САҒЫН КӦРІҢЕР: сірер музейзер килдер. Андағы экспонаттарның кӧбізі прай иргілен парған, талалғлап парған, піреезінің чардыхтары чоғыл. Оларның аразында сірер пір экспонат кӧр салдар. Ол уғаа чахсы, прай пӱдӱн, аның оох-теек тее нимелері прай орындалар, ӱр ниместе ле иткен нимее тӧӧй. Сірер гидтең сурчазар: «Пу наа экспонат па?» Ол сірерге нандырча: «Пу уғаа иргі экспонат». Сірер сурчазар: «Аны ӱр ниместе реставрировать полғаннар ба?» Ол тіпче: «Чох. Аны хаҷан даа реставрировать полбааннар». Сірер сурчазар: «Андағда аны чахсы хайраллааннар ба?» Ол нандырча: «Чох. Ағаа наңмырға даа ӧтігерге, чилліг кӱннерде дее тасхар чадарға киліскен. Ағаа хоза, аны вандаллар ардат саларға кӱстенгеннер». Сірер сурарзар: «Нимедең андағда ол иділген?»

Библияны андағ экспонатнаң тиңнестірерге чарир. Пурунғы тустардаң пістің тусха пасха даа кӧп кинделер читкеннер. Че оларның кӧбізінің чардыхтары чоғыл. Кӧбізін, оларда пазылған сағыстар пӱӱнгі наукаа киліспинчелер. Оларда пазылған имнег оңдайлары кізіні имнир орнына кізінің хазиин ардатчалар.

Библияны 35 век мының алнында пазып пастааннар. Аны саңай чох идібізерге кӱстенгеннер: аны ӧртееннер, ағаа кӱлгеннер, аны тілбестирге чаратпаҷаңнар. Андағ даа полза, ол пістің тусха читіре пір дее алыспаан. Наука саринаң кӧрзе, наука пӱӱн піліп алған нимелердеңер анда хаҷанох пазыл парған. («Устарела или же опередила свое время?» тіп рамканы кӧріңер.)

Арса, сірер сурчазар: «Библиядағы чӧптер амғы туста сынап туза поларлар ба?» Сағын кӧріңер, кізее истіг чуртирға ниме харығ полча? Кӧбізі пу сурыға чаалар, ағырығлар, коррупция, суғ, кии паза чир кірліг пол парғаны тіп нандырчалар. Библияның мында пирілген принциптерін хығырып алыңар. Хығырчатсар, сағын кӧріңер: «Кізі оларның хоостыра тудынған полза, чуртас сала оой арах поларҷых па?»

ПАСХАЛАРЫНАҢ ЫНАҒ ЧУРТААНЫ

«Часкалығлар амыр хоных ӱчӱн тоғынчатханнар, олар Худай палалары адаларлар!» (Матфей 5:9). «Оңдайларың пар полза, прай кізілернең амыр чуртирға кӱстеніңер» (Римдегілерге 12:18).

АЙААЧЫ ПАЗА ПЫРО ТАСТИРҒА ТИМДЕ ПОЛҒАНЫ

«Часкалығлар паарсахтар, оларға даа Худай паарсир!» (Матфей 5:7). «Пірее кізінің піреезіне хоп полза, удур-тӧдір тыстанызыңар. Христос сірерге хайди пыро тастаан, сірер дее ідӧк идіңер» (Колосстағыларға 3:13).

ПАСХА РАСАЛАРДАҢАР ХОМАЙ САҒЫНМААНЫ

«Пір кізідең Ол прай чоннарны чайап салып, оларны чуртирға прай чир ӱстӱнҷе тарадыбысхан. Чоннарға чуртир тузын паза орнын прай кӧзіт пирген» (Илҷілернің 17:26). «Худайның прай чоннарға пір син хайчатханын амды сынап кӧрчем. Аймах-пасха чоннарда Аны улуғлапчатханнар паза орта ниме итчеткеннер Худайның кӧңніне кірче» (Илҷілернің 10:34, 35).

ЧИРГЕ СИБЕР ХАЙҒАНЫ

«Иегова, кізі чирні сибер тудып анда тоғынзын тіп, аны Эдем садта чуртат салған» (Бытие 2:15). Худай «чирні чох итчеткен кізілерні чох идер» (Азых чоох 11:18).

