Сірер Библияны мындағ сағыстар ӱчӱн хығырып пастирға хынмин сыххазар, арса. Кӧп кізі Библияны хығырарға уғаа сидік тіп сағынча. Че Библия чуртазыңарны алыстыр поларын паза сірерні часкалығ арах кізі ит поларын піліп алған ползар чи? Піреезі ол киндені хығырарға уғаа хынығ теен полза чи? Библия хығырғанынаң тузазын піліп аларға хынчазар ба?

Библия хығырғанының тузазынаңар кізілер ниме чоохтапчатханнарын кӧр кӧреелер.

20-ҷе частығ Езекиль чоохтапча: «Мының алнында мин чолҷа кӧстег чох парчатхан водительге тӧӧй полғам. Че Библия нимее кӱстенерге кӧзіт пирген паза чуртаста смысл таап аларға полыс пирген. Анда полған на кӱнге тузалығ чӧптер пар».

Чиит хыс Фрида ӱлесче: «Мин ӧкпеленҷік кізі полғам. Че Библиядаң посты холда тударға ӱгреніп алғам. Ам мин кізілернең тіл алыс полчам паза минің хай-хай кӧп нанҷы».

50 азыра частығ Евника, тізең, піди тіпче: «Библия хылығымны алыстырарға паза хомай киректерімні тастирға полыс пирген».

Библия пу кізілерге паза аны хығырған миллионнарға сынап часкалығ полып аларға полыс пирген. Ол сірерге дее полыс полар (Исайя 48:17, 18). Библия сірерге 1) хыйға пӧгіннер аларға ӱгреніп аларға, 2) сын нанҷылар таап аларға, 3) стресске пастыр салбасха паза 4) Худайдаңар сынны піліп аларға полыс пирер. Анзы иң аарлығ. Библиядағы чӧптер — Худайның чӧптері, аннаңар оларның хоостыра тудынғаннарыңа хаҷан даа ачырғанмассар. Худай піске хомай чӧптер хаҷан даа пирбес.

Пастап ла аларға кирек. Сірерге анзында ниме полыс пирер? Библия хығырарын хайди хынығ арах идіп аларға?