Ноға пу кізілернің сырайлары андағ ӧріністіг? Олар конгрессте полчатханнаңар. Пурунғыда Худайның нымысчылары чылда ӱс хати чыылызарға кирек полғаннар (Второзаконие 16:16). Амғы туста піс ідӧк улуғ саннаң чыылызар оңдай сахтапчабыс. Чыл сай пістің ӱс хати чыылызарға аңдағ оңдай пар: ікі пір кӱнніг аймах конгресстері паза ӱс кӱнніг региональнай конгресс. Ноға піс ол чыылығларны іди аарлапчабыс?

Конгресстернің сылтаанда піс позыбысты христианскай сӧбіренің чардығы полчатханыбысты пілінчебіс. Пурунғы Израиль чоны Иегованы «кӧп чоннығ чыылығларда» сабландырған, амғы туста піс ідӧк прайзыбыс хада Худайға пазырарға ӧнетін чыылысчабыс (Псалом 26:12; 111:1). Андағ чыылығларда пістің пасха ӧмелердегі паза пасха даа хазналардаң килген Киречілернең танызып аларға оңдай пар. Обед тузында піс ибзер парыбыспинчабыс, че хада азыранып аларға халчабыс. Аның сылтаанда пістің духовнай ӱлӱкӱннер ынархастығ иртірілчелер (Илҷілернің 2:42). Конгресстерде аймах-пасха хан чирлердегі харындастарны піріктірчеткен хынысты позыбыстың харахтарыбыснаң кӧрчебіс (1 Петрның 2:17).

Олар піске духовнай саринаң ӧзерге полысчалар. Израиль чоны Худайның чахығларын чарыда чоохтаанын истерге чыылҷаң (Неемия 8:8, 12). Пістің чыылығларда алчатхан Библиядағы чахығларны ідӧк аарлыға санапчабыс. Полған на конгресстің темазы Библияда тӧстелче. Хайиибысты тартчатхан чоохтар паза кӧзідіглер олаңай чуртаста библейскай принциптернең тузаланарға ӱгретчелер. Пу оой нимес туста христианскай чолда сидіктерге тоғазып, оларны тобыр парыбысчатхан харындас-пиҷелернің кӧзідімнері пістің кӧңнібісті кӧдірче. Региональнай конгресстегі театрализованнай турғызығлар Библияда пазылған киректерні, постың харағынаң кӧрген чіли, сағын кӧрерге паза посха туза алып аларға полысча. Худайға чуртастарын пазырыста пирібіскеннер полған на конгрессте анзын суғда кіреске тӱзіп кӧзітчелер.

• Ноға конгресстер кӧп ӧрініс ағылчалар?

• Ноға сірерге конгрессте полып аларға чахсы поларҷых?