Иегованың киречілерін теократическай ӱгредіг хоостыра хаҷанох таныпчалар. Хан-ӱлгӱдеңер хабарны искіреріне тузын кӧп арах пирчеткеннерге ӧнетін школалар пилетелгеннер. Оларның сылтаанда ол искірігҷілер постарының нымысчыланызын толдыразынаң ит полчалар (2 Тимофейге 4:5).

Пионерлер нымысчыланызының школазы. Пір чыл прай тузын пиріп, нымысчыланған соонда, пионер 6 кӱн полчатхан ӱгредіге хығырылча. Анзы Иегованың киречілерінің иң чағын залында иртірілче. Ол школаның кӧстии — пионерге Иеговаа чағын арах полып аларға, нымысчыланыстың прай хыриларында ус арах полып аларға паза анаң андар Худайға киртістіг нымысчыланарға полызарға.

Хан-ӱлгӱнің искірігҷілерінің школазы. Пу 2 ай иртчеткен школаның кӧстии — полызығ кирек чирзер нымысчыланып парарға тимде, ус пионерлерні ӱгредерге. Сынында олар «Мына минзім! Ыс мині» тіпчелер. Олар хаҷан-да чир ӱстӱнде чуртаан иң илбек Искірігҷінің, Иисус Христостың, кӧзідімінің хоостыра тудынчалар (Исаия 6:8; Иоанн 7:29). Пасха чирзер парчатханнарға олаңай арах чуртасха кӧнігерге тимде поларға кирек. Культура, климат паза чиис кізі кӧнік парған нимелердең тың пасха поларға айабас. Наа тіл дее ӱгренерге килізер. Ол школазар 23 частаң 65 часха читіре ипчі албаан харындастарны, ирге парбаан пиҷелерні паза ирепчілерні хығырчалар. Ол школа оларға нымысчыланыста кирек полар духовнай хылыхтарны тилідерге паза Иеговаа паза аның организациязына иң чахсы саринаң оларнаң тузаланарға оңдай пирчеткен кӧнігістер алып аларға полысча.

Сторожевой Башняның Галаад тіп библейскай школазы. Еврей тілінең «Галаад» сӧс «тӧң-киречі» алай «киречілес ӱӱнҷегі» тіп тілбестелче. Ол школаны 1943 чылда тӧстелгеннең сығара 8 000 азыра кізі тоосхан. Олар миссионер полып, «чир хырина» читіре киречілес апарарға ызылғаннар (Илҷілернің 13:47). Салтарлар постары постарынаңар чоохтапчалар. Галаад школаны тоосхан харындас-пиҷелер Перузар пастап ла килгенде, анда пір дее ӧме чох полған, ам, тізең, анда 1 000 азыра ӧме! Пістің миссионерлер Японияда нымысчыланып пастаанда, анда 10 даа Киречі чох полған, пӱӱн, тізең, анда 200 000 азыра Киречі. Ол 5 ай иртчеткен ӱгредіг тузында студенттер Худай Сӧзін тирең ӱгренчелер. Ол школазар специальнай пионерлер, миссионерлер, ідӧк, филиалларда тоғынчатханнар паза аймах кӧрігҷілері хығырылчалар. Пу табырах иртчеткен, кӱстіг ӱгредігде олар Худайның организациязын прай чир ӱстӱнде тыыдарға тимнелчелер.

• Пионерлер нымысчыланызының школазы хайдағ кӧстег тутча?

• Хан-ӱлгӱнің искірігҷілерінің школазында кем ӱгрен полар?