ХАРАМ ПАЗА САЙБАХ ТУДЫНЫСТЫ ХЫРТ КӦРГЕНІ

«Анаң оларның прайзына теен: — Кӧріңер, азымахчы полардаң китеніңер. Кізінің чуртазы ис-пайының кӧбінең полбинча» (Лука 12:15). «Сірер ах-арығ кізілер полчазар, аннаңар чӧреес хылыхтар, арығ нимес киректер паза чабдыланыс сірернің чоохтарыңда даа чох поларға кирек» (Ефестегілерге 5:3).

ЧОЙЛАНМААНЫ ПАЗА ТОҒЫСХА КӰС ПОЛҒАНЫ

«Піс хаҷан даа орта идерге кӱстенчебіс» (Еврейлерге 13:18). «Алында оғыр иткен кізі, паза оғырлабин... позының холларынаң тоғынзын» (Ефестегілерге 4:28).

ПАСХАЛАРЫНА ПОЛЫСХАНЫ

«Харындастар, сах ідӧк арғаастарны сизіндіріңер, туртухчатханнарны кӧдіре алыңар, полынмастарға полыс турыңар, прайзынаң тыстанып тудыныңар» (1 Фессалониктегілерге 5:14). «Ӧкістердеңер паза чалғыс чарым халған ипчілердеңер сағыссыраңар» (Иаковтың 1:27).

Пу сӧстер сіліг ле сӧстер нимес. Сағын кӧріңер, кізілер пу сӧстер хоостыра чуртаан ползалар, чуртас хайдағ поларҷых? Хайди кӧрчебіс, Библиядағы чӧптер амғы тусха тузалығлар. Че Библия сірерге хайди полыс полар?

Хайди-да пір хыйға кізі піди теен: «Хыйғазы киректерінің кӧрінче». Хайди сағынчазар, пу сағыс орта сағыс па? Чӧптер хыйға ба, чох па, олар нимее ағылчатханынаң кӧрінче. Арса, сірер сағынчазар: «Библияның чӧптері туза полчатса, минің чуртазым чахсы саринзар алызарға кирек. Минің сидіктерімні ол хайди пӧк полар?» Ам пір ипчінің кӧзідімін кӧр кӧреелер.

Ирина * часкалығ чуртас чуртаан. Че пірсінде соон сӱрістіре пол парған киректер аның чуртазын алыстырыбысханнар. Аның хызы ӱреп парған. Анаң ирі тастап парыбысхан. Соонаң ол ахчадаң хызыл сыххан. Аннаңар ол піди теен: «Кемзім мин, пӱӱн пілбинчем дее: минің сӧбірем чоғыл, хызым ӱреп парған, чуртаҷаң турам даа чоғыл. Ноо-да нимедеңер сағынарға алай ниме-де идерге кӱзім пір дее чоғыл».

Иринаның ачығ чуртазы пу сӧстер орта полчатханын кӧзіт пирген: «Кізі читон чыл чуртапча. Кӱстіг арах кізі сигізон чыл чуртаза даа, аның чуртазы чобағлар паза иреелер аразында иртче. Чыллар табырах ирт парчалар, анаң піс учух парыбысчабыс» (Псалом 90:10).

Анаң Ирина Библиязар айланған, Библия ағаа сынап полыс пирген. Мының соондағы статьялар кӧзітчелер: Библияның чуртасты чахсы саринзар алыстырар кӱзі пар. Библия пу статья пасталған кӧзідімдегі иргіленмеен экспонатха тӧӧй. Пасха кинделер саңай иргілен парзалар даа, Библия пістің тусха пір дее алыспин читкен. Аның чӧптері ам даа тузалығлар. Хайди сағынчазар, ноға? Ол саңай пасха «материалнаң» иділген ӱчӱн нимес пе? Анда кізілернің сағыстары нимес, че Худайның сағыстары пазыл парғанына киртінерге чарир ба?

Кізінің чуртазы хысхаҷах паза уғаа сидік полчатханынаң сірер таласпассар, неке. Сидіктерге урунзар, чӧптер паза хабазығ хайда тілепчезер?

Библия сірерге хайди полыс поларын піліп алаалар. Ӱзӱрібізеелер, хайди ол:

1. хайраллапча;

2. арачылапча;

3. кӱс кирче.

Мының соондағы статьяларда Библияның чӧптері чуртаста хайди полысчатханы ӱзӱрілер.