Худайның кӧңнінде: пісті чир ӱстӱндегі райда мӧге чуртадарға!

«Хайди андағ ниме полар?» — сурирзар сірер. Худай позының Хан-ӱлгӱзінең аны идібізерінеңер Библияда чоохталча. Прай кізілер ол Хан-ӱлгӱнеңер паза хайдағ ол алғастар ағылардаңар піліп алзыннар тіп Худайның кӧңнінде (Псалом 37:11, 29; Исаия 9:7).

Худайның кӧңнінде: пісті часкалығ идерге.

Хайди хынчатхан паба позының палаларына иң чахсы ниме ле ползын тіп хынча, ідӧк пістің тигірдегі Пабабыс кізілер часкалығ ползыннар паза ол часкаа хаҷан даа ӧрінзіннер тіп хынча (Исаия 48:17, 18). «Худайның кӧңнін толдырчатхан кізі хаҷан даа чуртидыр» тіп Худай сӧс пирче (1 Иоанның 2:17).

Худайның кӧңнінде: пісті позының чолынҷа апарарға.

Пістің Чайаачыбыс пісті «позының чолларына ӱгрет салар паза піс аның чолларынҷа чӧрербіс» тіп Библияда чоохталча (Исаия 2:2, 3). Прай чир-чалбахта кізілер аның кӧңнін піліп алар ӱчӱн, ол позының адынаң адалған чонны идіп алған (Илҷілернің 15:14).

Худайның кӧңнінде: аның чоны ағаа пір чӧптіг нымысчыланзын тіп.

Иегованың нымысчылары сын хыныс хоостыра пірікчелер, анзы пу чир-чалбахтағы чара-чара тудынчатхан чон аразында хайхастығ ниме полча (Иоанн 13:35). Худайға пір чӧптіг нымысчыланарға пӱӱн кем ӱгретче? Пу сурыға нандырығ піліп аларға пу брошюра полыс пирер.