Мин Рим хыринда тӧреем паза ӧскем. Анда, кӧбізін, чох-чоос чон чуртаан. Минің чуртазым ниик полбаан. Іҷемні хаҷан даа кӧрбеем, пабамнаң киліс полбаҷаң полғам. Аннаңар мин чуртасха тасхар ӱгренгем.

Он час тузында мин оғыр ит сыххам, он ікі частығда пастағызын ибдең тизібіскем. Пабам мині полицейскай участоктаң нинҷе-нинҷе хати сығарҷаң. Прайзына харысчаң паза чабалланҷаң полғам. Он тӧрт час тол парғанда, мин ибдең саңай парыбызып, тасхар чуртап сыххам, наркотиктернең айғас сыххам. Хонҷаң чир чох полған, аннаңар мин машиналарны азып алып, анда хонып алҷаң полғам. Иртен чуунарға фонтан таап алҷаң полғам.

Мин оғыр кирегінде саңай ус пол парғам. Оох-теек нимелер ле нимес, квартираларға паза тураларға кіріп, оғыр итчең полғам. Мин осхас кізілернің аразында минің репутациям кӧдіріл парған. Ӱр ниместең мині бандаа алып алғаннар. Анзы мағаа аннаң андар ус полып одырарға полысхан. Піс олаңай ла оғыр итчең полбаабыс, банктарға кірҷең полғабыс. Хазыр хылығымның ӱчӱн, мині бандада улуғлаҷаңнар. Сыбыра пистолет ал чӧрҷең полғам, хараазын даа ол минің подушкам алтында чатчаң. Минің чуртазым кӱстегнең, наркотиктернең, оғыр кирегінең, хырызыныснаң паза сайбах тудыныснаң палғалыстығ полған. Полиция мині тілеп чӧрҷең. Нинҷе-де хати мині арестовывать полып, харибге одыртханнар.

Пірсінде, харибдең сыххан соонда, мин туғанымзар ааллап парғам. Ол паза аның ікі оолғы Иегованың киречілері полғаннар. Олар мині постарының чыылығларына хығырғаннар. Мин андар, кӧріп ле алар ӱчӱн, парғам. Оларның Залында ізік хыринда одыр салғам. Кем андар кірер паза сығар, кӧріп одырғам. Пистолет миннең хада полған.

Ол чыылығ чуртазымны саңай алыстырыбысхан. Мин пасха планетадазым ма тіп сағынғам. Олар мині паарсаснаң удурлааннар. Оларның паарсастығ, чой нимес харахтарын ам даа ундутпинчам. Олар саңай пасха кізілер полғаннар!

Мин Иегованың киречілерінең Библияны ӱгрен сыххам. Нинҷе кӧп піліп одырғам, анҷох кӧп пілінгем: «Мағаа чуртазымны саңай алыстырарға кирек». Притчи 13:20-гі чӧп минің чӱрееме теңен. Анда пазылча: «Хыйғаларнаң чӧрчеткен кізі хыйға полар, алығларнаң чӧрчеткен кізі, тізең, чобаға кір парар». Мин піліп алғам: «Мағаа бандадаң парыбызарға кирек». Оой полбаза даа, Иегова мағаа бандадаң сығып аларға полыс пирген.

Мин прай саринаң арығ поларға пӧгін алғам. Уғаа кӧп кӱс саларға киліскен. Тамкынаң наркотиктерні тастабызарға уғаа сидік полған. Узун састарымны кис тастабысхам, хулахтарымнаң ызырғыларны суур салғам паза хырызынминыбысхам. Пастағызын на позымны холда тут сыххам.

Мин хығырарға паза ӱгренерге хаҷан даа хынмаҷаң полғам. Библия ӱгренчеткен туста сағыстарымны орында тударға уғаа сидік полған, че мин тың кӱстенгем. Кӧместең мин Иеговаа тыңнаң тың хын сыххам, анаң алыс сыххам. Минің совезім тоғын сыххан. Удаа позым позымның кӧңніме кірбинчеткем. Прай мин иткен чабал киректернің ӱчӱн Иегова минің пыромны тастап полар ба тіп ікінҷілепчеткем. Андағ тустарда, хайди Иегова Давид ханның пырозын тастааннаңар хығыр турғам. Анзы минің кӧңнімні уғаа кӧдірген (2 Самуила 11:1—12:13).

Иблеп нымысчылан чӧрерге мағаа уғаа сидік полған (Матфей 28:19, 20). Мының алнында мин хомай иткен кізее тоғас парарымнаң уғаа тың хорыххам. Кӧместең хорыхханымны тобырып алғам. Пасхаларына пыро тастирға хынчатхан Пабабыснаң танызарға полысчатханыма уғаа тың ӧрін сыххам.

Иеговадаңар пілістер минің чуртазымны ал халғаннар! Нанҷыларым полған кізілернің кӧбізі пӱӱн ӧліглер алай харибде одырғлапчалар. Минің чуртазым, тізең, смысллығ пол парған, ам мин алнынзар ізестіг кӧрчем. Мин пазымнығ паза сӧс истеечі поларға ӱгреніп алғам. Позымның чабал хылығымны холда тударға ӱгреніп алғам. Кізілерге мин ам чахсы хайчам. Мин уғаа сіліг ипчінең часкалығ хоныхта чуртапчам. Аның ады Кармен. Піс аннаң хада кізілерге Библиянаң танызарға полысчабыс. Анзы піске уғаа кӧп ӧрініс ағылча.

Ам мин оғыр итпинчем, тоғынчам. Тоғызым хоостыра пірееде банктарзар килчем, че пистолетнең нимес, кӧнекнең швабра тудынып алып, килчем.