Пістің организацияда чал ахчазын алчатхан устағҷылар чоғыл. Че пастағы вектегі христианскай ӧме осхас, пістің ус ах сағаллар пар. Олар Худайның ӧӧрін хадарарға турғызылғаннар (Илҷілернің 20:28). Ах сағаллар — «Худайның ӧӧрін... ирік чохтаң на нимес, пос кӧңнінҷе... посха хараспин, хынып» хадарчатхан, Худайнаң пик палғалыстығ паза ӧмеде устағ алчатхан иреннер (1 Петрның 5:1—3). Піске чахсы полар ӱчӱн олар ниме итчелер?

Олар ӧмені арачылапчалар. Ах сағаллар устағ пирчелер паза ӧмені духовнай сайбағнаң арачылапчалар. Иегова оларға хайдағ нандырығлығ тоғыс пиргенін пілініп, ах сағаллар Аның чонының пастыхтары полбин, пістің чуртазыбысты амыр паза ӧріністіг идерге полысчалар (2 Коринфтегілерге 1:24). Ӧӧрде полған на хойны пілчеткен, сағыссырапчатхан хадарҷы чіли, ах сағаллар ӧмеде полған на кізінең танызып аларға кӱстенчелер (Притчи 27:23).

Олар пісті Худай кӧңнін толдырарға ӱгретчелер. Пістің киртінізібісті тыыдар ӱчӱн, ах сағаллар неделя сай ӧме чыылығларын иртірчелер (Илҷілернің 15:32). Ол Худайға киртістіг иреннер, хайдағ даа нымысчыланыста пістің хада тоғынып, Худай сӧзін искірерге пісті ӱгредіп, искіріг кирегінде постарына устағ алчалар.

Олар полғаныбысха хайығ салчалар. Ах сағаллар ӧмедегі полған на кізінің духовнай кирексіністерінеңер сағыссырапчалар. Ызых пічиинең тузаланып, пістің кӧңнібісті кӧдірерге паза часхарарға, олар хадарҷы тоғызын апарып, ибзер дее килерлер алай Иегованың киречілерінің залында даа пістең чоохтазып аларлар (Иаковтың 5:14, 15).

Ах сағалларның кӧбізінің сӧбірелері пар, аннаңар ӧмедегі киректернең пасха оларға тоғынарға паза сӧбіредегі кирексіністерні толдырарға тус кирек. Ол ус тоғысчылар пістің хынызыбысха паза улуғласха турыстығлар (1 Фессалониктегілерге 5:12, 13).

• Ах сағаллар ӧмеде хайдағ тоғыс апарчалар?

• Хайди ах сағаллар піске полғаныбысха хайығ салчалар?