Мин пір муң чыл азыра турчатхан венгерскай городта, Секешфехерварда, тӧреем. Ікінҷі мировой чаа ол городха хайдағ ӱрег ағылғанын ам даа ундутпинчам.

Мині кічігдең сығара ағамнаң ууҷам ӧскіргеннер. Мин оларны сағысха кирзем, чӱрееме ам даа чылығ. Ууҷамның ады Элизабет полған. Аның Худайға пик киртінізі мағаа сиип парған. Мағаа ӱс час полғандох, мин аның соонҷа «Молитва Господня» алай «Отче наш» тіп адалчатхан пазырысты хығырҷаң полғам. Че нимедеңер анда чоохталчатханын отыс часха читіре піл полбаам.

Постарына тура алып аларға тіп, іҷемнең пабам уғаа кӧп тоғынғаннар, аннаңар мині ағамнаң ууҷам ӧскіргеннер. Че полған на ікі неделя пазынаң субботада піс, прай сӧбіренең хада чыылызып алып, азыранҷаң полғабыс. Мағаа ол тус уғаа аарлығ тус полған.

1958 чылда минің іҷе-пабамнаң сағынған сағыстары тол парған. Олар тура алып алғаннар. Іҷе-пабамнаң хада чуртап сыхханыма уғаа ӧрінгем. Че чарым чыл пазынаң пабам, ракнаң ағырып, кинетін ӱреп парған.

Мағаа уғаа аар полған. Андада хайди пазырғанымны пір дее ундутпинчам. Мин пазырғам: «Худайым, пабамның чуртазын ал халарға мин синің уғаа тың сурынғам. Ол мағаа тың кирек. Ноға син минің пазырызыма нандырбаазың?» Мині мындағ сурығ сағыссыратхан: пабам тигірзер парған ма алай саңай чох пол парған ма? Пабалары пар палаларға мин уғаа атархачаң полғам.

Мин сыыраттарзар кӱннің дее сай ҷӧрҷең полғам. Пабамны чыып салған орында, тізекке тӱзіп алып, пазырҷаң полғам: «Худайым, уғаа сурынчам, пабамны хайдазын піліп аларға полыс пир мағаа». Ідӧк, мин чуртастың смыслын піліп аларға полыс пирзін тіп, пазырҷаң полғам.

Мағаа 13 час полғанда, мин немец тілін ӱгренерге пӧгін алғам. Пай немецкай литературада сурығларыма нандырығлар таап аларға ізенгем. 1967 чылда мин Йеназар ӱгренерге парғам (ол туста Іскеркі Германия полған). Немецкай философтарның книгаларын уғаа хынып хығырғам. Кізінің чуртазынаңар пазылчатхан книгаларға уламох тың хынҷаң полғам. Ол книгаларда хынығ сағыстар полғаннар, че оларның пірдеезі минің духовнай кирексіністерімні толдыр полбинчатхан. Мин, сурығларыма нандырығлар таап аларға тіп, аннаң андар пазырғам.

1970 чылда мин Венгриязар нандыра айлан килгем. Анда мин Розанаң танызып алғам, соонаң піс хоных хон салғабыс. Ол туста Венгрия социалистическай хазна полған. Той соонда, ӱр ниместең піс Розанаң хада Австриязар парыбысхабыс. Сынында, піс Сиднейзер (Австралия) чидіп аларға сағынғабыс, анда минің тайым чуртаан.

Австрияда мин тоғысха табырах кіріп алғам. Пірсінде, хада тоғынчатхан кізі: «Сурығларыңа нандырығларны Библияда таап аларзың», — теен. Ол мағаа Библия ӱзӱрілчеткен книгалар пирген. Мин оларны табырах хығырыбысхам паза кӧп арах піліп аларға хынғам. Аннаңар ол книгаларны сығарған Иегованың киречілерінзер мағаа литература ыс пирзіннер тіп, пічік пазыбысхам.

Тойыбыстың пір чылы толған кӱнде піссер чиит австрийскай Киречі килген. Ол мин сурған литератураны ағыл пирген паза Библия ӱгренерге хығырған. Мин ӱгренерге пӧгін алғам. Мин пілістер аларға уғаа тың хынғам, аннаңар ӱгредігні неделяда ікі хати иртіргебіс. Полған на ӱгредіг тӧртче час иртчең!

Библиядаң алған пілістеріме уғаа тың ӧрінгем. Иегованың киречілері минің венгерскай тілнең пазылған Библиямда Худайның ады Иегова тіп кӧзіт пиргеннер. Мин анзына киртін тее полбинчатхам. Тигірибзер 27 чыл чӧргем, че анда Худайның адын адааннарын пір дее хати испеем. Библия минің сурығларыма пілдістіг паза кӧні нандырығлар пирген. Мин анзына уғаа тың хайхаам. Кӧзідімге, ӧліг кізілер, халын уйғудағы кізі чіли, пір дее ниме пілбинчелер тіп пазылча (Экклезиаст 9:5, 10; Иоанн 11:11—15). Ідӧк мин Худайның наа тилекей турғыс саларға молҷапчатханын піліп алғам. Анда ӧлім хаҷан даа чох полар (Азых чоох 21:3, 4). Ол наа тилекейде пабам тірілер, мин аннаң хатап тоғазарға ізенчем (Илҷілернің 24:15).

Роза ӧрініснең миннең хада Библия ӱгрен сыххан. Піс духовнай саринаң табырах ӧскебіс, Библия ӱгренҷең публикацияны ікі ле айға иртібіскебіс! Залда полчатхан прай чыылығларға чӧргебіс. Иегованың киречілерінің хыныстары, пір чӧптіг тудыныстары паза удур-тӧдір полызарға тимде полғаны пістің чӱреебіске уғаа тың теңен (Иоанн 13:34, 35).

1976 чылда Розанаң мағаа Австралиязар килерге чаратханнар. Піс Иегованың киречілерін, андар килгендӧк, таап алғабыс. Оларның аразында піске, ибде чуртапчатхан чіли, истіг полған. 1978 чылда піс тее Иегованың киречілері полып алғабыс.

Чуртазым тооза сағыссыратхан сурығларыма нандырығлар таап алғам. Иегова Худайға чағын полып алған соонда, минің иң чахсы Паба пар. Паза андағ Паба чоғыл (Иаковтың 4:8). Ағаа хоза, минің пик ізеніс пар: килер наа тилекейде мині тӧріткен пабама тоғазарбын (Иоанн 5:28, 29).

1989 чылда піс Розанаң хада, туғаннарыбысха, нанҷыларыбысха паза пасха даа кізілерге киртінізібістеңер чоохтирға тіп, Венгриязар нандыра айлан килгебіс. Піс Библияның сынына нинҷе-нинҷе чӱс кізіні ӱгреткебіс. Анзына уғаа часкалығбыс. 70 азыра кізі Иеговаа нымысчылан сыххан, оларның санында минің іҷем.

Мин, сурығларыма нандырығлар таап аларға полыс пирзін тіп, 17 чыл пазырғам. Ол тустаң сығара 39 чыл ирт парды, мин ам даа пазырчам. Ам, тізең, мин піди пазырчам: «Тигірдегі аарлығ Пабам, кічиҷек оолахтың пазырыстарына нандыр пиргенің ӱчӱн, улуғ алғыс сағаа».