Библияда ӧмедеңер сағыссырапчатхан ікі группа иреннердеңер чоохталча — олар «тигіриб устағҷылары паза хабасчылары» (Филипптегілерге 1:1). Кӧбізін, полған на ӧмеде нинҷе-де андағ харындас нымысчыланча. Нымысчыланыс полысчылары ӧмеде ниме итчелер?

Олар ах сағалларның чӧбіне полысчалар. Нымысчыланыс полысчылары — духовнай кӧрістіг, ізестіг иреннер. Олар ӧме киректерінең, кӧбізін организационнай паза чуртастаң палғалыстығ аарлығ сурығларнаң айғасчалар. Оларның полызииның сылтаанда, ах сағалларның ӱгредіге паза хадарҷы тоғызына кӧп арах хайығ саларға оңдай пол парча.

Олар кирек полызығ ағылчалар. Пірее нымысчыланыс полысчылары, чыылығларға килчеткеннерні удурлап, распорядитель полчалар. Пасхалары Залдағы аппаратураның, пічік пирчеткенінің, ӧменің хорадығларының паза Худайның сӧзін искірер участоктарны ӱлестірер ӱчӱн нандырығ тутчалар. Олар Иегованың киречілерінің залын кӧрерінде паза арығлирында полысчалар. Пірееде ах сағаллар оларны ӧмедегі улуғланыбысханнарға полызарға суранчалар. Нымысчыланыс полысчылары хайдағ даа тоғыс итселер, оларның нымысчыланарға тимде полчатханы пістің улуғлазыбысха турыстығ (1 Тимофейге 3:13).

Олар чахсы кӧзідім пирчелер. Нымысчыланыс полысчыларына Худайнаң пик палғалыстығ харындастар турғызылчалар. Чыылығларның программазында араласчатсалар, олар хаҷан даа пістің киртінізібісті тыыдарға кӱстенчелер. Худай сӧзін искірерінде постарына устағ алып, олар постарының пӧзік кӧңнілерінең пісті ідӧк нымысчыланарға кӧӧктірчелер. Ах сағалларның чӧбінең хада тоғынарға тимде полчатханнары ӧменің ӧрінізіне паза пір чӧптіг поларына хабасча (Ефестегілерге 4:16). Нинҷе-де тус пазынаң оларны ах сағаллар тоғызына даа турғызарлар.

• Нымысчыланыс полысчылары кемнер олар?

• Нымысчыланыс полысчылары ӧменің иптіг, пір чӧптіг тоғызына хайди хабасчалар?