чазыхтығ кізі ӱреп парзох, аның худы адсар парыбысча, анда ол, „успас отта“ кӧйіп, ирееленче» (Катехизис католической церкви). Религиознай устағҷыларның піреелері адтағы кізі Худайға хаҷан даа чағын пол полбас тіп ӱгретчелер.

«Чазых итчеткен тын, ол ӧл парар» (Иезекииль 18:4). «Ӧліглер, тізең, пір дее ниме пілбинчелер» (Экклезиаст 9:5). Тын, ӧл парып, пір дее ниме пілбинчетсе, хайди ол «успас отта» мӧгі тус кӧйер паза, Худайға чағын пол полбин, ирееленер?

Библияда «ад» тіп удаа тілбестелчеткен пурунғы еврейлернің паза пурунғы гректернің сӧзі сынында прай чоннарның сыырадын таныхтапча. Кӧзідімге, Иов, ағырып, ирееленчеткенде, пазырған: «Син мині сыыратта [«адта», П. Юнгеровтың тілбестее] чазыр салған ползаң» (Иов 14:13, Современный перевод). Иов ирееленҷең алай Худайға чағын пол полбас орында нимес, че иреелерінең сыыратта позып аларға хынған.

Хазыр тудыныстығ Худайға кізінің чағын полары килбинче. Мексикада чуртапчатхан Росио чоохтапча: «Кічігдең ала мағаа адта кӧйчеткен оттаңар чоохтаҷаңнар. Мин уғаа хорыхчаң полғам, Худайның хайдағ-да чахсы качество пар тіп сағынмаам даа. Ол чабал паза хазыр тіп сағынғам».

Худайның чарғыларынаңар паза, кізі ӱреен соонда, аннаң ниме полчатханнаңар Библия ниме чоохтапчатханын піліп алғанда, Росио Худайдаңар кӧрізін саңай алыстырыбысхан. Ол чоохтапча: «Мин позып алғам, хайдағ-да аар чӱкті артыс салғам тіп пілдірген. Мин піліп алғам: Худай піске иң чахсызын пирерге хынча, ол піске хынча, мин дее ағаа хын полам. Ол палаларын холларынаң тутчатхан паза оларны хайраллапчатхан паарсах паба» (Исаия 41:13).

Кӧп кізі, адта кӧйерге хорығып, тигірибзер сыбыра чӧрче, че Худай сірерні аннаң на хорыххан ӱчӱн ағаа нымысчыланзыннар тіп хынминча. Иисус теен: «Худайыңа хын» (Марк 12:29, 30). Ағаа хоза, Худай хаҷан даа сын тудынчатханын пілчетсебіс, піске аның чарғыларына ізенерге оой арах полар. Иовтың нанҷызы Елиуй чіли, піске піди чоохтирға прай сылтағлар пар: «Сын Худай хаҷан даа хомай итпес паза Прай нимедең кӱстіг Худай хара сағыснаң хаҷан даа тудынмас!» (Иов 34:10).