Библия пасха ызых пічіктерге тӧӧй кинде нимес. Пір дее кинде чоннарның чуртастарын, Библия чіли, алыстырбаан. Олох туста аны уғаа тың істесчелер паза критиковать полчалар.

Кӧзідімге, пірее ученайлар Библия пістің тусха алыспин читкенінде ікінҷілепчелер. Религияны істесчеткен профессор піди тіпче: «Сынында, піс амғы Библияда оригинальнай текст пазыл парғанында ікінҷілепчебіс. Пістің холыбыста копиялар ла, оларда алҷаастар уғаа кӧп. Оларның кӧбізі, оригинал пасхан соонда, чӱзер чыл ирт парғанда, пазылғаннар».

Пасхалары постарының религиознай кӧрістерінің ӱчӱн Библияда ікінҷілепчелер. Кӧзідімге, христианин полбаан Файзалға, Библия ызых кинде полза даа, анда кӧп алызығлар пар тіҷеңнер. Ол чоохтапча: «Кем-де миннең Библиядаңар чоохтазарға итсе, киртінмеҷең полғам. Мин сағынҷаң полғам: „Оларда сын Библия чоғыл, оларда алыс парған Библия!“»

Библия амғы тусха алыспин читкен ме, чох па пасхазы пар ба? Кӧзідімге, Библияда молҷалған чахсы чуртастаңар пастағы текстте пазылбаанын пілчетсер, ағаа киртінерҷіксер бе? (Римдегілерге 15:4). Паза амғы Библия пурунғы пічіктернің алҷаастар толдыра копиязы ла полза, тоғыстаңар, сӧбіредеңер паза Худайға пазырарынаңар аарлығ пӧгіннер алчатсар, андағы принциптернің тузаланарҷыхсар ба?

Библияның оригиналы пістің тусха читпеен полза даа, пістің тусха Библияның тексті пазылған муңар рукописьтер читкеннер. Ол рукописьтер анҷа ырах туста пазылғаннар, оларға тоғырланғаннар, оларның тексттерін алыстырарға кӱстенгеннер, че андағ даа полза, хайди олар пістің тусха чидіп алғаннар? Оларның пістің тусха читкені амғы Библияа киртінізібісті тыыдарға хайди полысча? Нандырығлар мының соондағы статьялардаң піліп аларзар.