Ӧлер алнында, Иисус тӧрт ӱгренҷізінең, Петрнаң, Иаковтаң, Иоаннаң паза Андрейнең, уғаа аарлығ чоох апарған. Халғанҷы кӱннернің «килеріне хайдағ танығ полардаңар» Иисус оларға ас пиріп, сурығ турғысхан: «Кем андағда ізестіг паза хыйға нымысчы? Тура ээзі, чіҷең нимені нымысчыларға тузында пир турзын тіп нымысчыны турғысхан» (Матфей 24:3, 45; Марк 13:3, 4). Иисус, «тура ээзі» полып, «нымысчы» турғыс салам тіп ӱгренҷілерін ізендірген. Ол нымысчы чабал чир-чалбахтың тӱгенҷі кӱннерінде аның соонҷа парчатханнарға духовнай чиисті, тохтабин, читкіҷе пирер. Кем ол «нымысчының» санына кірче?

Ол, Иисустың соонҷа парчатхан, таңмалалған кічіг группа. «Нымысчы» — Иегованың киречілерінің устапчатхан чӧбі. Тусха килістіре духовнай чиисті ол прай Иегованың киречілеріне ӱлепче. Ол «ізестіг нымысчы» чох, піс «чіҷең нимені тузында» ал полбасчыхпыс (Лука 12:42).

Ол Худай туразында устағҷаа турғызылған (1 Тимофейге 3:15). Иисус ол «нымысчаа» Иегованың организациязының чирдегі чардығынаң устирға чахаан. Ол уғаа нандырығлығ тоғыс. Аны идер ӱчӱн, ис-пайынаң, искіріг тоғызынаң устирын паза пісті чыылығларда ӱгредерін Иисус «нымысчының» холына ізеніп пирібіскен. «Ізестіг паза хыйға нымысчы» пічіктер хоостыра, ідӧк ӧмелернің чыылығларынаң паза конгресстер пастыра піске духовнай чиисті пирче.

Ол «нымысчы» киртістіг — Библиядағы сыннарға паза Худай сӧзін искірерге пирген тоғысха киртістіг; ідӧк, Иисус ағаа чирде пирген прай нименең чахсы тузаланчатхан ӱчӱн, ол «нымысчы» хыйға (Илҷілернің 10:42). Позының организациязынзар кӧптең кӧп арығ чӱректіг кізілерні хозып, паза духовнай чиисті ӱӱлдіре пиріп, Иегова аның тоғызын алғастапча (Исаия 60:22; 65:13).

• Иисус духовнай чиисті ӱгренҷілерге пирер ӱчӱн, кемні турғыс салған?

• Хайдағ саринаң ол «нымысчы» киртістіг паза хыйға?