Мин Монреальның чох-чоостар чуртапчатхан чардығында ӧскем. Мағаа чарым ла час полғанда, пабам ӱреп парған. Іҷем сигіс палалығ халған, мин иң кічии полғам.

Мин наркотиктер, азартнай ойыннар паза криминал аразында ӧскем. Он частаң сығара мин проституткаларға паза ростовщиктерге нымысха чӧргем. Мин кізілерні алаахтырарға уғаа хынҷаң полғам. Мин анзын аймах-пасха оңдайларнаң иткем. Кізілерні алаахтырғаны мағаа наркотик осхас полған.

14 часха мин ол киректерде уғаа ус пол парғам. Кӧзідімге, мин алтыннаң чайған частар, браслеттер паза пурбалар садып алып, оларға проба турғызып алып, алтын чіли, тасхар паза садығ туралары хыринда сатчаң полғам. Пірсінде мин пір ле кӱнге 10 000 доллар идіп алғам! Ниик ахча тоғынып алғаныма уғаа поғдархаам.

15 частығда мині школа-интернаттаң сығара сӱрібіскеннер. Мағаа парҷаң чир чох полған, аннаңар мин тасхар, парктарда паза ам на танызып алған кізілерде хон чӧрҷең полғам.

Мин позымның киректерімнің ӱчӱн удаа полицияа кір парҷаң полғам. Че оғырлаан нимелер сатпаам, аннаңар олар мині пір дее хати одырт салбааннар. Че мошенничествоның ӱчӱн, лицензия чох садығ апарчатхан ӱчӱн улуғ штраф сал пир турҷаңнар. Мин пір дее нимедең хорыхпаам, аннаңар ростовщиктерге ахча хызарға чӧрҷеңзім. Ол хорғыстығ кирек полҷаң, аннаңар пистолет сыбыра хада ал чӧрҷеңзім. Пірееде мин бандаларнаң хада оларның киректеріне чӧрҷең полғам.

Мин Библиянаң 17 частығда танызып алғам. Миннең чуртаан хыс Иегованың киречілерінең хада Библия ӱгрен сыххан. Мин Библиядағы нормаларны хырт кӧргем, аннаңар мин аны тастап, пасха хыснаң чуртап сыххам.

Пу хыс ідӧк Иегованың киречілерінең хада Библия ӱгренерге пастаанда, мин сағын сыххам. Ол уғаа алыс парған, хайдағ нымзах хылыхтығ паза тыстаныстығ пол парғаны мині хайхатхан. Аннаңар мин Иегованың киречілерінің залынзар парарға идібіскем. Андағы кізілер мин пілчеткен кізілердең саңай пасха полғаннар! Олар паарсах паза чахсы тудынғаннар. Кічігдең сығара мин позымны пір дее кізее кирек чоғылзым тіп санаам. Іҷемнің хынызын кӧрбеем. Че Иегованың киречілері мағаа паарсаснаң хайғаннар. Анзы мағаа кічігдең ала читпинчеткен. Аннаңар мин ӧрініснең Библия ӱгрен сыххам.

Библия ӱгренгені сынап минің чуртазым ал халған. Мин, карталар ойнап, 50 000 азыра доллар ӧдіске кір парғам. Мағаа ол ӧдісті тӧлирге ахча кирек полған, аннаңар мин ікі нанҷынаң хада оғыр идерге сағыныбысхам. Андада оғыр идерге парбиныбысханыма уғаа тың ӧрінчем! Минің нанҷыларым оғыр идерге парғаннарында, пірсін ӧдірібіскеннер, пірсін арестовывать полыбысханнар.

Библия ӱгреніп, мағаа нинҷе алызарға кирек полчатханын кӧр салғам. Кӧзідімге, 1 Коринфтегілерге 6:10-да чоохталча: «Оғырларға даа, азымахчыларға даа, іскіҷілерге дее, чабал чоохтығларға даа, кӱҷӱрлерге дее Худай хан-чирі пирілбес». Пу стихты хығырған соонда, нинҷе чазыхтығ полчатханымны кӧр салып, ылғабысхам. Пілдістіг полған: мағаа чуртазымны саңай алыстырарға кирек (Римдегілерге 12:2). Мин хазыр кізі полғам паза чуртас тооза чойланғам нооза.

Ідӧк Библиядаң мин Иегова айаачы паза пыро тастирға тимде полчатханын піліп алғам (Исайя 1:18). Мин, иргі чуртазымны артыс саларға полыссын тіп, Худайға матап пазырғам. Худайның полызиинаң кӧместең мин ол чуртасты артыс салғам. Чуртапчатхан хыснаң хоных хон салғаным мағаа уғаа аарлығ алтым полған.

Мағаа 24 час полған, ипчім паза ӱс палам полған, аннаңар ахча тоғынарға кирек полған. Ол туста минің ӱгредіг дее, рекомендация даа чоох полған. Мин, Иеговаа пазох ізіг пазырып алып, тоғыс тілеп сыххам. Собеседованиелерде чуртазымны алыстырарға паза чойланмин чуртирға хынчатханымны чоохтаҷаң полғам. Пірееде Библия ӱгренчеткенімнеңер паза закон сайбабинчатхан кізі поларға хынчатханымны чоохтаҷаңмын. Че мині пірдеезі тоғысха аларға хынмаан. Пірсінде, мин менеджерге позымның чуртазымны чоохтаан соонда, ол теен: «Пілбинчем ноға, че мин сині тоғысха алып аларға сағынчам». Мин ікінҷілебинчем: Иегова пазырыстарыма іди нандырған. Пола-пола піс ипчімнең хада кіреске тӱзіп алып, Иегованың киречілері полып алғабыс.

Пӱӱн мин христианскай чолға турып, Библиядағы принциптернең тузалан сыххан на ӱчӱн тірігзім. Минің чахсы сӧбіре. Иегова минің пыромны тастабысхан, аннаңар совезім арығ.

Мин халғанҷы 14 чыл, прай тузым пиріп, нымысчыланчам. Чахсы хабар искіреріне уғаа кӧп тус хоратчам. Кізілерге Библия нимее ӱгретчеткенін піліп аларға полысчам. Ӱр ниместең сығара минің ипчім, прай тузын пиріп, нымысчылан сыххан. 30 чылға миннең хада тоғынған кізілернің санынаң 22 кізее Иегованың киречізі полып аларға полыс пиргеніме уғаа тың ӧрінчем. Садығ тураларынзар мин ам даа кірчем, че алаахтырарға нимес. Ам мин кізілерге мошенниктер паза чойланчатхан кізілер чох наа тилекей поларына ізеністеңер чоохтапчам (Псалом 37:10, 11).