Иегованың киречілерінің заллары ноға пӱдірілчелер? Худайның Хан-ӱлгӱзінеңер чарлир ӱчӱн. Ол Библияның ӧӧн ӱгредии паза Христос искірген хабарның ӧӧн темазы (Лука 8:1).

Сын пазырыстың кіні. Иегованың киречілерінің залларында чахсы хабарны искірері тимнелче (Матфей 24:14). Ол Заллар аймах-пасха синніг паза кӧрімніг ползалар даа, олар хаҷан даа иптіг паза олаңай кӧрінчелер. Кӧбізін пір Залнаң нинҷе-де ӧме тузаланча. Чыылығларға чӧрчеткен кізілернең саны сыбыра ӧсчеткен ӱчӱн, халғанҷы чылларда піс онар муң наа Заллар пӱдір салғабыс — ортымахти кӱннің сай пис Зал пӱдірілген. Хайди піс аны ит полғабыс? (Матфей 19:26).

Пір фондтағы тайығларға пӱдірілчелер. Ӧмелер Иегованың киречілерінің залларын пӱдірерге паза тыхтирға ахча ал полар ӱчӱн, ол тайығлар филиалзар ызылчалар.

Пасха-пасха синінде чуртапчатханнар постарының кӧңнінең тӧлег чох тоғынчалар. Кӧбізі хазналарда Иегованың киречілерінің залларын пӱдірҷең группалар тӧстелчелер. Прай тустарын пирчеткен пӱдірігҷілернің бригадалары паза нинҷе-де ле тусха пос кӧңнінең килчеткеннер постарының хазналарының істінде ӧмедең ӧмеге — оортах регионнарзар даа — чӧріп, орындағы харындастарға постарының Залларын пӱдірерге полысчалар. Пасха хазналарда Иегованың киречілерінің залларын пӱдірерге паза тыхтирға ол киректі пілчеткен Киречілер постарының регионнарынзар турғызылчалар. Пӱдірігде пасха чирлердең килген пілістіг пӱдірігҷілер араласчатсалар даа, кӧбізі тоғысты орындағы ӧмедегілер итчелер. Иегованың киречілерінің залларын пӱдіргені — сынап, хайхастығ ниме. Андағ хайхас Иегованың худының паза Аның нымысчыларының постарына айанмаанының сылтаанда пол полча (Псалом 127:1; Колоссадағыларға 3:23).

• Ноға пістің Заллар пӱдірілчелер?

• Хайди піс прай чир ӱстӱнде Иегованың киречілерінің залларын пӱдір полчабыс?