Мин Лос-Анджелестің (Калифорния, США) бандалар толдыра паза наркотиктер садылчатхан чардығында ӧскем. Іче-пабамнаң алты пала полған, мин ікінҷізі полғам.

Іҷебіс пісті евангелическай киртіністе ӧскірген. Че саарбах тузында мин ікі пасха чуртас апар сыххам. Позырахта тигірибдегі хорда сарнаҷаң полғам, пасха кӱннерде сыбыра вечеринкаларда кӱлеттеп чӧрҷең полғам, наркотиктернең айғасхам паза хыстап чӧрҷең полғам.

Мин хылығымны тудын полбас кізі полғам. Тигірибдегі проповедьтер мағаа полыспаҷаң. Мин удаа тіҷең полғам: «Худай миннең пастыра ӧс алча». 1960 чылларда мин «Хара пантера» тіп политическай партияның кӧрістеріне сабыл парыбысхам. Ол политическай партия хара кізілернің праволарының ӱчӱн кӱстегнең харбасхан. Школа тоосчатханда, мин студенческай союзха кір парғам. Ол студенческай союз кізілернің праволарының ӱчӱн харбасхан. Ханҷа-да хати, школаны нинҷе-де тусха чаап, піс акция протеста иткебіс.

Че анзы мағаа асхынах полған. Хылығымның ӱчӱн минің хан тӧгерім килчеткен. Пірсінде піс кинотеатрда Африкадаң килген хуллар Америкада ирееленчеткенін кӧріп алып, ӧкпелен парып, андох ах оолларны сох пиргебіс. Анаң кинотеатр хыриндағы ах кізілер чуртапчатхан чирзер оларны соғарға парғабыс.

Мағаа чибіргі час толғалахаох, піс харындастарымнаң хада уғаа чабал сайбағҷылар пол парғабыс. Піс удаа ӱлгӱдегілерге туттыр салҷаң полғабыс. Кічіг харындастарымның пірсі саблығ бандада полған, мин аның нанҷыларынаң кӧп тус иртірҷең полғам. Чуртазым хомайдаң хомай ла полып одырған.

Нанҷыларымның пірсінің іҷе-пабазы Иегованың киречілері полғаннар. Олар мині постарының чыылығларына хығырғаннар. Мин парғам. Пастағызынаң ала мин уғаа хайхап парғам. Оларның полғанының на холларында Библия полған паза чыылығ тузында олар аннаң сыбыра тузаланғаннар. Палалар даа чоох чоохтааннар. Ідӧк уғаа хайхастығ пілдірген: Худайның ады пар полтыр — Иегова. Ол атты олар удаа адаҷаңнар (Псалом 83:18). Залда аймах-пасха расаның кізілері полғаннар, олар удур-тӧдір пір дее хыртыстанмааннар.

Пастап мин Библия ӱгренерге хынмаам, че Иегованың киречілерінің чыылығларына чӧрерге хынҷаң полғам. Пірсінде, мин чыылығда полғамда, минің нанҷыларым концертке парғаннар. Олар тууп куртказын пирерге хынмаан чиит оолны ӧдіре сох салғаннар. Соңа кӱнде олар ол кирекке махтанғаннар. Чарғы полчатханда даа, олар аннаңар кӱрленіп чоохтааннар. Оларның кӧбізі чуртас тооза харибде одырарға чарғылатханнар. Ол кӱнде чыылығда полғаныма уғаа тың ӧрінгем. Анаң чуртазымны алыстырарға сағыныбысхам паза Библия ӱгренерге пӧгін алғам.

Мин ах кізілерні хырт кӧрҷең полғам. Иегованың киречілері удур-тӧдір хайди хайчатханнары мағаа хайхастығ пілдірген. Кӧзідімге, ах Киречее пасха хан чирінзер парыбызарға кирек полғанда, ол позының палаларын хара сӧбіреде артыс салған. Ідӧк хара чиит оолға чуртаҷаң чир чох полғанда, аны позынзар ах сӧбіре алып алған. Иегованың киречілері Иоанн 13:35 хоостыра чуртапчатханнарын мин кӧргем. Анда пазылча: «Удур-тӧдір хыныссаңар, Минің ӱгренҷілерім полчатханнарыңны прайзы пілер». Мин сын харындастар пірігізін таап алғам.

Библия ӱгреніп, мин позымның сағыстарымны алыстырарға кирек полчатханын піліп алғам. Мағаа амыр чуртирға ла нимес, че сағызымны алыстырып, пӱкӱлее амыр кізі пол парарға кирек полған (Римдегілерге 12:2). Мин духовнай саринаң ӧскем. 1974 чылда, кӱрген айында, мин кіреске тӱзіп, Иегованың киречізі пол парғам.

Кіреске тӱскен соонда даа мағаа алызарға кирек полған. Кӧзідімге, нымысчыланчатханда, мині машинамдағы радиоприемникті оғырлаан кізіні сӱріскем. Ағаа чит париғанда, ол, радиоприемникті тастап, тизібіскен. Ол киректі мин пасхаларына чоохтаамда, ах сағал миннең сурған: «Стивен, ол кізее чидіп алған ползаң, аны хайди идерҷіксің?» Ол сурығ мині сағынып аларға паза аннаң андар амыр поларға кӧӧктірген.

1974 чылда, чарыс айында, прай тузым пиріп, нымысчыланарға пастаам. Библиядаңар кізілерге ай сай чӱзер час чоохтаҷаң полғам. Соонаң мин Иегованың киречілерінің Ӧӧн устаанда Нью-Йоркта, Бруклинде нымысчыланғам. 1978 чылда, іҷем ағырыбысханда, мағаа Лос-Анджелессер нандыра айланарға киліскен. Ікі чыл пазынаң, піс уғаа чахсы христианканаң, Ааронданаң, хоных хон салғабыс. Ол мағаа іҷем ӱреенҷе іҷемні кӧрерге полысхан. Нинҷе-де тус пазынаң, піс Ааронданаң Сторожевой башняның библейскай школазын, Галаадты, тоосхабыс. Школа соонда пісті Панамазар, миссионер полып, нымысчыланарға ысханнар. Піс ам даа анда нымысчыланчабыс.

Кіреске тӱскен соонда, мині нинҷе-нинҷе хати тарындырарға кӱстенгеннер. Мин позымны холымда тударға паза ол киректерге орта ӱндезерге ӱгреніп алғам. Аның ӱчӱн мині кӧп кізі, ипчім дее, махтапча. Мағаа позыма даа анзы хайхастығ пілдірче. Мин пілчем: андағ алызығларны мин Библия ла пастыра идіп алғам (Еврейлерге 4:12).

Библия мағаа чуртастың смыслын таап аларға паза сынап амыр кізі полып аларға полыс пирген. Мин ам кізілерні сох чӧрбинчем, че оларға Библиянаң танызып аларға полысчам. Мин школада ӱгренчеткен туста ыырҷым полған оолнаң Библия ӱгренгем. Ол кіреске тӱскен соонда, піс аннаң хада пір квартирада чуртаабыс. Амға читіре піс чағын нанҷылар полчабыс. Піс ипчімнең хада 80 азыра кізее Иегованың киречізі полып аларға полыс пиргебіс.

Ам минің чуртазымда смысл паза сын нанҷылар пар. Аның ӱчӱн мин уғаа часкалығбын паза Иеговаа уғаа алғыстығбын.