Пастағы христианнар постарының чыылығларында сарыннар сарнаҷаңнар, пазырҷаңнар паза Ызых пічікті хығырып ӱзӱрҷеңнер (1 Коринфтегілерге 14:26). Оларның чыылығларында пір дее кибірлер чох полҷаңнар. Пӱӱн пістің чыылығларыбыс ідӧк иртчелер.

Ӱгредіг Библияда тӧстелче паза чуртаста полысча. Полған на ӧмеде тынанҷаң кӱннерінің пірсінде 30-минуталығ библейскай темаға чоох чоохталча. Ол хайди Библия чуртазыбыста полыс поларын кӧзітче паза хайди Худайның Сӧзі чир-чалбахта полчатхан киректернеңер чарыда чоохтапчатханын кӧзітче. Прайлары Библияны азарға паза ӱзӱрілчеткен стихтарны хада хығырарға хығырылчалар. Чоох соонаң Библияны ӱгренҷең статьяны ӱзӱргені пір часча парча. Кем хынча, ол араласча. Андағ ӱзӱріг чуртазыбыста библейскай принциптернең тузаланарға полысча. Прай чир ӱстӱнде, полған на 110 000 ӧмелерде пір материал ӱзӱрілче.

Постарыбыстың ӱгретчең кӧнігістерібісті чахсыландырчабыс. Піс ідӧк неделя аразында пір иирде чыылчабыс. «Пістің христианскай чуртазыбыс паза нымысчыланызыбыс» тіп адалчатхан чыылығ ӱс чардыхтығ полча. Ол ай сай сыхчатхан «Пістің христианскай чуртазыбыс паза нымысчыланызыбыс» пічікте тӧстелче. Пу чыылығның пастағы чардығы «Худай Сӧзінің алтын-кӱмӱстері» тіп адалча. Пу чардых ӧме азынада хығырған Библияның кизегін чахсы арах піліп аларға піске полысча. Пасха чардығы «Нымысчыланыс кӧнігістерін чітітчебіс» тіп адалча, андар кӧзідіглер кірчелер. Олар хайди Библияны пасха кізілернең ӱзӱрерге кӧзітчелер. Чӧп пирчеткен харындас полған на ӱгренҷее хығырығ кӧнігістерін паза хайди кізілернең чоохтасчаң кӧнігістерін чахсыландырарға полысча (1 Тимофейге 4:13). «Худайның нымысчыларының чуртазы» тіп адалчатхан чыылығның халғанҷы чардығында піс библейскай принциптернең кӱннің сай, чуртаста тузаланарға ӱгренчебіс. Ол чыылығда сурығлар паза нандырығлар пастыра материал ӱзӱрілче, анзы пістің Библиянаңар пілісті кӧптелдірче.

Пістің чыылығларыбыста ӱгредіг уғаа чахсы апарылча. Оларның пірсінзер килзер, постарыңар анзын кӧріп аларзар (Исаия 54:13).

• Хайди Иегованың киречілерінің чыылығлары иртчелер?

• Неделя сай полчатхан чыылығларның хайзынзар сірер парарға тың хынарҷыхсар?