Мының алнындағы статьяда хайди чоохталған, Иисустың чуртазында «Худай хан-ӱлгӱзінеңер Чахсы Хабарны» искіргені иң ӧӧн орында полған (Лука 8:1). Израиль чирінде Худайның Хан-ӱлгӱзінеңер ол чоохтабаан чир чох таа полған. Тӧрт Чахсы Хабарда Хан-ӱлгӱдеңер чӱс азыра хати чоохталча. Кӧбізін аннаңар Иисус чоохтапча. Че сынында Иисус Хан-ӱлгӱдеңер хай-хай кӧп чоохтаан! (Иоанн 21:25).

Ноға Иисус Хан-ӱлгее анҷа кӧп хайығ салған? Худай аны ол Хан-ӱлгӱнің Ханына турғыс салғанын ол пілген (Исаия 9:6; Лука 22:28—30). Че Иисус, Хан полып, сабланарға кӱстенмеен (Матфей 11:29; Марк 10:17, 18). Ол Хан-ӱлгӱдеңер позына туза ползын тіп искір чӧрбеен. Худайның Хан-ӱлгӱзі Иисустың тигірдегі Пабазына паза аның соонҷа киртістіг парчатханнарға кӧп чахсы ниме ағыларын ол пілген. Аннаңар Иисусха Хан-ӱлгӱ уғаа аарлығ *.

Иисус позының тигірдегі Пабазына уғаа тың хынча (Притчи 8:30; Иоанн 14:31). Ол, Пабазының хынызын, айаачызын паза справедливозын кӧріп, ӧрінче (Второзаконие 32:4; Исаия 49:15; 1 Иоанның 4:8). Аннаңар Пабазынаңар чой ӱгредіглерні хырт кӧрче. Кӧзідімге, Худай пісті иреелензіннер тіп хынча паза кізілернің иреелеріне кирегі халбинча тіп чой чоох тарадылча. Хан-ӱлгӱ аның Пабазының репутациязын арығлап саларын Иисус пілген, аннаңар ол, прай кӱзін салып, Хан-ӱлгӱдеңер искірген (Матфей 4:23; 6:9, 10). Хан-ӱлгӱ Худайның адын хайди арығлап салар?

Хан-ӱлгӱ пастыра Иегова уғаа улуғ, кізілерге туза ағылар, алызығлар идер. Худай позының киртістіг нымысчыларының «полған на харах чазын чызыбызар». Кізіні ылғатчатхан нимелерні Иегова чох идібізер, аннаңар «ӧлім дее, ылғас таа, сыхтас таа паза ағырығлар даа чох пол парарлар» (Азых чоох 21:3, 4). Иегова позының Хан-ӱлгӱзінің пастыра кізілернің прай иреелерін, чобағларын * чох идібізер.

Иисустың Хан-ӱлгӱдеңер искірерге анҷа кӱс салғаны хайхастығ нимес! Хан-ӱлгӱнің чидіглері Пабазының кӱзін паза айаачызын кӧзіт пирерін ол пілген (Иаковтың 5:11). Ідӧк Иисус пілген: Хан-ӱлгӱ ол хынчатхан, Худайға киртістіг нымысчыланчатхан кізілернің чуртастарын чахсы саринзар алыстырыбызар.

Чирзер килер алнында Иисус ӱр тус Пабазынаң хада тигірде чуртаан. Оолғының пастыра Пабазы тигірні, чылтыстарны, галактикаларны, чирні паза андағы чуртасты чайап салған (Колосстағыларға 1:15, 16). Че Иисусха «кізілер иң аарлығ полғаннар» (Притчи 8:31).

Иисустың кізілерге хынчатханы аның нымысчыланызында кӧрінген. Пастағызынаң сығара Иисус чахсы хабарны хызылчатханнарға искірерге килгем тіп чоохтап пирген (Лука 4:18). Иисус хынызын сӧстернең не нимес, че кӱннең кӱнге иткен киректерінең кӧзіткен. Кӧзідімге, аны истерге чыылыс парған чонға «айап парып, ағырығ кізілерні имнебіскен» (Матфей 14:14). Уғаа чабал ағырығнаң ағырчатхан ирен: «Хынзаң, мині арығлап поларзың»,— теенде, Иисус ағаа айап парып: «Йа, хынчам»,— тіп, имнебіскен (Лука 5:12, 13). Лазарь харындазы ӱреп парған соонда ылғапчатхан Марияны кӧр салып, Иисус «тың чӱрексіп» парған паза аның «харах частары аххан» (Иоанн 11:32—36). Анаң ол уғаа хайхастығ кирек идібіскен — тӧрт кӱн ӧліг чатхан Лазарьны тірілдірібіскен! (Иоанн 11:38—44).

