Кирилл: Дмитрий сірерге тоғазарға ӧріністіг. Сірернең хада Библияны неделя сай ӱгренчеткенібіске уғаа ӧрінчем *. Киректерің хайди?

Дмитрий: Прай чахсы, алғыс.

Кирилл: Анзын истерге ӧріністіг. Мындаа тоғасханда, ноға Иегованың киречілері Худайның Хан-ӱлгӱзі 1914 чылда * устап пастаан тіп сурығдаңар чоохтасхабыс. Піс Даниил тіп киндезінің 4-ҷі пастаандағы ухаанҷыласты ӱзӱргебіс. Анда ниме пазылғанын сағысха кирчезер бе?

Дмитрий: Анда Навуходоносор тӱзінде кӧрген чоон ағастаңар чоохталча ба?

Кирилл: Я, хап-орта. Навуходоносор тигірге читіре ӧс парған чоон ағас кӧрген. Анаң Худайның ангелі ол ағасты узурыбызарға чоохтапчатханын ис салған, че тӧкпезі чилегелерінең хада чирде халарға кирек полған. «Читі тус» ирт парған соонда ағас хатап ӧс сығарға кирек полған *. Хайди піс піліп алғабыс ол ухаанҷылас ікі хати толарға кирек. Сағысха кирчезер бе, хайди ол пастағызын толған?

Дмитрий: Навуходоносорда тол парған ма? Ол читі чылға сағысха хомай пол парған.

Кирилл: Я, сах іди. Навуходоносор нинҷе-де тусха сағысха хомай пол парған, аннаңар аның ӱлгӱзі ӱзіл парған. Че ол ухаанҷылас алғым арах толғанда, Худайның чир ӱстӱндегі ӱлгӱзі читі тусха ӱзіл парған. Хайди піс кӧргебіс читі тус п. э. алнында 607 чылда Иерусалим иңзеріл парғанында пасталыбысхан. Ол тустаң сығара чир ӱстӱнде Иегова Худайның сіреезінде одырчатхан ханнар чох полған. Читі тус ирт парған соонда, Худай позының чонына наа Устағҷы пирерге кирек полған. Амды ол Устағҷы тигірде устирға кирек. Пасха сӧстернең чоохтаза, читі тус ирт парған соонда Худайның Хан-ӱлгӱзі тигірде устап пастирға кирек полған. Мындаа читі тус хаҷан пасталғанын ӱзӱрібіскебіс. Читі тус нинҷе ӱр турғанын піліп алзабыс, Хан-ӱлгӱ хаҷан устап пастаанын піліп аларбыс. Андағ нимес пе?

Дмитрий: Я. Чахсы. Мындаа нимедеңер чоохтасханыбысты сағысха киріп алдыбыс.

Кирилл: Уғаа чахсы. Читі тус нинҷе ӱр турғанын санап кӧреелер бе? Мин ӧнетін ол материалны хатап хығырып алғам. Ам сірерге чарыда чоохтап пирерге кӱстен кӧрем.

Дмитрий: Че.

Кирилл: Пу ухаанҷылас, пастағызын, Навуходоносорда толғанда, читі тус сынап читі чыл полған. Че Худайның Хан-ӱлгӱзінде толғанда, читі тус олаңай ла читі чыл полбаан, хай-хай ӱр тус полған.

Дмитрий: Анзын хайдаң пілчезер?

Кирилл: Сағысха кирчезер бе? Читі тус, Иерусалим п. э. алнында 607 чылда иңзеріл парғанда, пасталыбысхан. Ол чылдаң сығара читі чыл саназа, п. э. алнындағы 600 чыл пол парар. Че ол чылда Худайның Хан-ӱлгӱзінең палғалыстығ пір дее кирек полбаан. Ідӧк, хайди кӧргебіс, чӱзер чыллар пазынаң, Иисус чирде полғанда, читі тус тоозылғалах полған.

Дмитрий: А-а, я, сағысха кирчем.

Кирилл: Аннаңар читі тус олаңай ла читі чыл нимес, хай-хай узун тус.

Дмитрий: Андағда ол тус нинҷе ӱр полған?

