1949 чылда пабам Германиядаң Австралиязар кӧс парыбысхан. Ол анда пірее шахтада алай электростанцияда тоғынарға хынған. Соонаң ол Виктория штаттағы аалда чуртап сыххан. Анда ол минің іҷемнең танызып алған. Олар хоных хон салғаннар, 1953 чылда мин тӧреем.

Нинҷе-де чыл пазынаң іҷем Библияны Иегованың киречілерінең ӱгрен сыххан. Аннаңар мин Библияның ӱгредіглерін кічігдең сығара пілгем. Че пабам ноо даа религияны хырт кӧрген. Ол чабаллан сыххан, удаа іҷеме хыҷанҷаң. Аннаңар іҷем сыбыра аннаң хорығып чуртаан. Іҷем Библияны пабамнаң чазынып ӱгренген паза аның ӱгредіглеріне прай чӱрекнең хыныбысхан. Пабам ибде чох полза, іҷем миннең паза минің хыс туңмамнаң Библиядаң алған пілістернең ӱлесчең. Ол піске чирдегі райдаңар чоохтаҷаң паза Библияның нормаларынҷа чуртааны кізее часка ағылча тіҷең (Псалом 37:10, 29; Исайя 48:17).

Мағаа 18 час тол парғанда, пабамның чабал хылығының ӱчӱн мин ибдең парыбысхам. Іҷем Библиядаң чоохтаан нимелерге мин киртінгем, че оларны аарлыға санабаам, аннаңар чуртазымда оларнаң тузаланмаам. Хара тас шахтазында, электрик полып, тоғын сыххам. 20 частығда ипчі ал салғам. Ӱс чыл пазынаң, пастағы хызыҷағыбыс тӧреенде, чуртасха пасха харахнаң кӧр сыххам. Библия пістің сӧбіребіске полыс поларын мин пілгем, аннаңар Иегованың киречілерінең хада аны ӱгрен сыххам. Че минің ипчім Иегованың киречілеріне тың хынмаҷаң. Пір хати мин чыылыға пар килгем. Аның соонда мағаа ипчім: «Библия ӱгренерге тохтатпазаң, мин синнең парыбызам», — теен. Аннаң чарылызарға хынмин, мин Иегованың киречілерінең паза айғаспиныбысхам. Соонаң ол пӧгінге уғаа тың ачырғанғам.

Пірсінде мағаа тоғыста порнографическай журналлар пиргеннер. Аны кӧріп, хузарым килчеткен, че харағым хыйа ит полбинчатхам. Аның соонда мин позымны уғаа тың пыролаам. Ол тусха мин Библиядаң алған пілістерні ундутпаан полғам, аннаңар Худай мині хайди даа хатығлир тіп сағынғам. Че порнографияны нинҷе кӧп кӧргем, анҷох кӧп андар тартылғам. Соонаң ол чох чуртап полбиныбысхам.

Соңа 20 чыл аразында іҷем ӱгреткен принциптердең оортахтаң оортах ла парып одырғам. Миизіме кірген нимелер чуртазымда кӧрін сыхханнар: хырызын сыххам, уйадыстых оңдайнаң кӱрлен сыххам, секске ардап парған кӧрістер пол сыхханнар. Ипчімнең хада чуртаам, че олох туста пасха ипчілернең чӧрҷең полғам. Пірсінде мин кӧріндіске кӧрініп алып, сағын салғам: «Син минің кӧңніме кірбинчезің». Паза позымны улуғлап полбин, позымнаң чиркен сыххам.

Соонаң ипчімнең чарылыс парғам, чуртазымда паза смысл чоғыл тіп пілдір парған. Андада Иегова Худайға прай чӱреемнең пазырып алғам. Халғанҷы 20 чыл сайбах чуртас апарғам, че андағ даа полза, Библияны хатап ӱгренерге пӧгін алғам. Ол тусха пабам ӱреп парған, іҷем, тізең, Иегованың киречізі полып алған.

