КІЗІ улуғ чобаға кір парза, ағаа Худайның чооғын искенінің тузазы чоғыл тіп пілдірчетсе, ол Худайға киртістіг халар ба? Иов чуртаан туста пу сурығ кӧдіріліп, пӧгіл парған.

Израильтяннар Египетте полған туста, Авраамның туғаны, Иов Аравияда чуртаан. Пірсінде ангеллер Худайның алнында чыылызып алғаннар. Оларның аразында Сайтан полған. Иегова прай ангеллернің кӧзіне прай чир ӱстӱнде Иов осхас киртістіг кізі чоғыл теен. Сайтан, тізең, Иов Худай аны арачылапчатхан паза аны алғастапчатхан на ӱчӱн пазырча, аның прай нимезін пылазып алза, ол Худайны харғир тіп нандырған.

Иегова Сайтанға Иовты сыныхтирға чаратхан. Сайтан Иовты пайы чох паза палалары чох артыс салған, соонаң ағаа уғаа чабал ағырығ ысхан. Чобағларны Сайтан ысханын пілбин, Иов ноға Худай ағаа сынағларны ысчатханын піл полбаан. Че андағ даа полза, ол Худайға киртістіг халған.

Иовсар чойырхос ӱс нанҷы килген. Иов чазырып итчеткен чазыхтарының ӱчӱн Худай аны иреелепче тіп киртіндірерге кӱстенгеннер. Олар Худай нымысчыларына хаҷан даа чӧпсінминче паза нымысчыларына хаҷан даа ізенминче тееннер. Че Иов оларның чой чоохтарынаң чараспаан. Ол ӧлгенҷе Худайға киртістіг халарға тідімніг полған!

Че Иовтың позын иртіре ахтанғаны алҷаас полған. Иовтың паза аның нанҷыларының чоохтарын истіп, Елиуй чооғын пастапча. Ол Иовтаң паза аның нанҷыларынаң чиит полған. Елиуй Иовха Иегованың пӧзік ӱлгӱзін ахтааны ноо даа кізіні ахтаанынаң пӧзік полчатханын кӧзіт пирген. Соонаң Елиуй Иовтың чой нанҷыларының чой чоохтарын іле кӧзіт пирген.

Анаң Иегова, Иовнаң чоохтазып, аның кӧрізін тӱзеткен. Чайаахтардаңар чоохтап, Иегова Худай кізінің нинҷе илбек полчатханын кӧзіт пирген. Иегованың тӱзеткенін Иов пазымнығ алған. «Худай айаачы паза нымзах паарлығ», аннаңар ол Иовты чазылдырыбысхан. Аның пайын ікі хати хос пирген паза ағаа он пала сыйлап пирген (Иаковтың 5:11). Аар сынағларда Худайға киртістіг халып, Иов Сайтан кӧдірген сурыға нандырығ пирген.

Иов тіп киндеде тӧстелген.