Христос ӱреен соонда, пастағы христианнар аразында Библиядағы сынны ардат салар чой ухаанҷылар сых килерлерінеңер Библияда азынада чоохталған (Илҷілернің 20:29, 30). Ідӧк пол парған. Ол кізілер Иисустың ӱгредіглерін пасха чоннарның пазырыстарының ӱгредіглерінең путхап салғаннар. Іди чой христианство пол парған (2 Тимофейге 4:3, 4). Библия сынында нимее ӱгретчеткенін орта пілчеткенібісті хайди піліп аларға чарир?

Иегова сынны ас пирер тус чит килген. Тӱгенҷі кӱннерде «сын піліс кӧптел парардаңар» Худай азынада чоохтаан (Даниил 12:4). 1870 чылда тигіриб ӱгредіглері Библияда тӧстелбееннеңер сынны тілепчеткен кічіг группа піліп алған. Аннаңар хайдағ ӱгредіглер Библияда тӧстелгеннер, хайдағ, тізең, тӧстелбееннер тіп піліп алар ӱчӱн, олар Худайның Сӧзін істес сыхханнар. Иегова оларның кӱстенчеткеннерін алғастаан паза ызых пічіктерні піліп аларға полысхан.

Арығ чӱректіг кізілер Библияны ситкеп істескеннер. Пістің алныбыста чуртаан Худайның нымысчылары, сіренҷік Библияның істезігҷілері тузаланған ӱгренҷең оңдайынаң піс ам даа тузаланчабыс. Олар Библияны темаларҷа ӱзӱрҷеңнер. Пілдістіг нимес, сидік сағысха учураан ползалар, олар ол сағысты піліп аларға полысчатхан хоза стихтарны Библияда тілеҷеңнер. Ол сағыс прай Ызых пічіктең килісчеткенін піліп алзалар, андада аны пас салҷаңнар. Андағ оңдайнаң, Библияға позы позынаңар чарыда чоохтирға пиріп, олар Худайның адынаңар, Хан-ӱлгӱдеңер, кізілердеңер паза Худайның чирдеңер сағынған сағызынаңар, кізі ӱреп парза, ниме анынаң полчатханнаңар паза ӧлген кізілер тірілерінеңер сынны хатап азып алғаннар. Худай Сӧзін істезіп, олар чой ӱгредігнең паза саба тудынғаннарынаң позып алғаннар (Иоанн 8:31, 32).

1879 чылда прай кізілерге сынны азарға тус чит килгеннеңер Библияның істезігҷілері піліп алғаннар. Ол чылда олар ам даа сыхчатхан журналны сығарып пастаанар. Ол журнал «Сторожевая башня возвещает Царство Иеговы» тіп адалча. Амғы туста піс 240 хазналарда паза чирлерде 750 азыра тіллернең Библиядағы сынны кізілерге искірчебіс. Іди сын піліс хаҷан даа кӧптелбеҷең!

• Иисус ӱреен соонда, Библиядағы сыннаң ниме пол парған?

• Ниме полызиинаң Худай Сӧзінің сыны хатап азылған?