Библияның пӧзік нормаларына мағаа уғаа ырах полған. Че ам мин Библияда чоохталчатхан амырға хайди даа чидіп аларға сағыс тутхам. Хырызынмасха паза аар хылығымны алыстырарға кӱстен сыххам. Ідӧк сайбах чӧрбеске, азартнай ойыннар ойнабасха, иртіре араға іспеске паза тоғыстаң пір дее ниме оғырлабасха пӧгін алғам.

Ноға чуртазымны алыстырарға пӧгін алғанымны тоғыстағылар пір дее піл полбинчатханнар. Олар мині ӱс чыл хомай киректерге нандыра тартханнар. Пірее хати тарыныбыссам алай хомай сӧс чоохтаныбыссам, олар ӧрініп аахтаҷаңнар: «Мына иргі Джо айлан килді!» Ол сӧстерні мағаа истерге уғаа аар полған! Позымны нимее чарабаан кізее санаҷаң полғам.

Пістің тоғыста печатнай даа, электроннай даа, порнографическай материаллар кӧп полған. Пірее тоғысчылар ол уйадыстығ сомнарны электроннай почта пастыра удур-тӧдір ызыбысчаңнар. Мының алнында мин ідӧк итчең полғам. Ам мин ол сомнарны кӧрбеске тіп прай кӱзімні салчатхам. Че миннең хада тоғынчатханнар, мині нандыра тартып алар ӱчӱн, уғаа кӧп кӱс салҷаңнар. Андада мин, миннең хада Библия ӱгренген Иегованың киречізінзер, полызығ сурынып, айланғам. Ниме мині сағыссыратчатханын прай ағаа чоохтап пиргем. Ол ситкеп истіп алып, Библияның стихтарының хоостыра, хайди ол чабал хылыхты тобырып аларға кӧзіт пирген. Паза ол Иеговаа сидіктеңер хатап-хатап пазырарға чоохтаан (Псалом 119:37).

Пірсінде мин прай пістің бригаданы чыып алғам. Прайлары чыылызып алғанда, арағадаң позып аларға кӱстенчеткен ікі кізее пиво ағыл пирерге сурынғам. Прай бригада тоғырлан сыххан: «Хайди полчазың, олар араға холынаң позып аларға кӱстенчелер нооза?!» Андада мин нандырғам: «Мин дее, позып аларға кӱстенчем!» Ол тустаң сығара тоғысчыларым минің порнография кӧрбеске кӱстенчеткенімні улуғлап сыхханнар паза мині нандыра тартып алар ӱчӱн, пір дее ниме итпин сыхханнар.

Пола-пола мин Иегованың полызиинаң ол чабал хылығымны тобырып алғам. 1999 чылда, кіреске тӱзіп алып, Иегованың киречізі полып алғам. Арығ, часкалығ чуртасты хатап пастирға пирілген оңдайға уғаа тың ӧрінчем.

Ноға Иегова мин анҷа кӧп чыллар хынған порнографияны хырт кӧрчеткенін ам піліп алғам. Иегова хыныстығ Паба, аннаңар ол мині порнография ағылчатхан ӱрегдең арачылап аларға хынған. Притчи 3:5, 6-ғы пазыл парған сӧстер хап-орта чоохтапчалар. Анда пазылча: «Иеговаа прай чӱрееңнең ізен, позыңның сағызыңа ізенме. Ноо даа ниме итсең, аннаңар ундутпа, ол, тізең, сині орта чолҷа апарар». Библияның нормалары пісті арачылапчалар ла нимес, че олар пісті маңнанысха ағылчалар (Псалом 1:1—3).

Мының алнында мин позым позымнаң чиркенҷең полғам. Ам позымны улуғлапчам паза чӱреемде амыр. Мин нравственнай саринаң арығ чуртас апарчам паза Иегова минің пыромны тастабысханын пілінчем. Ол мағаа хабасча. 2000 чылда піс Каролиннаң хоных хон салғабыс. Ол уғаа чахсы христианка, Иеговаа минӧк чіли тың хынча. Моральнай саринаң арығ прай чоннарның аразындағы харындастар пірігізінің чардығы полчатханыбысха піс уғаа поғдархапчабыс.