Христианскай грек пічіктерінде Варнавадаңар паза Павел илҷідеңер удаа чоохталча. Ол иреннер чорыхчы-кӧрігҷілер полып, нымысчыланғаннар паза христианнарның пастағы ӧмелерінзер кил парҷаңнар. Ноға олар іди чӧрҷеңнер? Олар постарының пір киртіністіг харындастарына чахсы поларынаңар прай кӧңнілерінең сағыссырааннар. Пірсінде Павел Варнаваа чоохтаан: «Хатап чӧр киліп, Худайға киртінчеткеннер хайди чуртапчатханнарын кӧр килең». Пір киртіністіглерін тыыдар ӱчӱн, ол чӱзер километр тобырарға тимде полған (Илҷілернің 15:36). Пістің тустағы чорыхчы-кӧрігҷілернің кӧңнілері андағох.

Олар пісті тыыдарға килчелер. Аймах кӧрігҷізі 20-ҷе ӧмезер (пір аймах) чылда ікі хати кил парча. Полған на ӧмеде пір неделя полча. Піс ол пілістіг харындастарнаң паза оларның ипчілерінең кӧп нимее ӱгрен поларбыс. Олар ӧмеде прайзынаң, палалардаң даа паза улуғланыбысханнарнаң даа, танызарға кӱстенчелер. Піснең хада иблеп, Худай сӧзін искірерге паза Библия ӱгредіглерінзер хада чӧрерге оларның кӧңнілеріне тың кірче. Аймах кӧрігҷілері ах сағалларнаң хада хадарҷы тоғызын итчелер паза, ӧме тоғазығларында паза конгресстерде кӧңні кӧдірчеткен чоохтар чоохтап, прайзыбысты тыытчалар (Илҷілернің 15:35).

Олар ӧмеде полғанына ла хайығ салчалар. Аймах кӧрігҷілерінің кӧстии — ӧмелерні духовнай саринаң тыыдарға. Чидіглерні ӱзӱрерге паза харындастарға чӧп пирерге олар ах сағалларнаң паза нымысчыланыс полысчыларынаң тоғасчалар. Олар пионерлерге нымысчыланыстарын чахсы арах идерге полысчалар, ідӧк ӧмезер наа килгеннернең танысчалар паза оларның духовнай чидіглерінеңер пілерге хынчалар. Піске туза идіп, пістең хада тоғынар ӱчӱн, пу харындастарның полғаны ла постарының тузын паза кӱстерін тайыға саларға тимделер (2 Коринфтегілерге 8:23). Оларның Худайға киртіністері паза ағаа киртістіг халчатханнары кӧӧгізерге турыстығлар (Еврейлерге 13:7).

• Хайдағ кӧстегнең аймах кӧрігҷілері ӧмелерзер килчелер?

• Оларның килгені сірерге хайди полыс пирер?