Мин Паддингтонда Лондонның кӧп чон чуртапчатхан чардығында тӧреем. Піс іҷемнең паза ӱс улуғ пиҷемнең хада чуртаҷаң полғабыс. Пабам пірееде киліп, парыбысчаң. Ол алкоголик полған.

Іҷем мині кічігдең сығара узир алнында пазырып ал турарға ӱгрет салған. Минің кічиҷек Библия полған, анда Псаломнар киндезі ле полған. Мин, псаломнарға позым кӧглер сағын таап алып, сарнаҷаң полғам. Мин пір киндеде «таңдағызы полбас кӱн килер» тіп хығырып алғам. Анаң хараа тооза узубаам. Мин сағынғам: «Чуртастың смыслы поларға кирек. Андағда ноға мин тӧреем?» Минің ӧлерім килбеен!

Мағаа прай оккультнай нимелер хынығ полыбысханнар. Ӱреен кізілернең чоохтазарға кӱстенгем. Школадағы арғыстарымнаң хада сыыраттарзар чӧрҷең полғам. Уғаа хорғыстығ кинолар кӧрҷең полғабыс. Прай ол нимелер хорғыстығ, че олох туста хынығ полҷаң.

Мин он частығдох хомай чолға кірібіскем. Тамкы, анаң ӱр ниместең марихуана тарт сыххам. 11 частығда пастағызын араға іс кӧргем. Арағаның тадии кӧңніме кірбеен, че изірчеткенім кӧңніме кірген. Оңдай ла полза, вечеринкаларға, хараа тоғынчатхан клубтарзар чӧрҷең полғам. Хараазын ибдең тизібізіп, иртен айлан килҷең полғам. Ол кӱн школаа пар полбаҷаң полғам. Школаа парған кӱннерде переменаларда араға ісчең полғам.

Школаны уғаа хомай оценкаларнаң тоос салғам. Іҷем минің іди чӧрчеткенемні пілбеен. Аннаңар, піл салғанда, уғаа тың тарын парған. Піс хырыс салғабыс, анаң мин ибдең парыбысхам. Нинҷе-де тус мин позымның оолғымда, Тониде, чуртаам. Ол кӧместең сайбағлар итчең, наркотиктер сатчаң паза уғаа хазыр кізі полған. Ӱр ниместең мин азах аар пол парғам, анаң он алты частығда оолах таап алғам.

Мин пастап ла Иегованың киречілерінең ир чох іҷелер чуртапчатхан приютта тоғасхам. Орындағы ӱлгӱлер мағаа анда комната пиргеннер. Чиит іҷелерзер ікі ипчі килҷең, олар Иегованың киречілері полғаннар. Пірсінде мин оларнаң чоохтас сыххам. Иегованың киречілері саба ӱгретчеткенін кӧзіт пирерге хынғам. Че олар минің прай сурығларыма Библия хоостыра чахсы нандыр пиргеннер. Олар паарсах, чахсы кізілер полғаннар, аннаңар минің кӧңніме кіргеннер. Мин оларнаң хада Библия ӱгрен сыххам.

Ӱр ниместең Библияда кӧр салған ниме чуртазымны саңай алыстырыбысхан. Кічігдең сығара мин ӧлімнең хорыхчаң полғам. Ам, тізең, Иисус тірілістеңер ӱгретчеткенін піліп алғам (Иоанн 5:28, 29). Паза Худай мағаа хынчатханын піліп алғам (1 Петрның 5:7). Иеремия 29:11-де пазылған сӧстер минің чӱрееме тың теңеннер. Анда пазылча: «Ниме сірерге сағын салғанымны чахсы пілчем,— тіпче Иегова.— Сірерге алнындағы чуртас паза ізеніс пирер ӱчӱн, мин сірерге чобағ нимес, амыр чуртас сағын салғам». Іди мин чирдегі райда чуртирға ізен сыххам (Псалом 37:29).

Иегованың киречілері мағаа сын хыныснаң хайғаннар. Оларның чыылиина пастағызын килгемде, оларның удур-тӧдір паарсастығ хайчатханнарын кӧр салғам! (Иоанн 13:34, 35). Мин чӧрчеткен тигірибде мағаа саңай пасха оңдайнаң хайҷаңнар. Иегованың киречілері хайди чуртапчатханымны пілгеннер, че андағ даа полза, мағаа паарсаснаң хайҷаңнар паза полысчаңнар. Мин позымны улуғ сӧбіренің чардығы тіп пілін сыххам.

Библия ӱгренчеткенде, мин піліп алғам: Худайның нравственнай нормаларына килістіре чуртир ӱчӱн, чуртазымны алыстырарға кирек. Сидік тее полза, тамкы тартарын тастабысхам. Олох туста піліп алғам: мин исчеткен музыка марихуана тартарға кӧӧктірче. Араға ізерге тартылбас ӱчӱн, вечеринкаларзар паза хараа тоғынчатхан клубтарзар чӧрбин сыххам. Пӧзік нравственнай нормаларҷа тудынарға кӧӧктірчеткен нанҷылар таап алғам (Притчи 13:20).

Ол туста Тони Иегованың киречілерінең Библия ӱгрен сыххан. Иегованың киречілері аның сурығларына Библия хоостыра прай нандыр пиргенде, ол сынны таап алғанын піліп алған. Позының чуртазын саңай алыстырыбысхан: нанҷыларын тастабысхан, сайбағ итпинібіскен паза марихуана тартпиныбысхан. Піс Иегованың кӧңніне кірерге хынғабыс паза пістің оолғыбыс толдыра сӧбіреде ӧссін тіп, хоных хон саларға пӧгін алғабыс. 1982 чылда піс хоных хон салғабыс.

«Сторожевой башня» паза «Усхуныңар!» * тіп журналларда мин идерге хынчатхан алызығлар иткен кізілернің биографияларын хығырарға хынҷаң полғам. Оларның чуртастары минің кӧңнімні тың кӧдірҷең паза аннаң андар кӱрезерге кӧӧктірҷең. Мин Иеговадаң мині тастабасха сурынҷаң полғам. Анаң 1982 чылда июль айда піс Тонинең хада, кіреске тӱзіп, Иегованың киречізі полып алғабыс.

Иегова Худайнаң нанҷыласханы минің чуртазымны ал халған. Піс Тонинең хада сидік тустарда Иегова піске полысханын сизінгебіс. Піс Иеговаа ізенерге ӱгреніп алғабыс паза пілчебіс: ол хаҷан даа піснең хада полған паза пістің сӧбіребіске полысхан (Псалом 55:22).

Оолғымны паза хызымны Иеговаа хынарға ӱгрет салғаныбысха уғаа ӧрінчем. Паза оларның даа палалары духовнай сӧбіреде ӧсчелер, аннаңар мин уғаа часкалығбын.

Ам мин хараазын чахсы узупчам. Алнында ниме поларынаңар паза ӧлімнеңер паза сағыссырабинчам. Тонинең хада, неделя сай ӧмедең ӧмее чӧріп, харындас-пиҷелернің киртіністерін тыытчабыс. Ідӧк піс кізілерге Иисус Христосха киртініп аларға полысчабыс. Киртініп алзалар, олар даа мӧгі чуртап поларлар.