Кізінің чахсы качестволарын нинҷе кӧп кӧрчебіс, анҷох кӧп ол кізізер тартылчабыс паза аннаң ынархазыбыс уламох тыыпча. Ідӧк Иегова Худайның качестволарын піліп одырзабыс, хайдағ ол Худай полчатханын піліп аларбыс паза ағаа чағын полып одырарбыс. Худайның ӧӧн тӧрт качествозын кӧр кӧреелер: кӱзін, хыйғазын, сын тудынызын паза хынызын.

«О Прай нименің ээзі Хан-пиг Иегова! Син тигірні паза чирні позыңның илбек кӱзіңнең чайап салғазың» (ИЕРЕМИЯ 32:17).

Худайның кӱзі аның чайаахтарында кӧрінче. Кӧзідімге, чайғызын айас кӱнде тасхар сыхсар, кӱн сірерні чылытча. Сынында анзында Худайның кӱзі кӧрінче. Кӱннің кӱзін кӧр кӧреелер. Кӱннің ядрозының ізии Цельсийҷе 15 000 000 градусха чит парча. Полған на секундада кӱннең чӱзер миллион ядернай бомбаның энергиязынҷа энергия сыхча.

Тилекейде нинҷе-нинҷе миллиард чылтыс. Кӱн оларның хыринда уғаа кічіг чылтыс. Учёнайлар иң улуғ чылтыстарның пірсі UY Щита полчатханын піліп алғаннар. Аның радиузы Кӱннің радиузынаң 1 700 хати улуғ. UY Щита тіп чылтысты Кӱннің орнына турғыс салза, Чир дее, Юпитер дее аның істінде пол парарлар. Анзы Иегова Худай тигірні паза чирні — прай Тилекейні — позының илбек кӱзінең чайааннаңар Иеремияның сӧстерін чахсы арах піліп аларға полысча.

Худайның кӱзі хайди піске полысча? Піс Худай чайаан нимелернің сылтаанда чуртапчабыс, кӧзідімге, Кӱннің паза Чир пирчеткен нимелернің сылтаанда. Ідӧк Худай пірее кізілерге полыс пирер ӱчӱн, оларға кӱзін пирче. Хайди? Кӧзідімге, пастағы векте Худай Иисус Христосха хайхастар идерге кӱзін пирген. Библияда чоохталча: «Харах чохтар кӧр сыхчалар, ахсахтар, тізең, пас сыхчалар, чызығ палығлығлар арығланып алчалар, туныхтар, тізең, ис сыхчалар, ӧліглер тірілчелер» (Матфей 11:5). Амғы туста хайди кӱзін пирче? Библияда чоохталча: «Ол майых парған кізее кӱс пирче». Ідӧк анда чоохталча: «Иеговаа ізенчеткен кізі хатап кӱс алынар» (Исаия 40:29, 31). Иегова піске чуртаста сидіктерні паза сынағларны тобыр парыбызарға позының кӱзін пирерге тимде (2 Коринфтегілерге 4:7). Сірердеңер сағыссырапчатхан паза илбек кӱзін пир полчатхан Личностьнаң нанҷылазарға хынчазар ба?

«О Иегова, синің иткен киректерің хайди кӧп! Прай нимелерні син хыйға чайаазың» (ПСАЛОМ 104:24).

Нинҷе кӧп Худайның чайаахтарынаңар піліп алчабыс, анҷох аның хыйғазына хайхапчабыс. Кӧзідімге, наукада биомиметика, алай биомимикрия, тіп область пар. Ол областьта тоғынчатхан учёнайлар, Иегованың чайаахтарын істезіп, аймах-пасха изобретениелерге чир-чайаанның идеяларын алчалар — застежка-липучканаң ала самолеттың конструкцияларына читіре.

