Сағын кӧріңер, пабазы оолғынаң чоохтасча. Пабазы оолғына піди тіпче: «Худай хаҷанох прай чирдегі нимелерні чайап салған. Ідӧк Худай кӱнні, айны паза чылтыстарны чайап салған». Читі частығ палазы, кӧмес сағынып алып, сурча: «Кем Худайны чайап салған?»

Пабазы ағаа нандырча: «Аны пірдеезі чайабаан. Ол сыбыра полған». Читі частығ палаа андағ нандырығ чит парча. Че кӧмес ӧзіп алып, ол сурыға ол пазох айланча. Ол піл полбинча: «Хайди пасталбаан ниме полар? Тилекей дее хаҷан-да пасталған нооза. Андағда Худай хайдаң килген?»

Библия пу сурыға хайди нандырча? Сынында, пістің кӧзідімдегі пабаох чіли. Моисей пасхан: «О Иегова, Тағлар тӧрир алнындох син чирні паза тилекейні чайап салғазың, вектең векке син Худайзың» (Псалом 90:1, 2). Исаия ухаанҷы, тізең, піди теен: «Пілбинчезің ме? Испеезің ме? Чир хыриларын чайап салған Иегова — вектерге Худай»! (Исаия 40:28). Иуда позының пічиинде, оларох чіли, Худайны «пастағызынаң ала хаҷанға даа» Худай тіп адапча (Иуданың 25).

Библияның пу стихтары «Худай мӧгі тустың Ханы» полчатханын кӧзітчелер (1 Тимофейге 1:17, НТ). Анзы Худайның хаҷан даа полғанын паза хаҷан даа поларын кӧзітче (Азых чоох 1:8). Мӧгі тус чуртапчатхан Худай ла прай нимедең кӱстег Худай пол полар.

Ноға піс анзын читіре піл полбинчабыс? Піс тустаңар, Худай чіли, сағынып оңнабинчабыс. Худай хаҷан даа чуртапча, аннаңар ағаа пір муң чыл пір кӱн осхас (2 Петрның 3:8). Кӧзідімге сарысха: ол 50-ҷе кӱн чуртапча. Ол кем-де 70 алай 80 чыл чуртапча тіп сағын поларҷых па? Уғаа ікінҷілестіг. Библия пісті Илбек Чайаачының хыринда сарысха осхастар тіпче. Аннаңар піс Худайның хыринда саңай асхынах пілчебіс (Исаия 40:22; 55:8, 9). Анзы хайхастығ нимес. Худай пістең хай-хай пӧзік.

Худайның хаҷан даа полғанын піліп аларға сидік полза даа, ол орта сағыс. Худайны кем-де чайаан полза, ол Чайаачы поларҷых. Че Библияда Иеговадаңар ла прай нимені чайап салған тіп пазылча (Азых чоох 4:11). Ағаа хоза, хаҷан-да тилекей чох полған (Бытие 1:1, 2). Хайди ол пар пол парған? Тилекейні чайаан Чайаачы тилекейнің алнында поларға кирек полған. Ідӧк ол прай чайаахтардаң, позының чалғыс Оолғынаң паза ангеллердең пурун поларға кирек полған (Иов 38:4, 7; Колосстағыларға 1:15). Іле кӧрінче: нинҷе-де тус Худай чалғысхан полған, аннаңар аны пірдеезі чайап полбасчых.

Пістің чуртапчатханыбыс паза мындағ илбек тилекей пары, мӧгі тус чуртапчатхан Худай парын киречілепче. Пу илбек тилекейні тоғындырт салған паза ағаа чахығлар пирген Чайаачы хаҷан даа поларға кирек полған. Ол ла прай тіріг нимее чуртас пир поларҷых (Иов 33:4).