Минің іҷе-пабам Испанияда, Галисияда, кічиҷек ферма тутхан. Пістің сӧбіреде сигіс пала полған. Мин тӧртінҷі пала полғам. Піс уғаа ынағ чуртаабыс. Ол туста Испанияда духовнай семинариязар алай монастырьзар полған на сӧбіре пала ызарға кирек полған. Пістің сӧбіре ӱс пала ысхан.

Мағаа 13 час тол парғанда, мині Мадрид хыриндағы монастырьзар пирібіскеннер. Ол туста пиҷем анда полған. Анда чуртас уғаа хазыр полған. Ынархасха орын чох полған. Правилолар, аскетизм паза пазырыс ла полған. Иртен сай пісті часовняда Худайдаңар тирең сағынарға чыып алҷаңнар. Минің пазымда пір дее сағыс чох полҷаң. Соонаң піс анда религиознай гимннер сарнаҷаң полғабыс. Анаң мессада араласчаң полғабыс. Ол нимелер латынь тілінең иртчең. Мин пір дее ниме піл полбаҷаң полғам. Аннаңар Худайға чағын полып аларға оңдай чоғыл тіп пілдірҷең. Мин кӱн тооза монастырьда, пір дее ниме чоохтанмин, сым на пас чӧрҷең полғам. Пиҷемнең тоғас парзабыс: «Ап-арығ Мария хысха сабланыс!» — тіп изеннезерге ле чарадалҷаң. Піске пиҷемнең обед соонда чарым час ла чоохтазарға чарадылҷаң. Андағы чуртас ибдегі чуртастаң саңай пасха полған. Мағаа чалғысханзым тіп пілдірҷең. Мин удаа ылғаҷаң полғам.

Худай мағаа хаҷан даа чағын полбаан. Че мин 17 частығда, обет пиріп, монахиня полып алғам. Сынында мин, пасхаларының кӧңнін толдырып, монахиня пол парғам. Соонаң мин монахиня пол поларымда ікінҷілеп сыххам. Монахинялар ікінҷілепчеткеннер адта кӧйерлер тіп хорыхтырҷаңнар. Че анзы минің ікінҷілестерімні чох ит полбаан. Мин пілгем: Иисус кізілердең оонаң тудынмаҷаң. Ол хаҷан даа кізілер аразында полҷаң. Оларға полысчаң паза ӱгретчең (Матфей 4:23—25). Чибіргі час тол париғанда, анда поларым килбинібіскен. Ідӧк настоятельница: «Ікінҷілепчетсең, парыбыс» — тіп чӧп пирген. Сынында ол мині пасха монахиняларға влиять полар тіп хорыххан полар. Аннаңар мин, монастырьдаң парыбызып, ибзер айланғам.

Іҷемнең пабам мині уғаа чылығ удурлааннар. Пістің аалда тоғыс чох полған, аннаңар мин Германиязар харындазымзар парыбысхам. Ол Испаниядаң сыххан коммунисттернің пірсі полған. Мин оларнаң табырах тіл алызып алғам. Олар тоғысчыларның праволарының ӱчӱн, ир кізі паза ипчі кізі пір тиң праволығ ползын тіп, харбасханнар. Аннаңар мин партияа кіріп алғам паза коммунистке ирге парыбысхам. Коммунисттернің пічіктерін тарат чӧргені паза протест марштарында аралас чӧргені кирек ниме тіп санаам.

Пола-пола мин сизін сыххам: олар пір ниме чоохтапчалар, че пасха оңдайнаң тудынчалар. Аннаңар мин пазох ікінҷілеп сыххам. Олар 1971 чылда Испанияның Франкфурттағы консульствозын ӧртебіскеннер. Іди олар Испаниядағы диктаторскай режимнең харбасханнар. Че мин андағ киректерге хырт кӧрҷем.

Пастағы палам тӧреенде, иріме коммунисттернің чыылығларына паза чӧрбессім теем. Ол нанҷыларның пірдеезі паламны кӧрерге килбеен. Мағаа пазох чалғысханзым тіп пілдірген. Мин чуртастың смыслынаңар сағын сыххам. Чир-чалбахты алыстыр полар ба тіп сағын сыххам.

1976 чылда Иегованың ікі киречізі піссер килген. Олар Библияда тӧстелген пічіктер артыс салғаннар. Олар хатап килгенде, мин оларға иреелердеңер, несправедливостьтаңар паза неравенстводаңар кӧп сурығлар турғысхам. Мағаа хайхастығ полған: олар прай сурығларға Библия хоостыра нандырығлар пиргеннер. Мин андадох Библия ӱгрен сыххам.

Пастап мин піліс ле алып алар ӱчӱн ӱгренгем. Соонаң піс ирімнең Иегованың киречілерінің залынзар чӧр сыххабыс. Ол тусха пістің ікі пала полған. Иегованың киречілері пісті Залзар ағылҷаңнар паза Залда палалар кӧрерге полысчаңнар. Мин ол чахсы кізілерге уғаа тың хыныбысхам.

Че оларның ӱгредіглерінеңер минің сурығлар халған. Аннаңар мин Испаниязар туғаннарымзар парғам. Минің тайым абыс полған. Ол мині Библия ӱгренмеске чӧптеен. Че андағы Иегованың киречілері, Германиядағы Киречілер чіли, Библия хоостыра прай сурығларыма нандырып, мағаа полыс пиргеннер. Мин ибзер киліп оларнаң хада Библияны аннаң андар ӱгренерге пӧгін алғам. Минің ирім Библия ӱгренмин сыххан. Че мин позымның пӧгінімні тастабаам. 1978 чылда, кіреске тӱзіп, Иегованың киречізі полып алғам.

Библияның сыннарын піліп алғаны мағаа чуртастың смыслын таап аларға паза турыстығ пӧгіннер турғызарға полысча. Кӧзідімге, 1 Петрның 3:1—4 стихтарда ипчі кізее ирінің чооғын улуғласнаң истерге паза Худайның кӧңніне кірчеткен амыр кӧңніліг поларға чоохталча. Пу принциптер мағаа пӱӱнге кире чахсы ипчі паза чахсы іҷе поларға полысча.

Мин 35 чыл Иегованың киречізі пол парим. Худайға аның илбек сӧбірезінде нымысчыланып, уғаа часкалығбын. Минің 5 пала. Тӧрт палам олох чолҷа парча. Мин анзына уғаа тың ӧрінчем!