Кирилл: Библияның Азых чоох тіп киндезі Даниилнің киндезінең уғаа чағын палғалыстығ. Аннаңар ол кинде читі тус нинҷе ӱр полғанын піліп аларға полысча. Анда ӱс чарым тус 1 260 кӱн тіп пазылча *. Читі тус ӱс чарым тустаң ікі хати кӧп, аннаңар 2 520 кӱн пол парча. Піл полдар ба?

Дмитрий: Я, пілдістіг. Че хайди анзы 1914 чылнаң палғалыстығ ам даа піл полбинчам.

Кирилл: Ам пу саннарны палғалыстыр кӧреелер. Пірееде Библияның ухаанҷыластарында пір кӱн пір чылға саналча *. Ол правилонаң тузаланза, читі тус 2 520 чыл пол парар. П. э. алнындағы 607 чылдаң 2 520 чыл саназабыс, 1914 чылға килербіс *. Сах ол чылда читі тус тоозыл парған паза Худайның Хан-ӱлгӱзінің Ханы, Иисус Христос, устап пастаан. Олох 1914 чылда чир ӱстӱнде Библияның ухаанҷыластарында халғанҷы кӱннерні таныхтапчатхан киректер пасталыбысханнар.

Дмитрий: Хайдағ киректер?

Кирилл: Матфей 24:7-де пазылған сӧстерге хайығ салыңар. Кӧріңер, Иисус, тигірде устап пастаза, чирде хайдағ киректер поларынаңар ниме чоохтапча: «Чон чоннаң, хан ханнаң тоғыр кӧдірілер. Анда-мында ӧзӧгіс-хырылыстар паза чир тітірезі полар». Хайығ салыңар, Иисус ол туста ӧзӧгістер паза чир тітірестері полар тіпче. Халғанҷы чӱс чылда андағ киректер уғаа кӧп полған нимес пе?

Дмитрий: Я, анзы андағ.

Кирилл: Пу стихта Иисус ол Худайның Хан-ӱлгӱзінің Ханы полчатхан туста чаалар полар тіп чоохтапча. Азых чоох тіп киндеде орындағы ла чаалар полар нимес, че прай чир ӱстӱнде чаалар полар тіп пазылча *. Пастағы мировой чаа хаҷан пасталғанын сағысха кирчезер бе?

Дмитрий: 1914 чылда. Олох чылда Иисус устап пастаан ма? Ол киректерні хаҷан даа палғалыстырбаам.

Кирилл: Хайди мозаиканың прай чардыхтарын піріктірібіссе, чахсы хоос пол парча, ідӧк читі тустаңар ухаанҷыласты паза Библиядағы тӱгенҷі тустаңар ухаанҷыластарны піріктірібіссе, прай пілдістіг пол парча. Иегованың киречілері Иисус Худайның Хан-ӱлгӱзінің Ханы полып, 1914 чылда устап пастаанына, олох туста тӱгенҷі кӱннер пасталыбысханына киртінчелер *.

Дмитрий: Прай пу нимелерні чахсы сағынып аларға мағаа тус кирек.

Кирилл: Чахсы. Прай пу нимелерні чахсы піліп аларға мағаа даа тус кирек полған. Че пістің чооғыбыстаң сірер Иегованың киречілері 1914 чылдаңар, ол чыл Библияда кӧні чоохталбинчатса даа, Библияда тӧстеніп, чоохтапчатханнарын піліп алды поларзар.

Дмитрий: Сірер пір дее нимені, постарың сағынып алып, чоохтабинчазар. Сыбыра, Библияда тӧстеніп, чоохтапчазар. Анзы мағаа хайхастығ. Че мин піл полбинчам: «Ноға прай ниме андағ сидік? Ноға Худай Библияда Иисус Христос 1914 чылда тигірде устап пастир тіп пас салбаан?»

Кирилл: Дмитрий, уғаа чахсы сурығ. Сынында Библияда кӧп ниме кӧні пазылбинча. Ноға, Библияны піліп алар ӱчӱн, кӧп кӱс саларға кирек? Соонаң килзем, пу сурығны ӱзӱрібізеелер?

Дмитрий: Ӧрініснең сахтим.