Мария: Светлана, изеннер. Ибде полтырзар, тоғазарға ӧріністіг.

Светлана: Мағаа даа.

Мария: Мындаа тоғасханда, Худай кізілернің иреелеріне хайди хайчатханнаңар чоохтасхабыс *. Пу сурығ сірерні іҷеңер аварияа кір парғаннаң сығара сағыссыратча теезер. Аның хазии ам хайдағ?

Светлана: Хаҷан хайди. Ам чахсы арах пілдірче.

Мария: Анзы чахсы. Кӧңніңерні тӱзірбеске сидік полча полар.

Светлана: Я. Аның ирееленчеткенін кӧріп, холларым саңай тӱс парча.

Мария: Сірерге оой нимес. Сағысха кирчезер бе? Мындаа мин сірерге Худайның иреелерні тохтадыбызарға кӱзі пар полза, ноға ам даа кізілер ирееленчелер тіп сурыға нандырығ таап пирем теем.

Светлана: Я, ундутпаам.

Мария: Библияда пу сурыға нандырығ пар. Че пастап мындаа чоохтасхан сағыстарны сағысха кир кӧреелер.

Светлана: Че.

Мария: Хайди піліп алғабыс, Худайға киртістіг нымысчылар даа ноға Худай иреелерні чох итпинче тіп сурығ турғысчаңнар. Пір ухаанҷы іди сурғанда, Худай аны пыролабаан. Ол ағаа: «Киртінізің читпинче», — тібеен.

Светлана: Анзын пілбеен полғам.

Мария: Ідӧк пістің ирееленчеткенібістің ӱчӱн Иегова Худайның чӱрее ағырчатханын кӧргебіс. Кӧзідімге, Библияда «оларның полған на иреезі ағаа ирее ағылҷаң» тіп пазылча *. Худай пістеңер сағыссырапчатханын пілгені часхарыстығ нимес пе?

Светлана: Я.

Мария: Піс чооғыбысты Чайаачының кӱзі уғаа илбек паза ол пістің иреелерібісті хайдағ даа туста тохтат полар тіп сағыснаң тоосхабыс.

Светлана: Ол сағыс мағаа пілдістіг нимес. Иреелерні чох идібізерге Худайның кӱзі пар полза, ноға ам даа андағ хорғыстығ киректер полчалар?

Мария: Піс ӱзӱрчеткен сурыға нандырығ таап алар ӱчӱн, Библияның пастағы киндезін, Бытиені, кӧр кӧреелер? Адамнаң Евадаңар паза чи́рге чарадылбаан нимістеңер чоохты пілчезер бе?

Светлана: Я, мин аннаңар хайда-да искем. Худай пір ағастың нимістерін чи́рге чаратпаан, олар, тізең, аның чооғын испин, ол ағастың нимізін чееннер.

Мария: Орта. Кем Адамнаң Еваны чазых идерге кӧӧктірген? Пу сурыға нандырығ ноға кізілер ирееленчеткенін піліп аларға полыс пирер. Бытие 3-ҷі пастағда 1-ғы стихтаң 5-ҷі стихха читіре хығыр пирерзер бе?

Светлана: Хығыр пирем. «Чылан Иегова Худай чайаан аңнарның иң китенҷігі полған. Чылан, ипчі кізінең чоохтазып, аннаң сурған: „Худай сірерге сынап садта пір дее ағастаң чирге чаратпаан ма?“ Ипчі кізі ағаа нандырған: „Садтағы ағастарның чистектерін піске чирге чарир. Че садтың ортызындағы ағастың чистектерінеңер Худай теен: „Ӧл парбас ӱчӱн, аннаң чібеңер паза ағаа теңмеңер“. Чылан чооғын узаратхан: „Чох, сірер ӧлбессер. Че Худай пілче: ол ағастаң чібіскен кӱндӧк харахтарың азыл парар паза сірер чахсы-чабалны, Худай чіли, пілерзер“».

Мария: Алғыс. Пу кизекті кӧмес ӱзӱр кӧреелер. Пастағызын, Еванаң чылан чоохтасханына хайығ салыңар. Библияның пасха киндезінең Еванаң Сайтан Дьявол чоохтасханы кӧрінче *. Сайтан Еваа Худайның пір ағаснаң палғалыстығ чахиинаңар сурығ турғысхан. Сизіндер бе: Адамнаң Ева ол ағастың нимізін чібіскен ползалар, Худай оларны хайди хатығлирҷых?

Светлана: Олар ӧл парарҷыхтар.

Мария: Орта. Кӧріңер, Сайтан хайди Худайны пыролыбысхан. Сайтан теен: «Чох, сірер ӧлбессер». Пасха сӧстернең чоохтаза, Сайтан Худайны чойланған тіп пыролаан!

Светлана: Мин аннаңар хаҷан даа испеем.