Иисус ол тустағы полызығ ӱр нимеске ле полғанын, прай ол чазылдырған кізілер хатап ағырарларын, тірілдірген кізілер хатап ӧл парарларын пілген. Че Худайның Хан-ӱлгӱзі прай ағырығларны паза ӧлімні саңай чох идібізерін ол пілгенӧк. Аннаңар ол хайхастар ла итпеен, че Хан-ӱлгӱдеңер чахсы хабарны, прай кӱс салып, искірген (Матфей 9:35). Ол иткен хайхастар Худайның Хан-ӱлгӱзі прай чир ӱстӱнде ниме ит саларын кӧзіткеннер. Кӧріңер, ол тустаңар Библияда ниме чоохталча.

• Ағырығлар чох полар.

  «Андада харахтары пӱлес кізілернің харахтары чарых пол парарлар, тунухтарның хулахтары ачыл парарлар. Андада ахсах кізі, киик чіли, сегірер, тілі чох кізі ӧрінгеніне ырлир». Ідӧк «Андада пірдеезі: „Мин ағырчам“,— тібес» (Исаия 33:24; 35:5, 6).

• Ӧлім чох полар.

  «Арығ чӱректіглер чирні ӱлӱске аларлар паза анда мӧгі чуртирлар» (Псалом 37:29).

  «Ол ӧлімні саңай чох идібізер, Прай нименің ээзі, Хан-пиг Иегова прай кізілернің харахтарының частарын чызыбызар» (Исаия 25:8).

• Ӱреен кізілер хатап чуртирлар.

  «Сыыраттарда чатчатханнар прайзы Кізі Оолғының ӱнін ис салар тус килче» (Иоанн 5:28, 29).

  «Кізілерні ӱреен соонда тірілдіріп аларына ізеніс пар» (Илҷілернің 24:15).

• Иблері паза тоғыстары чох кізілер чох полар.

  «Кізілер, туралар пӱдіріп, оларда чуртирлар паза виноградниктер ӧскіріп, оларның чистектерін чирлер. Пасха кізі чуртазын тіп пӱдірбестер, паза пасха кізі чізін тіп ӧскірбестер. ...Мин таллап алғаннар постары иткен нимелерінең толдыразынаң тузаланарлар» (Исаия 65:21, 22).

• Чаалар чох полар.

  «Чааларны чир хырина читіре тохтатча» (Псалом 46:9).

  «Чон чонға хылыс кӧдірбес паза пірдеезі чаалазарға ӱгренмес» (Исаия 2:4).

• Ӧзӧгіс чох полар.

  «Чир позының тамағын пирер, Худай, пістің Худайыбыс, пісті алғастир» (Псалом 67:6).

  «Чир ӱстӱнде тамах толдыра полар, тағлар пастарында даа кӧп полар» (Псалом 72:16).

• Пірдеезі хызылбас.

  «Чох-чоостар саңайға ундудыл парбастар» (Псалом 9:18).

  «Ол полызығ сурынчатхан чох-чоостарны, пазындыр салғаннарны паза полысчы чохтарны прайзын арачылир. Ол хызылчатханнарға паза пазындыр салғаннарға айир паза чох-чоостарны арачылир» (Псалом 72:12, 13).

Пу молҷағларны хығырып, ноға Иисус Хан-ӱлгее анҷа кӧп хайығ салғанын піл полчазар ба? Чирде чуртаанда, Иисус аны истерге хынчатхан кізілерге прайларына Хан-ӱлгӱдеңер чоохтаан. Хан-ӱлгӱ кізілерні иреелепчеткен сидіктерні саңай чох идібізерін ол пілген.

Хан-ӱлгӱнең палғалыстығ молҷағлар чӱрееңерні тибіретче бе? Тибіретчетсе, ол Хан-ӱлгӱдеңер кӧп арах піліп аларға хынчазар ба? Аның алғастарын алар ӱчӱн, ниме идерге кирек? Пу статьяларның халғанҷызы пу сурығларға нандырығ пирер.