Пастағы векте устапчатхан чӧп «Иерусалимдегі илҷілернең паза тигіриб ах сағалларнаң» пӱдірілген. Ол асхынах саннығ харындастар прай таңмалалған христианнар ӧмезіне теелчеткен аарлығ пӧгіннер алҷаңнар (Илҷілернің 15:2). Пӧгін алар алнында, олар Ызых пічиинде аннаңар ниме чоохталчатханын ӱзӱрҷеңнер паза Худайның худы устаанынаң хоостыра тудынҷаңнар (Илҷілернің 15:25). Пӱӱн Иегованың киречілері ол кӧзідімнің хоостыра тудынчалар.

Позының кӧңнін толдырар ӱчӱн Худай аннаң тузаланча. Устапчатхан чӧптегі таңмалалған харындастар Худай Сӧзін уғаа аарлыға санапчалар, чуртастағы паза духовнай киректерде оларның пілістері кӧп. Олар прай чир ӱстӱндегі христианскай сӧбіренің кирексіністерін ӱзӱрерге неделя сай чыылысчалар. Пу харындастар Библияда тӧстелген устағларны, пастағы вектегі чіли, пічіктер, ідӧк чорыхчы-кӧрігҷілер паза пасха даа нымысчылар пастыра пирчелер. Аның сылтаанда Худайның чоны сағыстарында паза киректерінде пір чӧптіглер (Илҷілернің 16:4, 5). Устапчатхан чӧп духовнай чиисті тимнепче паза нандырығлығ харындастарны турғысча, ідӧк Хан-ӱлгӱдеңер хабар искірерін айныдарына хабасча.

Худайның худының устааны хоостыра тудынча. Устапчатхан чӧп прай киректерде Ӧӧркі Ээзінің, Иегованың паза тигіриб Пазының, Иисустың чооғын исче (1 Коринфтегілерге 11:3; Ефестегілерге 5:23). Пу харындастар Худайның чонының пастыхтары тіп постарын сананминчалар. Прай таңмалалған христианнарнаң хада олар «Хураған [Иисус] хайдар парза, андар Аның соонҷа чӧрчелер» (Азых чоох 14:4). Устапчатхан чӧптегі харындастар піс олардаңар пазырчатханыбысты уғаа аарлыға санапчалар.

• Пастағы векте устапчатхан чӧпке кем кірген?

• Устапчатхан чӧп пӱӱн Худайның устаанын хайди тілепче?