Кізінің ит-сӧӧгі хайхастығ пӱткенінде Худайның хыйғазы іле кӧрінче. Пала іҷезінің істінде хайди пӱтчеткенін кӧр кӧреелер. Чуртас пір оплодотвореннай клеткадаң пасталча. Ол клеткада прай генетическай инструкциялар пар. Ол позына тӧӧй клеткаларға чарылча. Че хайдағ-да туста ол клеткалар удур-тӧдір тӧӧй нимес пол парчалар. Іди 200-че аймах-пасха клеткалар, кӧзідімге, хан, сӧӧк клеткалары паза нервнай клеткалар, пӱт парчалар. Ӱр ниместең органнар пӱт сыхчалар паза тоғын сыхчалар. Іди пір оплодотвореннай клеткадаң тоғыс ай пазынаң миллиард клетканаң пӱткен пала тӧріпче. Кізінің ит-сӧӧгі хайди хайхастығ пӱткенін кӧріп, кӧп кізі Библияда пазылған сӧстернең чарасча: «Минің хайхастығ пӱткенім чӱреемні уғаа тың тибіретче. Аның ӱчӱн сині махтирбын» (Псалом 139:14).

Худайның хыйғазы хайди піске полысча? Чайаачыбыс піске часкалығ поларға ниме кирек полчатханын пілче. Худайның пілістері уғаа тирең паза ол позының хыйғазынаң піснең ӧрініснең ӱлесче. Аның хыйғазын Библияда таап аларға чарир. Кӧзідімге, Библияда мындағ чӧп пар: «Удур-тӧдір прай чӱрекнең пыро тастазыңар» (Колосстағыларға 3:13, НТ). Чахсы чӧп пе? Я. Істезіглер кӧзітчелер: пыро тастап полчатхан кізілер чахсы узупчалар, пӧзік давление, депрессия паза пасха даа ағырығлар ӱчӱн асхынах арах ирееленчелер. Худай, сизіктіг паза сағыссырапчатхан нанҷы чіли, хаҷан даа чахсы паза тузалығ чӧп пирерге тимде (2 Тимофейге 3:16, 17). Сірернің андағ нанҷы ползын тіп хынчазар ба?

«Иегова сын тудынысха хынча» (ПСАЛОМ 37:28).

Худай хаҷан даа сын тудынча. Сынында, «Сын Худай хаҷан даа хомай итпес паза Прай нимедең кӱстіг Худай хара сағыснаң хаҷан даа тудынмас!» (Иов 34:10). Худай пӧгіннер алчатса, хаҷан даа сын тудынча. Псаломны пасхан кізі Иеговадаңар піди чоохтаан: «Син чоннарны орта чарғынаң чарғылирзың» (Псалом 67:4). Иегова кізі чӱреен кӧрче, аннаңар кізінің чойырхос тудынызын сизін салча, сын нимені чӧй нимедең талластыр полча паза ноға кізі іди тудынчатханын пілче (1 Самуила 16:7). Ідӧк Худай прай чир ӱстӱнде сыны чох тудынысты, коррупцияны, полған на чабал киректі кӧрче паза «хара сағыстығлар чирдең хырыл парарлар» тіп молҷапча (Притчи 2:22).

Че Худай хатығлирға ла чӧрчеткен чабал чарғыҷы нимес. Ол айирға сылтағ тілепче. Библияда чоохталча: «Иегова айаачы паза алғым чӱректіг». Кӧп чазых иткен, че прай чӱрекнең пыросынчатхан кізілерге айап, пыроларын тастапча. Сын тудыныс андағ поларға кирек нимес пе? (Псалом 103:8; 2 Петрның 3:9).

Худайның сын тудынызы хайди піске полысча? Петр илҷі теен: «Худайның прай чоннарға пір син хайчатханын амды сынап кӧрчем. Аймах-пасха чоннарда Аны улуғлапчатханнар паза орта ниме итчеткеннер Худайның кӧңніне кірче» (Илҷілернің 10:34, 35). Худайның сырай таллабинчатханы паза сын тудынчатханы піске туза ағылча. Хайдағ даа расадаң, нациядаң сыххан, хайдағ даа ӱгредігліг алай социальнай положениеліг кізі Худайның нымысчызы пол полар паза Худайның кӧңніне кір полар.

