Христианствоның «ӱс ӧӧн чардығы — католицизм, православие паза протестантизм — ӱс Сырайлығ пір Худайға киртінче: Худай Пабаа, Худай Оолғына паза Худай Ызых Хутха. Христианскай ӱгредіг хоостыра, олар ӱс худай нимес, че ол ӱс Сырай пір Худай полча» (Наа британскай энциклопедия).

Иисус, Худайның Оолғы, позын хаҷан даа Пабазына тиңзім алай Пабазынаң хада пір Худай полчам тібеен. Че ол теен: «Мин Пабамзар парчам... Пабам Миннең дее илбек» (Иоанн 14:28). Паза ӱгренҷілерінің пірсіне ол теен: «Мин Пабамзар паза Пабаңарзар, Худайымзар паза Худайыңарзар ӧӧрлеп парирбын» (Иоанн 20:17).

Ызых хут личность нимес. Библияда пастағы христианнарға «Худай Худы тол парған» тіп чоохталча. Ағаа хоза, Худай молҷаан: «Мин Позымның Худымны полғанына ла чай пирем» (Илҷілернің 2:1—4, 17). Ызых хут Троицаның чардығы нимес. Ол Худайның тоғынчатхан кӱзі.

Хайди католическай богословтар Карл Ранер паза Герберт Форгримлер чарыда чоохтапчалар, «Троица — ол чазыт... хайзын, ол сағаа азылбаза, піл полбассың, азыл парза даа, аны читіре піл полбассың». Танып полбас алай піл полбас кізее хын поларҷыхсар ба? Хайди кӧрчебіс, Троица Худайны піліп аларға паза ағаа хынып аларға харығ полчатхан ӱгредіг.

Маркоға, аның сӧстері пастағы статьяда пазылған, Троица харығ полған. Ол чоохтапча: «Худай миннең ол хайдағ Худай полчатханын чазырча тіп сағынғам. Ол сағыс аны миннең оортахтаң оортах иткен. Ол мағаа чазыт паза ағаа чағын пол полбас Худай полған». Че «Худай хорылыс Худайы нимес» (1 Коринфтегілерге 14:33, American Standard Version). Ол пістең Хайдағ Худай полчатханын чазырбинча, аны танызыннар тіп хынча. Иисус теен: «Піс... кемге пазырчатханыбысты, пілчебіс» (Иоанн 4:22).

Марко сағысха кирче: «Худай Троицаның чардығы полбинчатханын піліп алғамда ла, ағаа чағын полып алғам». Иегова піске хайдағ-да танып полбас ниме полбаза, че сынап личность полза, ағаа хынып аларға оой арах полар. Библияда чоохталча: «Худай — хыныс, аннаңар кем хын полбинча, ол Худайны пілбинче» (1 Иоанның 4:8).