Библияны хығырарға ирістіг алай хынығ? Хайди хығырарзар, андағ полар. Мына Библияны хынығ арах хығырарға полысчатхан нинҷе-де чӧп.

Амғы тілнең пазылған, хап-орта тілбестелген Библия таап алыңар. Киндеде пілдістіг нимес алай иргі сӧстер кӧп полза, хығырарға хынығ полбас. Аннаңар хығырарға оой, чӱрекке теңер иде пазылған тілбестег таллап алыңар. Сизіктіг полыңар: таллап алған тілбестег оригиналда пазылған сағыстарны хап-орта читірерге кирек *.

Амғы технологияларнаң тузаланыңар. Амғы туста чаҷын даа, электроннай даа Библиялар пар. Аны онлайн хығырарға алай компьютерге, планшетке паза мобильнай телефонға скачивать полып алар оңдай пар. Пірее электроннай версияларда хоза функциялар пар. Олар таллап алған темаа пасха стихтарны табырах кӧріп аларға алай нинҷе-де тілбестегні тиңнестірібізерге оңдай пирчелер. Сірер, хығырарға тың хынмин, истерге хынчатсар, Библияны аудиоформатта скачивать полып алыңар. Кӧп кізілер Библияны, общественнай транспортта, тасхар пас чӧрчетсе алай пірее киректер итчетсе, исчелер. Кӧңніңерге кірчеткен оңдайны таллап албаҷаң ма?

Библияны ӱгренҷең тиріглернең тузаланыңар. Андағ тиріглер Библияны хығырғанын хынығ арах идерге полызарлар. Библейскай карталар хоостыра хығырчатхан орыннарны таап алып, пазылчатхан киректерні сағыста тірілдірерге чарир. Пу журналдағы осхас алай jw.org тіп сайттағы «Библияның ӱгредіглері» тіп пӧліктегі статьялар Библиядағы хайдағ-да стихты чахсы арах піліп аларға полыс пирерлер.

Аймах-пасха оңдайнаң хығыр кӧріңер. Библияны пастағызынаң сығара тоозылғанҷа хығырарға аар пілдірчетсе, кӧңніңерге иң тың кірчеткен кинденең пастаңар. Библияда пазылчатхан хайдағ-да кізідеңер кӧп арах піліп аларға хынчатсар, ол кізідеңер пазылчатхан кизектерні тапхлап алып, оларны хығырыңар. Андағ оңдай « Анда пазылған кізілердең пастыра, Библиянаң танызыңар» тіп рамкада пирілче. Арса, сірер Библияны темалар алай хронология хоостыра хығырарға хынарзар? Пу оңдайларның пірсінең тузалан кӧріңер.