Наа чирлер асчатхан паза наа чоллар салчатхан кізілерні удаа пионерлер тіп адапчалар. Ол саринаң Иисус пионерох полған, ол чирзер кізілерге нымысчы поларға паза оларға арачыласха чол ас пирерге килген нооза (Матфей 20:28). Иегованың киречілері аның кӧзідімінің хоостыра ӱгренҷілер тимниріне кӧп арах тус хоратчалар (Матфей 28:19, 20). Оларның піреелері пионер полып нымысчыланарға оңдай таапчалар.

Пионер — ол прай тузын пирчеткен нымысчы. Иегованың киречілері, прайзы, чахсы хабарны искірер ӱчӱн, нинҷе тус пир полчалар, анҷа тус хоратчалар. Че оларның піреелері Худай сӧзін айда 70 час искірерге чуртастарын килістіріп алчалар. Андағ нымысчылар пионерлер тіп адалчалар. Пионер полып нымысчыланар ӱчӱн, кӧбізі пионерлер чарым кӱн тоғынар тоғыс таап алчалар. Піреелерін искірігҷілер читпинчеткен чирлерде специальнай пионер полып, нымысчыланарға хығырчалар. Андағ нымысчылар ай сай 130 паза аннаң даа кӧп час Худай сӧзін искірчелер. Пионерлер олаңай чуртас апарчалар. Иегова оларны артыспастаңар паза оларға чуртаста прай кирек полчатхан нимелерні пирердеңер ікінҷілебинчелер (Матфей 6:31—33; 1 Тимофейге 6:6—8). Кем прай тузын пиріп нымысчылан полбинча, ағаа, айда 30 алай 50 час Худай сӧзін искіріп, подсобнай пионер поларға чарир.

Худайға паза кізілерге хыныс пионерні нымысчыланарға кӧӧктірче. Піс кізілер духовнай саринаң аар чуртапчатханнарын, Иисус чіли, сизінчебіс (Марк 6:34). Че піс алнынзархы чуртасха пик ізеніснең ӱлезіп, оларға полыс поларбыс. Тустарына паза кӱстеріне айабин, чағыннарға духовнай полызығ пирерге пионерлерні хыныс кӧдірче (Матфей 22:39; 1 Фессалониктегілерге 2:8). Іди нымысчыланып, пионер позының киртінізін тыытча, Иегованаң уламох чағыннасча паза уғаа кӧп ӧрініс алча (Илҷілернің 20:35).

• Пионер кемдір ол, хайди сірер чоохтап пирерҷіксер?

• Прай тузын пиріп нымысчыланарға піреелерін ниме кӧдірче?