Мария: Худай чойланча тіп пыролаанда, Сайтан ӱр тус пӧгер сурығ кӧдірген. Оңнапчазар ба: ноға пу сурығны сах ол туста пӧгерге оңдай чох полған?

Светлана: Читіре оңнап полбинчам.

Мария: Кӧзідімге, мин сірердең кӱстігбін тіпчем. Кем кӱстіг, хайди піліп аларға?

Светлана: Пілбинчем дее, марығлас кӧрерге чарир.

Мария: Я, орта. Кӧзідімге, пірее аар нимені кӧдір кӧрерге. Кем кемнең кӱстіг піліп аларға сидік нимес.

Светлана: Іди полар.

Мария: Че сурығ кӱстеңер нимес, кізі чойланминчатханнаңар полза чи? Аны пасха оңдайнаң пӧгерге кирек, я?

Светлана: Я.

Мария: Сынап таа, чойланминчатханыңны, марығлазып, кӧзіт полбассың.

Светлана: Орта тіпчезер.

Мария: Пу сурығны пір ле оңдайнаң пӧгіп аларға чарир — кем чойланчатханын, кем чойланминчатханын пасхалары кӧріп алзыннар тіп, тус кирек.

Светлана: Пасха оңдайнаң пӧк полбас.

Мария: Ам Бытиеде ниме чоохталчатханын хатап кӧр кӧреелер. Сайтан Худайдаң кӱстігзім теен ме?

Светлана: Чох.

Мария: Худай кӱзін сах андох кӧзіт пирерҷік. Че Сайтан, Худай чіли, алаахтырбинчам теен. Пасха сӧстернең чоохтаза, ол Еваа піди теен: «Худай сірерні алаахтырча. Мин, тізең, сынны чоохтапчам».

Светлана: Хынығ даа.

Мария: Худай хыйға, аннаңар кем чойланча, кем сынны чоохтапча піліп алар ӱчӱн, тус кирек полчатханын ол пілген.

Светлана: Ева ӱреп парғанда, Худайның чойланмааны кӧрін парбаан ма?

Мария: Еваның ӱреп парғаны Сайтан кӧдірген сурығның чардығына нандырған. 5-ҷі стихты хатап кӧр кӧріңер. Еваа ол паза ниме теен?

Светлана: Харахтары азыл парар теен.

Мария: Я. Ол «чахсы-чабалны, Худай чіли, пілерзер» теен. Сынында, пу сӧстернең Сайтан Худай кізілердең хайдағ-да чахсы ниме чазырча теен.

Светлана: Пілдістіг.

Мария: Іди Сайтан Худайдаң тоғыр уғаа аар пыролас кӧдірген.

Светлана: Хайдағ?

Мария: Сынында, Сайтан Еваа даа, прай даа кізілерге, Худайның ӱлгӱзі чох полза, чахсы поларҷых теен. Иегова пілген: пу сурыға нандырығ таап алар ӱчӱн, Сайтанға устап кӧрерге тус пирерге кирек. Аннаңар Худай ағаа чир-чалбахтың устағҷызы поларға оңдай пирген. Аннаңар ибіре анҷа кӧп ирее — чир-чалбахнаң Худай нимес, Сайтан устапча *. Че Худай пісті тастабыспаан.

Светлана: Нимедеңер чоохтапчазар?

Мария: Библия Худайдаңар ікі аарлығ сынны асча. Пастағы сын: піс ирееленчетсебіс, Иегова пісті артыспинча. Анзы Давид ханның сӧстерінең кӧрінче. Ол сӧстер Псалом 31:7-де пазыл парғаннар. Давид чуртазында кӧп ирее кӧрген, че кӧріңер, Худайға пазырчатханда, ол ниме теен. Пу стихты хығырыбызарзар ба?

Светлана: Я, мында чоохталча: «Синің хыныстығ паарсазыңны кӧріп, прай чӱреемнең ӧрінем. Син минің чобалызымны кӧрчезің нооза. Син кӧрчезің, хайди мағаа аар».

Мария: Давид ирееленген полза даа, Иегова аның иреелерін кӧрчеткенін пілгені ағаа кӱс кирген. Иегова пістің чобалыстарыбысты, пасха кізілер піл полбинчатса даа, піл полча. Пу сағыс часхарыстығ нимес пе?

Светлана: Я, часхарыстығ.

Мария: Ікінҷі аарлығ сын: Худай иреелерні тохтат салар. Библияда Худай Сайтанның устаанын ӱр ниместең чох идібізер тіп чоохталча. Худай хыйалларның паза саайларның салтарларын, оларның санында, сірернің іҷеңер дее кірген саайның салтарларын саңай чох идібізер. Тігі неделяда киліп, Худай прай иреелерні хайди даа чох идібізеріне ноға киртінерге чарир тіп сурыға нандыр пирем *.

Светлана: Че, чоохтазарбыс.