Кирилл: Дмитрий, сірернең хада Библиядаңар * чоохтазарға минің кӧңніме уғаа тың кірче. Мындаа сірер Худайның Хан-ӱлгӱзінеңер сурығ турғысхазар. Ноға Иегованың киречілері Худайның Хан-ӱлгӱзі 1914 чылдаң сығара устап пастаанына киртінчелер тіп сурғазар.

Дмитрий: Сірер пирген пір брошюрада Худайның Хан-ӱлгӱзі 1914 чылдаң устап пастаан тіп пазыл парған. Анзы мағаа хынығ пілдір парған, сірер прай ӱгредіглерің Библияда тӧстелче тіп чоохтапчазар нооза.

Кирилл: Я, анзы андағ.

Дмитрий: Мин Библияны прай хығырыбысхам, че анда 1914 чылдаңар пір дее ниме пазылбинча. Онлайн-Библияда 1914 чылны тілеемӧк, че анда даа таппаам.

Кирилл: Дмитрий, пастап сірерні Библияны прай хығыр салған ӱчӱн махтирға хынчам. Худай Сӧзіне хынчатханнарың кӧрінче.

Дмитрий: Я, Библия осхас кинде паза чоғыл!

Кирилл: Мин ідӧк сағынчам. Ікінҷізін, нименің ӱчӱн махтирға хынчам: сірер, сурыға нандырығ тілеенде, Библиязар айланғазар. Библия пісті піліп оңнаанын «тілирге» * кӧӧктірче нооза. Сірер андағ кӱстенҷік істезігҷізер.

Дмитрий: Алғыс. Мин Библияны ӱгренерге хынчам. Мин мында істес кӧргем, піс ӱгренчеткен киндеде 1914 чылдаңар пір ниме таап алғам. Анда пір хан ағастаңар тӱс кӧрче. Ол ағасты узурыбысчалар, анаң ол хатап ӧс сыхча. Ну, хайди-да іди.

Кирилл: Я, прай орта чоохтапчазар. Пу ухаанҷылас Даниилнің киндезінде 4-ҷі пастағда пазылча. Анда Вавилонның ханының, Навуходоносорның тӱзінеңер чоохталча.

Дмитрий: Я, мин ол ухаанҷыласты нинҷе-де хати хығыр салғам, че піл полбаам: «Хайди Худайның Хан-ӱлгӱзі 1914 чылнаң палғалыстығ?»

Кирилл: Пілчезер бе, Даниил ухаанҷы, Худай ағаа пирген сағыстарны пасханда, позы даа оларны читіре оңнап полбаан!

Дмитрий: Сынап па?

Кирилл: Я, кӧріңер Даниил 12:8-те ниме чоохталча: «Мин искем, че оңнап полбаам».

Дмитрий: Мағаа тӧӧй кізілер парох полтыр. Анзы ӧріндірче.

Кирилл: Андада пу ухаанҷыласты чарыда чоохтирға тус читкелек полған. Аннаңар Даниил аны піл полбаан. Ам, тізең, піс ол ухаанҷыласты оңнап полчабыс.

Дмитрий: Хайдаң пілчезер?

Кирилл: Пасха стихты кӧр кӧреелер. Даниил 12:9-та чоохталча: «Пу сӧстерні чазытта тударға паза тӱгенҷі кӱннерге читіре пиктеп саларға кирек». Кізілер ол ухаанҷыластарны, кӧп чыллар ирт парған соонда ла, тӱгенҷі кӱннерде піліп аларға кирек полғаннар. Хайди піс Библия ӱгредиинде кӧрербіс, киречілестер піс ам сах ол туста чуртапчатханыбысты кӧзітчелер *.

Дмитрий: Андағда сірер мағаа Даниилнің ухаанҷылазын чарыда чоохтап поларзар, я?

Кирилл: Кӱстен кӧрем.

Кирилл: Пастап Навуходоносор хан тӱзінде ниме кӧргенін кӧр кӧрербіс. Анаң ол тӱс ниме таныхтапчатханын ӱзӱрербіс.

Дмитрий: Чахсы.

Кирилл: Навуходоносор тӱзінде тигірге читіре ӧс парған чоон ағасты кӧрген. Анаң ол хайди Худайның искірігҷізі ол чоон ағасты узурыбызарға чоохтаанын ис салған, че Худай ол узурыбысхан ағастың тӧкпезін чилегелерінең хада чирде артыс саларға чахаан. «Читі тус» * пазынаң ағас хатап ӧс сыххан. Иң пастағызын пу ухаанҷылас Навуходоносор ханда толған. Навуходоносор илбек хан полған полза даа, аны, чоон ағасты чіли, «читі тусха» узурыбысханнар. Анаң ниме полғанын сағысха кирчезер бе?

Дмитрий: Чох, ундут салтырбын.

Кирилл: Хайтпас. Библияда Навуходоносор читі чылға сағысха уйан пол парған тіп чоохталча. Аннаңар ол читі чыл хазнанаң устап полбаан. Читі тус пазынаң Навуходоносорға сағызы хатап айлан килген. Ол хатап, хан полып, устап сыххан *.

