Піреелеріне Худайға хынарға сидік. Худайны олар піл полбинчалар. Оларға ол чабал Худай паза кізілерге аның кирегі халбинча тіп пілдірче. Мына нинҷе-де кӧзідім:

• «Мин Худайға, полызығ сурынып, пазырғам, че мағаа ол кізілердең ырах паза чит полбас Худай тіп пілдірген. Ол мағаа абстрактнай, пір дее чувстволары чох ниме полған» (Марко, Италия).

• «Мин сынап Худайға нымысчыланарға хынғам, че ол андағ ырах пілдірген. Ол паарсап оңнабинча, кізілерні хатығлапча ла тіп сағынғам» (Роза, Гватемала).

• «Мин кічіг полғамда, Худай пісте алҷаастар паза хатығлирға ла сылтағлар тілепче тіп сағынғам. Соонаң піске Худайның кирегі халбинча тіп сағын сыххам. Ол мағаа премьер-министрге тӧӧй полған: хазна тоғыстарын итче, че кізілерге кирегі пір дее халбинча» (Раймонда, Канада).

Сірер чи, хайди сағынчазар? Худайға хынарға сынап сидік пе? Христианнар ол сурығдаңар чӱзер чыллар сағынчалар. Ортын вектерде христианнарның кӧбізі Прай ниме ит полчатхан Худайға пазырбаҷаңнар. Ноға? Кізілер аннаң уғаа тың хорыхчаңнар. Историк Уилл Дюрант піди теен: «Хайди олаңай ла, чазыхтығ кізі, хорыхпин, андағ пӧзік паза уғаа хорығыстығ Худайзар пазырыснаң айлан полар?»

Хайди Худай кізілернің харағында «андағ пӧзік паза уғаа хорығыстығ Худай» пол парған? Сынында Библия нимее ӱгретче? Худайдаңар сын ағаа хынып аларға сірерге полыс пирер бе?