Иегованың киречілері — ол хайдағ-да наа религияның ады тіп кӧбізі сағынча. Че 2 700 чыл азыра, мының алнындох, чалғыс, сын Худайның нымысчыларын «киречілер» тіп адаҷаңнар (Исаия 43:10—12). 1931 чылға читіре пісті Библияның істезігҷілері тіп пілҷеңнер. Ноға піс позыбысха Иегованың киречілері тіп ат алғабыс?

Іди адалғаныбыс кем пістің Худайыбыс полчатханын іле кӧзітче. Холнаң пазылған, пурунғы пічіктернің хоостыра Худайның Иегова тіп ады Библияда муңар хати учурапча. Кӧп тілбестеглерде ол ат Хан-пиг паза Худай тіп титулларнаң алыстырылған. Че сын Худай, Иегова тіп адынаң аданып, Моисейге позын асхан. Ол пілдістіг иде чоохтаан: «Пу минің адым прай тустарға» (Исход 3:15). Андағ оңдайнаң ол позын прай чой худайларнаң оонаң турғыс салған. Піс аның ах-арығ адынаң аданчатханыбысха поғдархапчабыс.

Іди адалғаныбыс нименең піс айғасчатханыбысты кӧзітче. Мының алнында, Авельнең сығара, Худайның нымысчыларының илбек саны Иеговаа киртіністерінеңер киречілееннер. Чӱзер чыл аразында Ной, Авраам, Сарра, Моисей, Давид паза пасха даа Худайға киртістіг иреннер паза ипчілер «киречілернің илбек пулудының» санында полғаннар (Еврейлерге 11:4—12:1). Хайди чарғыда киречі пыро чох кізінің алнына турча, ідӧк піс Худайыбыстаңар сынны хорыхпин, пасхаларына чоохтапчабыс.

Піс Иисусха кӧӧкчебіс. Библия аны «орта паза сын Киречі» тіп адапча (Азых чоох 3:14). Ол кізілерге Худайның адын ас пирген паза чир-чалбахсар позының Пабазынаңар сынны чоохтирға килген (Матфей 6:9; Иоанн 17:26; 18:37). Аннаңар Христостың соонҷа парчатханнар Иегованың адынаң аданарға паза пасхаларына аны азарға киректер. Иегованың киречілері сах ідӧк идерге сіренчелер.

• Ноға Библияның істезігҷілері Иегованың киречілері тіп адынаң аданғаннар?

• Хаҷан Иегованың киречілері чир ӱстӱнде пол парғаннар?

• Кемні илбек Иегованың киречізі тіп адирға чарир?