Дмитрий: Анзы пілдістіг. Че хайди Худайның Хан-ӱлгӱзі 1914 чылнаң палғалыстығ?

Кирилл: Пу ухаанҷылас ікі хати толған. Пастағызын, Навуходоносор ханның ӱлгӱзі ӱзіл парғанда, ікінҷізін — Худайның ӱлгӱзі ӱзіл парғанда. Ухаанҷылас ікінҷізін толғаны Худайның Хан-ӱлгӱзінең палғалыстығ.

Дмитрий: Ухаанҷылас ікі хати толғанын хайдаң пілчезер?

Кирилл: Иң пастағызын, анзына ухаанҷылас позы кӧзітче. Даниил 4:17 хоостыра, ол ухаанҷылас «кізілернің хан-ӱлгӱлері Иң пӧзіктің холында полчатханын паза аны кемге хынза, ағаа пирчеткенін... пілзіннер тіп» пирілген. «Кізілернің хан-ӱлгӱлері» тіп пазылғанын сизіндер бе?

Дмитрий: Я, мында «кізілернің хан-ӱлгӱлері Иң пӧзіктің холында» тіп чоохталча.

Кирилл: Орта. Хайди сағынчазар, «Иң пӧзік» кемдір ол?

Дмитрий: Худай нимес пе?

Кирилл: Хап-орта. Кӧрчезер бе, пу ухаанҷылас Навуходоносордаңар ла нимес. Ідӧк ол «кізілернің хан-ӱлгӱлерінең» палғалыстығ. Пу ухаанҷылас Худай прай чоннарнаң устапчатханнаңар ухаанҷылас тирге чарир. Анзын контекст іле кӧзітче.

Дмитрий: Нимедеңер чоохтапчазар?

Кирилл: Даниилнің киндезінің ӧтіре пір ӧӧн тема парча. Анда Худайның Оолғы Иисус Христос устир Хан-ӱлгӱдеңер нинҷе-нинҷе хати чоохталча. Даниил 2:44 кӧр кӧреелер. Хығыр пирерзер бе?

Дмитрий: Че. Мында чоохталча: «Ол ханнарның кӱннерінде тигірдегі Худай хаҷан даа иңзерілбес Хан-ӱлгӱ турғызыбызар. Ол Хан-ӱлгӱ пасха чоннарға пирілбес. Ол прай чирдегі ӱлгӱлерні иңзерібізер паза хырыбызар, позы, тізең, мӧгі тус турар».

Кирилл: Алғыс. Пу стихта Худайның Хан-ӱлгӱзінеңер чоохталча нимес пе?

Дмитрий: Пілбинчем, ікінҷілестіг.

Кирилл: Кӧріңер, Хан-ӱлгӱ «мӧгі тус турар» тіп пазылча. Кізілернің ӱлгӱлерінеңер іди чоохтап полбас, че Худайның Хан-ӱлгӱзінеңер іди чоохтирға чарир ба?

Дмитрий: Андағ полар.

Кирилл: Даниил 7:13, 14-те Худайның Хан-ӱлгӱзінеңер паза пір ухаанҷылас пазылча. Ол ухаанҷыласта піди чоохталча: «Прай чоннар, тӧллер паза аймах-пасха тіллернең чоохтасчатханнар ағаа нымысчыланзыннар тіп, ағаа ӱлгӱ паза хан-ӱлгӱ пирілген. Аның устааны вектерге, хаҷан даа ӱзілбес. Паза аның хан-ӱлгӱзі иңзерілбес». Пірее таныс сӧстер кӧрчезер бе?

Дмитрий: Хайдағ-да хан-ӱлгӱдеңер чоох парча.

Кирилл: Я, орта. Че хайдағ-да хан-ӱлгӱ нимес. Кӧріңер, ол Хан-ӱлгӱ «прай чоннарнаң, тӧллернең паза аймах-пасха тіллернең» устир. Пасха сӧстернең чоохтаза, ол Хан-ӱлгӱ прай чир ӱстӱнең устир.

Дмитрий: Сынап таа, анзына кирегім халбаан.

Кирилл: Кӧріңер, пу ухаанҷыласта, ағаа хоза, піди пазылча: «Аның устааны вектерге, хаҷан даа ӱзілбес. Паза аның хан-ӱлгӱзі иңзерілбес». Даниил 2:44-те пазылған ухаанҷыласха тӧӧй нимес пе?

Дмитрий: Я, тӧӧй.

Кирилл: Ниме ӱзӱрібістібіс сағысха кир кӧреелер. Даниилнің 4-ҷі пастаанда ол ухаанҷылас «кізілернің хан-ӱлгӱлері» алай прай чоннар «Иң пӧзіктің холында полчатханын... пілзіннер тіп» пирілген. Анзы ол ухаанҷылас Навуходоносорда ла нимес, че хай-хай алғым толарын кӧзітче. Даниилнің киндезінде Худайның Хан-ӱлгӱзінеңер паза аның Ханы полчатхан Худайның Оолғынаңар пасха даа ухаанҷыластар пар. Хайди сағынчазар, прай пу нимелерні санға алза, Даниилнің 4-ҷі пастаандағы ухаанҷылас Худайның Хан-ӱлгӱзінең палғалыстығ тирге чарир ба?