Худай пісті сын тудыныста тӧстелчеткен принциптерні пілзіннер паза оларнаң тузаланзыннар тіп хынча. Аннаңар ол піске совесть пирген. Библияда совесть чӱректе пазылған чахығ тіп чоохталча. Ол чахығ орта алай саба тудынчатханыбысты піліп аларға полысча (Римдегілерге 2:15). Анзы піске хайдағ туза ағылча? Совезьібісті орта ӱгрет салзабыс, хомай киректердең хыйа поларбыс. Алҷаас ит салзабыс, совесть прай чӱрекнең пыросынарға паза тудынызыбысты алыстырарға кӧӧктірер. Худай сын тудынчатханына паза пісті андағ качестволығ чайап салғанына хайди тың ӧрінчебіс! Худайның андағ качествозын кӧріп, піс андар уламох тартылчабыс.

«Худай — хыныс» (1 ИОАННЫҢ 4:8).

Худай кӱстіг, хыйға паза сын тудыныстығ полза даа, Библияда ол — кӱс, хыйға сағыс паза сын тудыныс тіп чоохталбинча. Анда ол — хыныс тіп пазылча. Ноға? Иегова ниме-де итчетсе, кӱзінең тузаланчатса даа, сын тудыныснаң паза хыйғазынаң устанчатса даа, хыныс ла аны ниме-де идерге кӧӧктірче. Ол прай нимені хыныснаң итче.

Иегова ағаа ниме-де кирек полған ӱчӱн нимес, че хынызының ӱчӱн чайап пастаан. Аның хынызы тигірдегі паза чирдегі хыйға чайаахтарны чайирға кӧӧктірген. Олар ла аның полызиин, хынызын сизінчелер паза аарлап полчалар. Ол Чирні кізілерге чахсы иб ит салған. Худай ам даа кізілердеңер сағыссырапча: «Ол Позының кӱніне, хомай даа, чахсы даа кізілерге чарыт тур тіп, чахығ пирче, арығ чӱректіг дее, чазыхтығ даа кізілерге наңмыр ыс пирче нимес пе зе?» (Матфей 5:45).

Ағаа хоза, Иегова «айаачы паза нымзах паарлығ нооза» (Иаковтың 5:11). Худай аны прай чӱрекнең піліп аларға кӱстенчеткен паза ағаа чағын поларға хынчатхан полған на кізіні аарлыға санапча. Библияда Иегова «пістің полғаныбыстаң на тың даа ырах нимес» тіп чоохталча (Илҷілернің 17:27).

Худайның хынызы хайди піске полысча? Піс кӱн одырчатханына ӧкерсінчебіс. Паланың хатхырчатханына ӧрінчебіс, чағын кізінің хынызын аарлыға санапчабыс. Прай пу нимелер дее чох чуртап поларҷыхпыс, че ол нимелер пістің чуртазыбысты хынығ итчелер.

Пістің Худайға пазырарға оңдай пар, анзында аның хынызы кӧрінче. Библия пісті хығырча: «Пір дее нимее сағыссырабаңар. Че пазырчатсаңар, сурынчатсаңар, кӧңніңерні алғыстаснаң Худайға ас пир турыңар». Ол Хыныстығ Пабабыс пісті прай сағыссыратчатхан нимелерні ағаа чоохтазыннар тіп хынча. Іди Иеговаа пазырзабыс, піске «кізі сағызы чит полбас Худайның амыры» пирілер (Филипптегілерге 4:6, 7).

Худайның ӧӧн качестволарын — кӱзін, хыйғазын, сын тудынызын паза хынызын — хысхаҷахти ӱзӱргені Худай хайдағ полчатханын чахсы арах піліп аларға полыс пирді бе? Иеговаа чағын арах полып аларға хынчатсар, ниме ол піске иткенін паза идерін піліп аларға кирек.