Библия хығырарын хайди хынығ арах паза тузалығ арах идіп аларға? Мына пис чӧп.

Килістіре орын таап алыңар. Хығырарға пір дее ниме харығ полбазын тіп, сымзырах, истіг орын таап алыңар. Арығ кииде паза чарых орында хығырарға оой арах полар.

Орта кӧңніліг хығырыңар. Библия — чуртас пирген Пабабыстың пічии. Аннаңар аны, кічіг пала хыныстығ пабазын исчеткен чіли, хығырарға кирек. Библиядаңар хомай сағынчатсар, Худай сірерні нимее-де ӱгрет пирзін тіп, ол сағыстарны хыйа ит саларға кӱстеніңер (Псалом 25:4).

Хығырар алнында пазырып алыңар. Библияда Худайның сағыстары пазыл парғаннар, аннаңар оларны піліп алар ӱчӱн, полызығ киректелчеткені хайхастығ нимес. Худай «сурынчатханнарға Худай Худын» пирерге молҷапча (Лука 11:13). Ызых хут сірерге Худайның сағыстарын піліп аларға полыс пирер. Пола-пола Худайның ызых худы сірерге «Худайның тириин» дее піліп аларға полыс пирер (1 Коринфтегілерге 2:10).

Піліп алар иде хығыр. Кӧп хығырыбызарға кӱстенмеңер. Хығырған нимедеңер тирең сағыныңар. Постарыңа мындағ сурығлар турғызыңар: «Пу кізідеңер хығырып, аның хайдағ качестволарын піліп алдым? Аның кӧзідімінең нимее ӱгрен полам?»

Кӧстеглер турғызыңар. Библияны хығырғаны тик ле тус иртірген чіли пілдірбезін тіп, чуртазыңарны чахсыландырар нимелерні тілеңер. Мындағ кӧстеглер турғызарға чарир: Худайдаңар кӧп арах піліп аларға, тудынызыңны паза хылығыңны алыстырарға алай чахсы ир (ипчі) полып аларға. Анаң Библияда пу кӧстеглерге чидіп аларға полызар кизектерні таап алыңар *.

Пу пис чӧп сірерге хығырып пастирға полыс пирер. Че хайди Библия хығырарын хынығ арах идіп аларға? Аннаңар чоох мының соондағы статьяда парар.