Дмитрий: Я, чарир. Че мин ам даа аны 1914 чылнаң палғалыстыр полбинчам.

Кирилл: Хайди піс кӧргебіс, пу ухаанҷыласта, пастағызын, ағас Навуходоносор полған. Ағасты узурыбызып, читі чылға артыс салғаннарында — ол сағысха хомай пол парғанда — аның ӱлгӱзі ӱзіл парған. Навуходоносорның сағызы айлан киліп, ол хатап хан пол сыхханда, ол тус тоозыл парған. Ухаанҷылас ікінҷізін толғанда, Худайның ӱлгӱзі нинҷе-де тусха ӱзіл парған. Че анзы Худай хомай устағҷы полған ӱчӱн нимес.

Дмитрий: Хайди?

Кирилл: Библия пазылған тустарда Иерусалимде устаан израильскай ханнардаңар олар Иегованың сіреезінде одырчалар тіҷеңнер *. Ол ханнарға Худай ӱлгӱ пирген, аннаңар олар аның сіреезінде одырғаннар. Че ол ханнарның кӧбізі Худайға киртістіг полбааннар, аннаңар ол чон ідӧк Худайның чооғын испин сыххан. Прай ол киректернің ӱчӱн Худай п. э. алнында 607 чылда израильтяннарны вавилоняннарның холына пирібіскен. Ол чылдаң сығара пір дее кізі Иерусалимде Иегованың сіреезінде одырбаан, андағ оңдайнаң Худайның ӱлгӱзі ӱзіл парған. Піл полдар ба?

Дмитрий: Я, пілдістіг.

Кирилл: Аннаңар п. э. алнында 607 чылда «читі тус» алай Худайның ӱлгӱзі ӱзіл парған тус пасталыбысхан. Читі тус тоозыл парза, Худайның сіреезінде одырчатхан устағҷы тигірдең устирға килерге кирек полған. Андада Даниилнің киндезінең пайаа хығырған ухаанҷыластар тол парарҷыхтар. Ам піліп аларға кирек, хаҷан читі тус тоозыл парған? Пу сурыға нандырығ таап алзабыс, Худайның Хан-ӱлгӱзі хаҷан устап пастаанын піліп аларбыс.

Дмитрий: Пілдім, 1914 чылда тирзер бе?

Кирилл: Я, хап-орта.

Дмитрий: Че хайдаң пілчезер?

Кирилл: Иисус чирде чуртаанда, читі тус тоозылғалах полған *. Читі тус, ол уғаа ӱр тус. Ол тус Иисустың чирзер килерінең чӱзер чыллар алнында пасталған. Иисус тигірзер нандыра парыбысхан соонда даа илееде тус турған. Сағысха кирчезер бе? Даниилнің ухаанҷыластары «тӱгенҷі кӱннерде» * ле пілдістіг пол парарға кирек полған. XIX вектің халғанҷы чылларында Библияның істезігҷілері пу паза пасха даа ухаанҷыластарны ситкеп істескеннер. Олар читі тус 1914 чылда тоозыларын піліп алғаннар. Чир-чалбахта ол туста полған киректер Худайның Хан-ӱлгӱзі тигірде 1914 чылда устап пастаанын киречілепчелер. Андада чир-чалбахтың тӱгенҷі кӱннері пасталыбысхан. Пӱӱнге чидер бе?

Дмитрий: Я, чидер. Прай пу нимелердеңер чахсы сағынып аларға кирек.

Кирилл: Сағыссырабаңар. Пу сурығны піліп аларға мағаа ідӧк тус кирек полған. Че пістің чооғыбыс сірерге Иегованың киречілері Хан-ӱлгӱдеңер ӱгредігні Библияда тӧстепчеткеннерін піліп аларға полыс пирді полар тіп сағынчам.

Дмитрий: Я, кӧрчем. Мағаа ӱгредіглеріңні Библия хоостыра чарыда чоохтапчатханнарың сыбыра хайхастығ пілдірче.

Кирилл: Пілістеріңні Библияда тӧстирге хынчатханнарың кӧрінче. Пӱӱн тохтат салаалар, че сірернің ам даа сурығлар пар полар. Кӧзідімге, читі тус Худайның Хан-ӱлгӱзінең палғалыстығ полчатханын паза ол тус п. э. алнында 607 чылда пасталғанын піліп алдыбыс. Че читі тус 1914 чылда тоозылғанын хайдаң пілчебіс? *

Дмитрий: Я, піліп аларҷых.

Кирилл: Читі тус нинҷе ӱр поларын ідӧк Библия хоостыра санап аларбыс. Ол сурығны, соонаң килзем, ӱзӱрібізеелер? *

Дмитрий: Че, уғаа чахсы.